VIDEO: પશ્ચિમ એશિયા સંકટ વચ્ચે પેઝેશ્કિયાન આવશે દિલ્હી, ભારત-ઈરાન સંબંધો પર રહેશે નજર
છેલ્લું અપડેટ : 14 Aug 2026
ઈરાનના રાષ્ટ્રપતિ મસૂદ પેઝેશ્કિયાન આગામી મહિને ભારત પ્રવાસે આવશે. તેઓ દિલ્હીમાં ૧૨-૧૩ સપ્ટેમ્બરના રોજ આયોજિત થનારી BRICS શિખર પરિષદમાં ભાગ લેશે. ઈરાને શુક્રવારે પેઝેશ્કિયાનના ભારત પ્રવાસની પુષ્ટિ કરી છે. આ વર્ષે BRICS ની અધ્યક્ષતા ભારત કરી રહ્યું છે અને આ સંમેલન નવી દિલ્હીમાં યોજાવા જઈ રહ્યું છે.
પેઝેશ્કિયાનનો ભારત પ્રવાસ એવા સમયે થઈ રહ્યો છે, જ્યારે પશ્ચિમ એશિયામાં તણાવ વ્યાપેલો છે. તેમની આ મુલાકાત દરમિયાન ભારત અને ઈરાન વચ્ચેના દ્વિપક્ષીય સંબંધોની સાથે સાથે પ્રાદેશિક પરિસ્થિતિ પર પણ ચર્ચા થવાની શક્યતા છે. ભારત સતત પશ્ચિમ એશિયામાં તણાવ ઘટાડવા અને તમામ પક્ષો વચ્ચે વાટાઘાટો દ્વારા વિવાદોનો ઉકેલ લાવવાની વકીલાત કરતું આવ્યું છે.
BRICS માં ઈરાનની ભૂમિકા અને ભારત સાથેના સંબંધો
ઈરાન ૨૦૨૪માં BRICS નું પૂર્ણ સભ્ય બન્યું હતું. ત્યારથી તેહરાન આ મંચ દ્વારા આર્થિક અને રાજકીય સહયોગ વધારવા પર ભાર મૂકી રહ્યું છે. જૂન મહિનામાં ઈરાનના વિદેશ મંત્રી અબ્બાસ અરાઘચી પણ BRICS વિદેશ મંત્રીઓની બેઠકમાં ભાગ લેવા ભારત આવ્યા હતા. તે સમયે તેમણે કહ્યું હતું કે ભારત પશ્ચિમ એશિયામાં તણાવ ઓછો કરવામાં મોટી ભૂમિકા ભજવી શકે છે અને ઈરાન ભારતની કોઈપણ રચનાત્મક ભૂમિકાનું સ્વાગત કરશે.
રાષ્ટ્રપતિ પેઝેશ્કિયાને ઓક્ટોબર ૨૦૨૪માં રશિયાના કઝાન ખાતે યોજાયેલી BRICS સમિટ દરમિયાન વડાપ્રધાન નરેન્દ્ર મોદી સાથે મુલાકાત કરી હતી. બંને નેતાઓએ દ્વિપક્ષીય સંબંધો અને પશ્ચિમ એશિયા સહિતના પ્રાદેશિક મુદ્દાઓ પર ચર્ચા કરી હતી. વડાપ્રધાન મોદીએ તે સમયે ચાબહાર બંદર અને ભારત-ઈરાન સહયોગના મહત્વ પર પણ ભાર મૂક્યો હતો.
પશ્ચિમ એશિયા સંકટ વચ્ચે મહત્વપૂર્ણ પ્રવાસ
ભારત અને ઈરાન વચ્ચે છેલ્લા કેટલાક મહિનાઓમાં રાજદ્વારી સંપર્ક વધ્યો છે. જુલાઈમાં પીએમ મોદી અને રાષ્ટ્રપતિ પેઝેશ્કિયાન વચ્ચે ટેલિફોનિક વાતચીત થઈ હતી, જેમાં પશ્ચિમ એશિયાની સ્થિતિ અને પ્રાદેશિક શાંતિ પર ચર્ચા થઈ હતી. મોદીએ વાતચીત અને રાજદ્વારી માધ્યમથી ઉકેલ લાવવા તેમજ હોર્મુઝ સ્ટ્રેટ (Strait of Hormuz) માં વાહનવ્યવહાર અને વેપારની સ્વતંત્રતા સુનિશ્ચિત કરવાની જરૂરિયાત પર ભાર મૂક્યો હતો.
