VIDEO: કાનપુરમાં પાંડુ નદીનું રૌદ્ર સ્વરૂપ: નીચાણવાળા વિસ્તારોમાં ઘૂસ્યા પૂરના પાણી, લોકો મુશ્કેલીમાં!

ઉત્તર પ્રદેશના કાનપુર જિલ્લામાં પાંડુ નદીના જળસ્તરમાં સતત થઈ રહેલા વધારાને કારણે પૂરની ગંભીર સ્થિતિ સર્જાઈ છે. ઉપરવાસમાં પડેલા ભારે વરસાદના કારણે પાંડુ નદી ઉફાન પર વહી રહી છે. નદીના વધતા જતા પ્રવાહને લીધે કાનપુરના નીચાણવાળા વિસ્તારોમાં આવેલા અનેક ઘરોમાં પાણી ઘૂસી જતાં ચારેય તરફ અફરાતફરી અને દહેશતનો માહોલ સર્જાયો છે. નદી કિનારે આવેલા નીચાણવાળા મોહલ્લાઓ સંપૂર્ણપણે જળમગ્ન થઈ ગયા છે. ઘરોમાં બે થી ત્રણ ફૂટ સુધી પૂરના પાણી ભરાઈ જવાથી સ્થાનિક રહીશોનું જનજીવન સંપૂર્ણ અસ્તવ્યસ્ત બની ગયું છે. લોકોની ઘરવખરી, અનાજ અને કિંમતી સામાન પાણીમાં પલળીને બગડી જતાં સ્થાનિક લોકોને ભારે આર્થિક નુકસાન વેઠવાનો વારો આવ્યો છે. માર્ગો પર પાણી ફરી વળતા વાહનવ્યવહાર પણ ખોરવાયો છે.

સ્થાનિક રહીશોના જણાવ્યા અનુસાર, પાંડુ નદીમાં જળસ્તર એટલી ઝડપથી વધ્યું કે લોકોને પોતાનો સામાન બચાવવાનો પણ પૂરતો સમય મળ્યો નથી. પીવાના શુદ્ધ પાણી, વીજળી અને ખાદ્ય સામગ્રીની ભારે અછત ઊભી થતાં લોકો પોતાના બાળકો સાથે સુરક્ષિત સ્થળો કે છત પર આશ્રય લેવા મજબૂર બન્યા છે. સ્થાનિકો પ્રશાસન સામે આક્રોશ વ્યક્ત કરતા તાત્કાલિક રાહત સામગ્રીની માંગ કરી રહ્યા છે. પરિસ્થિતિની ગંભીરતાને ધ્યાને રાખીને સ્થાનિક વહીવટીતંત્ર અને બચાવ ટુકડીઓ સક્રિય થઈ ગઈ છે. પૂર પ્રભાવિત વિસ્તારોમાંથી લોકોને સલામત સ્થળે ખસેડવા માટે કામગીરી શરૂ કરવામાં આવી છે. તંત્ર દ્વારા નદી કાંઠાના વિસ્તારોમાં મોનિટરિંગ વધારી દેવામાં આવ્યું છે અને અસરગ્રસ્તો માટે અસ્થાયી આશ્રયસ્થાનો તથા ફૂડ પેકેટોની વ્યવસ્થા કરવા માટે પગલાં ભરવામાં આવી રહ્યા છે.

બ્યૂરો રિપોર્ટ જીએસટીવી