VIDEO: ANDAR NI VAAT/ બડગામ ખાન સાહિબમાં ગેરકાયદે બાંધકામ પર ચાલ્યું પ્રશાસનનું બુલ્ડોઝર

જમ્મુ અને કાશ્મીરના બડગામ જિલ્લામાં પ્રશાસન દ્વારા ગેરકાયદેસર બાંધકામો અને દબાણો વિરુદ્ધ કડક વલણ અપનાવતા મોટા પાયે બુલડોઝરની કાર્યવાહી શરૂ કરવામાં આવી છે. બડગામના ખાનસાહિબ વિસ્તારમાં પોલીસ પ્રશાસન અને મહેસૂલ વિભાગના ઉચ્ચ અધિકારીઓની સંયુક્ત આગેવાની હેઠળ આ સરકારી જમીન પરથી અતિક્રમણ હટાવવાની વિશેષ ડિમોલિશન ઝુંબેશ હાથ ધરવામાં આવી હતી. આ સંવેદનશીલ ઓપરેશન દરમિયાન કોઈપણ પ્રકારનો વિરોધ કે અનિચ્છનીય ઘટના ન બળે તે માટે ઘટનાસ્થળે ખૂબ જ મોટી સંખ્યામાં ચુસ્ત સુરક્ષા બંદોબસ્ત તૈનાત કરી દેવામાં આવ્યો હતો. જમ્મુ-કાશ્મીર પોલીસના જવાનો અને અર્ધસૈનિક દળોના કડક કવચ હેઠળ મહેસૂલ વિભાગે સરકારી જમીન પર વર્ષોથી ગેરકાયદેસર રીતે તાણી બંધાયેલા કાચા અને પાકા બાંધકામોને બુલડોઝરની મદદથી જમીનદોસ્ત કરી દીધા હતા. પ્રશાસનની આ આકસ્મિક અને કડક કાર્યવાહીને પગલે સમગ્ર ખાનસાહિબ પંથકમાં દબાણકર્તાઓમાં ભારે ફફડાટ અને દોડધામ મચી ગઈ હતી.

બીજી તરફ, વહીવટી તંત્રના વરિષ્ઠ અધિકારીઓએ જણાવ્યું હતું કે સરકારી જમીનો, નદી-નાળાઓ અને જાહેર રસ્તાઓ પર કરવામાં આવેલા કોઈપણ પ્રકારના અતિક્રમણને બિલકુલ ચલાવી લેવામાં આવશે નહીં. ખાનસાહિબ વિસ્તારમાં હાથ ધરાયેલી આ કડક ઝુંબેશ અંતર્ગત કરોડો રૂપિયાની કિંમતી સરકારી જમીનને ભૂમાફિયાઓ અને ગેરકાયદેસર દબાણકર્તાઓના ચુંગાલમાંથી સફળતાપૂર્વક મુક્ત કરાવવામાં આવી છે. મહેસૂલ વિભાગ દ્વારા હાલ મુક્ત કરાવવામાં આવેલી જમીનનો કબજો લઈને ત્યાં સત્તાવાર સરકારી બોર્ડ લગાવી દેવામાં આવ્યા છે. સ્થાનિક પ્રશાસને સ્પષ્ટ ચેતવણી આપી છે કે જો આગામી દિવસોમાં ફરીથી કોઈ આ જમીન પર અતિક્રમણ કરવાનો પ્રયાસ કરશે તો તેમની સામે કાયદાકીય કલમો હેઠળ ગુનો નોંધી જેલભેગા કરવામાં આવશે. બડગામના અન્ય વિસ્તારોમાં પણ સરકારી જમીનોની ઓળખ કરી લેવામાં આવી છે અને આગામી સમયમાં આવી જ આકરી બુલડોઝર કાર્યવાહી રાજ્યભરમાં ચાલુ રાખવામાં આવશે તેવા સ્પષ્ટ સંકેતો વહીવટી તંત્ર દ્વારા આપવામાં આવ્યા છે. બ્યુરો રિપોર્ટ જીએસટીવી