Video/ 'તમે જ અમને જવાની મંજૂરી આપી હતી...!' ઈરાની નેવી સામે ભારતીય કેપ્ટનની આજીજીનો ડરામણો ઓડિયો આવ્યો સામે
છેલ્લું અપડેટ : 19 Apr 2026
હોર્મુઝની સામુદ્રધુનીમાં ઈરાની દળો દ્વારા ભારતીય ધ્વજ ધરાવતા બે માલવાહક જહાજો પર કરવામાં આવેલા ફાયરિંગની ઘટના બાદ હવે એક ચોંકાવનારો ઓડિયો સંદેશ સામે આવ્યો છે. આ ઓડિયોમાં ભારતીય જહાજ 'સાનમાર હેરાલ્ડ' (Sanmar Herald) ના કેપ્ટન અત્યંત ગભરાયેલા અવાજમાં ઈરાની નૌકાદળને ફાયરિંગ રોકવા અને પાછા ફરવા દેવા માટે આજીજી કરતા સાંભળવા મળી રહ્યા છે.
ઓડિયોમાં શું છે?
વાયરલ થયેલા ઓડિયોમાં સાનમાર હેરાલ્ડના કેપ્ટન વારંવાર કહી રહ્યા છે કે: "સેપાહ નેવી! આ મોટર ટેન્કર સાનમાર હેરાલ્ડ છે! તમે જ મને આગળ વધવાની મંજૂરી આપી હતી! તમારી લિસ્ટમાં મારું નામ બીજા નંબરે છે! તમે ક્લિયરન્સ આપ્યા પછી પણ હવે ફાયરિંગ કરી રહ્યા છો! પ્લીઝ મને પાછા ફરવા દો!"
શું હતી સમગ્ર ઘટના?
શનિવારે જ્યારે બે ભારતીય જહાજો, જેમાં એક સુપરટેન્કરનો પણ સમાવેશ થાય છે, આ વ્યૂહાત્મક દરિયાઈ માર્ગ પરથી પસાર થઈ રહ્યા હતા, ત્યારે ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC) ના જવાનોએ અચાનક ફાયરિંગ શરૂ કર્યું હતું. આ સુપરટેન્કરમાં અંદાજે 20 લાખ બેરલ ઈરાકી તેલ ભરેલું હતું. ફાયરિંગને કારણે જહાજોએ તાત્કાલિક પોતાનો રસ્તો બદલવો પડ્યો હતો.
ઈરાને હોર્મુઝની સામુદ્રધુની બંધ કરી
આ ઘટના બાદ રેડિયો બ્રોડકાસ્ટ દ્વારા જાહેરાત કરવામાં આવી હતી કે, અમેરિકા સાથેની વાટાઘાટો નિષ્ફળ જતાં ઈરાને હોર્મુઝની સામુદ્રધુનીને તમામ પ્રકારના જહાજો માટે સંપૂર્ણપણે બંધ કરી દીધી છે. ઈરાને ચેતવણી આપી છે કે કોઈપણ રાષ્ટ્રીયતા ધરાવતા જહાજને અહીંથી પસાર થવા દેવામાં આવશે નહીં.
ભારતનો કડક વિરોધ
આ ગંભીર ઘટના બાદ ભારત સરકારે તાત્કાલિક પગલાં લેતા ઈરાનના રાજદૂતને તેડું મોકલ્યું હતું અને સત્તાવાર વિરોધ નોંધાવ્યો છે. વિદેશ મંત્રાલયે ભારતીય ખલાસીઓ અને જહાજોની સુરક્ષા અંગે ઊંડી ચિંતા વ્યક્ત કરી છે. જોકે, ભારતમાં ઈરાનના પ્રતિનિધિ ડૉ. અબ્દુલ મજીદ હકીમ ઈલાહીએ આ ઘટના અંગે અજાણ હોવાનું જણાવીને મામલાને થાળે પાડવાનો પ્રયાસ કર્યો છે.
હાલની સ્થિતિ: ડિરેક્ટોરેટ જનરલ ઓફ શિપિંગ (DG Shipping) આ સમગ્ર સ્થિતિ પર બારીકાઈથી નજર રાખી રહ્યું છે. ભારત સરકારે ખાતરી આપી છે કે સાનમાર હેરાલ્ડના તમામ ક્રૂ મેમ્બર્સ અને જહાજ સુરક્ષિત છે.
