VIDEO: ટ્રમ્પ બનાવશે ‘એઆઈ ફોર્સ’, ટૂંક સમયમાં મુખ્ય અધિકારીની જાહેરાત કરશે
છેલ્લું અપડેટ : 20 Sept 2026
અમેરિકાના રાષ્ટ્રપતિ ડોનાલ્ડ ટ્રમ્પે આર્ટિફિશિયલ ઇન્ટેલિજન્સ (AI)ને લઈને મોટું એલાન કર્યું છે. ટ્રમ્પે જણાવ્યું છે કે તેઓ એઆઈના નિયમન (Regulation) અને દેખરેખ માટે ખાસ ‘એઆઈ ફોર્સ’ બનાવશે. સાથે જ તેમણે આ ક્ષેત્ર માટે એક મુખ્ય અધિકારીની પણ ટૂંક સમયમાં નિમણૂક કરવાની જાહેરાત કરી છે. ટ્રમ્પે આ અંગે સોશિયલ મીડિયા પર પોસ્ટ કરીને એઆઈ ઉદ્યોગના વિકાસને પ્રોત્સાહન આપવાની વાત કરી છે.
એઆઈના વિકાસ પર નહીં લાગે બ્રેક
ટ્રમ્પે પોતાના નિવેદનમાં એઆઈના વિકાસને ધીમો કરવાની માંગનો વિરોધ કર્યો છે. તેમનું કહેવું છે કે અમેરિકા આ ટેક્નોલોજીના વિકાસમાં પાછળ ન રહે અને ઉદ્યોગની વૃદ્ધિ (Growth)ને રોકવાને બદલે તેને મદદ અને પ્રોત્સાહન આપવું જોઈએ. સાથે જ તેમણે કહ્યું કે ખોટી અથવા ગેરકાયદેસર પ્રવૃત્તિઓ પર નજર રાખવા માટે હાલની ફોજદારી અને નાગરિક ન્યાય વ્યવસ્થાનો ઉપયોગ કરી શકાય છે.
‘સ્પેસ ફોર્સ’ની જેમ એઆઈ ફોર્સ
ટ્રમ્પે નવી ‘એઆઈ ફોર્સ’ની સરખામણી પોતાના પ્રથમ કાર્યકાળ દરમિયાન બનાવવામાં આવેલી ‘સ્પેસ ફોર્સ’ સાથે કરી છે. જોકે, હાલ આ નવી વ્યવસ્થા કઈ રીતે કામ કરશે, તેની સત્તાવાર રચના શું હશે અને તે નાગરિક કે સૈન્ય માળખા હેઠળ આવશે કે નહીં, તે અંગે હજુ સંપૂર્ણ વિગતો જાહેર કરવામાં આવી નથી.
એઆઈ માટે મુખ્ય અધિકારીની થશે નિમણૂક
ટ્રમ્પે કહ્યું છે કે તેઓ ટૂંક સમયમાં એઆઈ માટે ‘ચીફ’ અથવા મુખ્ય અધિકારીની જાહેરાત કરશે. આ અધિકારી એઆઈ ક્ષેત્રની નીતિ અને દેખરેખમાં મહત્વની ભૂમિકા ભજવી શકે છે. રોઇટર્સના અહેવાલ અનુસાર, ટ્રમ્પે નવી વ્યવસ્થા અંગે હજુ વિસ્તૃત વિગતો આપી નથી.
એઆઈને ગણાવી ઔદ્યોગિક ક્રાંતિ જેવી ટેક્નોલોજી
ટ્રમ્પે એઆઈને આગામી ઔદ્યોગિક ક્રાંતિ (Industrial Revolution) અને ઇન્ટરનેટ જેવી પરિવર્તનકારી ટેક્નોલોજી ગણાવી છે. તેમણે એવો દાવો પણ કર્યો છે કે ભવિષ્યમાં અમેરિકાની અર્થવ્યવસ્થામાં એઆઈનો મોટો હિસ્સો હોઈ શકે છે. ટ્રમ્પે અમેરિકા એઆઈના ક્ષેત્રમાં ચીન અને અન્ય દેશોથી આગળ રહે તેવો ઉદ્દેશ વ્યક્ત કર્યો છે.
એઆઈના નામને લઈને પણ કરાવ્યું મતદાન
ટ્રમ્પે આ જાહેરાત બાદ એઆઈના નામને લઈને સોશિયલ મીડિયા પર એક મતદાન પણ શરૂ કર્યું હતું. તેમણે પૂછ્યું કે ‘આર્ટિફિશિયલ ઇન્ટેલિજન્સ’ શબ્દની જગ્યાએ ‘સુપિરિયર ઇન્ટેલિજન્સ’, ‘એક્સ્ટ્રીમ ઇન્ટેલિજન્સ’ અથવા ‘સુપ્રીમ ઇન્ટેલિજન્સ’ જેવા શબ્દો વધુ યોગ્ય ગણવા જોઈએ કે નહીં. આ રીતે એઆઈના વિકાસ સાથે તેના નિયમન અને નામકરણને લઈને પણ ટ્રમ્પે ચર્ચા શરૂ કરી છે.
આ જાહેરાત એવા સમયે આવી છે જ્યારે અમેરિકામાં એઆઈની સુરક્ષા, નિયમન અને ઝડપી વિકાસને લઈને ચર્ચા ચાલી રહી છે. ટ્રમ્પનો અભિગમ એઆઈના વિકાસને પ્રોત્સાહન આપવા પર કેન્દ્રિત છે, જ્યારે ટેક્નોલોજીના જોખમો અને સુરક્ષાને લઈને કેટલાક નિષ્ણાતો વધુ સાવચેતી અને નિયંત્રણની જરૂરિયાત અંગે ચર્ચા કરી રહ્યા છે.