VIDEO: ANDARNI VAAT / ગુવાહાટીના અનિલ નગરમાં વરસાદી તબાહી, જળબંબાકાર સાથે પીવાના પાણીનું ઘોર સંકટ!

આસામના ગુવાહાટી શહેરમાં ભારે વરસાદને કારણે અનિલ નગર અને નવીન નગર જેવા વિસ્તારોમાં ભયાનક જળબંબાકારની પરિસ્થિતિ સર્જાઈ છે. વરસાદી પાણી ભરાઈ જવાથી સ્થાનિક નાગરિકોનું જનજીવન અત્યંત અસ્તવ્યસ્ત બની ગયું છે. જળબંબાકારની સાથે સાથે વિસ્તારમાં પીવાના પાણીની ભારે તંગી અને દૂષિત પાણી પુરવઠાની ગંભીર સમસ્યા ઊભી થઈ છે. અનિલ નગરના સ્થાનિક નિવાસી પ્રદીપ બર્મને પોતાની આપવીતી જણાવતાં કહ્યું કે, વિસ્તારના દરેક ઘરમાં વપરાશના પાણીની તંગી વર્તાઈ રહી છે. ઘરોમાં આવેલી ટાંકીઓમાં પણ દૂષિત પાણી પહોંચી રહ્યું છે, જેના કારણે દૈનિક શૌચાલય અને સ્થાન માટે જરૂરી પાણી પણ મળી રહ્યું નથી. અચાનક આવેલી આ જળહોનારત અને દૂષિત પાણીના પુરવઠાના કારણે સ્થાનિક રહીશો આરોગ્ય વિષયક સમસ્યાઓનો સામનો કરી રહ્યા છે. વહીવટી તંત્રની નબળી કામગીરી સામે સ્થાનિકોમાં ગંભીર આક્રોશ જોવા મળી રહ્યો છે.

આ ગંભીર પરિસ્થિતિ અંગે સ્થાનિક નિવાસી પ્રદીપ બર્મને જળ પુરવઠા વિભાગ અને સંબંધિત એન્જિનિયર નેહાને તાત્કાલિક યોગ્ય પગલાં ભરવા વિનંતી કરી છે. તેમણે સૂચન કર્યું છે કે યોગ્ય ડાયવર્ઝન પ્લાન બનાવ્યા વિના આ સમસ્યાનો કાયમી ઉકેલ શક્ય નથી. તેમણે અનિલ નગર અને નવીન નગર તરફ આવતા બાહ્ય વોટર કનેક્શનને તુરંત બંધ કરીને યોગ્ય વ્યવસ્થા ઊભી કરવા અપીલ કરી છે. માત્ર અનિલ નગર જ નહીં પરંતુ હાતીગામ, પંજાબારી અને મિલીગામ જેવા સમગ્ર ગુવાહાટી વિસ્તારમાં પણ પાણીનું મોટું સંકટ ઘેરાયું છે. જળબંબાકારના દ્રશ્યો વચ્ચે તંત્ર દ્વારા વહેલી તકે દૂષિત પાણીની સમસ્યા દૂર કરવામાં આવે અને શુદ્ધ પીવાનું પાણી પૂરું પાડવામાં આવે તેવી માંગ બુલંદ બની છે. વહીવટી તંત્ર દ્વારા રાહત અને નિકાલ કામગીરી ઝડપી બનાવવાની ખાતરી આપવામાં આવી છે.

બ્યૂરો રિપોર્ટ જીએસટીવી