Pakistan news: પાકિસ્તાનમાં ભારે વરસાદ બાદ પૂરે વિનાશ વેર્યો, 307 લોકોનાં મોત, સેંકડો ગુમ
છેલ્લું અપડેટ : 16 Aug 2025
Pakistan news: પાડોશી દેશ પાકિસ્તાનમાં મોંઘવારી, વીજકાપ, અસ્થિર રાજકીય સ્થિતિ બાદ હવે પૂરે દાટ વાળ્યો છે. પાકિસ્તાનના સૌથી અશાંત એવા ખૈબર પખ્તૂનખ્વા વિસ્તારના બુનર જિલ્લામાં ભીષણ તબાહી સર્જાઈ છે. 307થી વધુ લોકો મોતને ભેટયા છે. જેને લઈ તંત્ર દ્વારા રાહત કાર્ય ચાલુ કરાયું છે. પરંતુ કથળેલા હવામાન અને માળખાગત સુવિધાના અભાવે પડકાર વધી ગયો છે. સરકાર અને પાકિસ્તાની સૈન્ય સાથે મળીને લોકોને બચાવી રહ્યા છે અને સ્થિતિ સામાન્ય કરવાનો પ્રયાસ શરૂ કરાયો છે.
છેલ્લા બે દિવસથી ઉત્તર-પશ્ચિમ પાકિસ્તાનમાં ભારે વરસાદ અને પૂરના કારણે ભયંકર વિનાશ થયો છે. સ્થાનિક અધિકારીઓના જણાવ્યા અનુસાર, અત્યાર સુધીમાં 300થી વધુ લોકો મૃત્યુ પામ્યા છે. ઘણા લોકો હજુ પણ ગુમ છે. આ વર્ષના ચોમાસાની ઋતુની સૌથી ઘાતક ઘટના બની છે.
શું થયું?
છેલ્લા બે દિવસમાં ભારે વરસાદ અને પૂરે ખૈબર પખ્તુનખ્વા વિસ્તારમાં તબાહી મચાવી છે. મળતી માહિતી અનુસાર, શનિવાર સવાર સુધી 307 લોકોનાં મોત થયાનું સામે આવ્યું છે. ઘણા લોકો હજુ પણ ગુમ છે. 21 ઓગસ્ટ સુધી વરસાદ ચાલુ રહેવાની વકી છે, જે પરિસ્થિતિને વધુ ખરાબ કરી શકે છે.
પાકિસ્તાનમાં ભારે વરસાદ અને પૂર બાદ થયેલા આ વિનાશ પાછળ વાદળ ફાટવા, પૂર, વીજળી, ભૂસ્ખલન અને ઇમારતો ધરાશાયી થવાના કારણો છે. ગયા અઠવાડિયે ભારે વરસાદ અને પૂરને કારણે માત્ર પાકિસ્તાન જ નહીં, પરંતુ ભારત અને નેપાળના કેટલાક ભાગો પણ પ્રભાવિત થયા છે. સૌથી વધુ અસરગ્રસ્ત વિસ્તાર: બુનેર જિલ્લો પાકિસ્તાનની રાજધાની ઇસ્લામાબાદથી લગભગ ત્રણ કલાક દૂર બુનેર જિલ્લો સૌથી વધુ પ્રભાવિત થયો છે. અહીં 184 લોકોનાં મોત થયા છે.
માળખાગત સુવિધાઓ, પાક અને વાવેતરને વ્યાપક નુકસાન થયું છે. વાદળ ફાટવા, પડી ગયેલા વૃક્ષો અને ભારે પૂરથી લોકો તણાઈ ગયા અને તેમની સંપત્તિનો નાશ થયો. બુનેરમાં હજુ પણ ઘણા લોકો, ખાસ કરીને મહિલાઓ અને બાળકો પૂરના પાણીમાં ફસાયેલા છે, જ્યાંથી 93 મૃતદેહો બહાર કાઢવામાં આવ્યા છે. અન્ય અસરગ્રસ્ત વિસ્તાર, શાંગલા, ભારે વરસાદને કારણે એક ઇમારતની છત તૂટી પડતાં 34 લોકોનાં મોત થયા છે. પ્રાંતીય મુખ્ય સચિવ શાહાબ અલી શાહે જણાવ્યું હતું કે રાહત કાર્ય ઝડપી ગતિએ ચાલી રહ્યું છે.
ભવિષ્યની ચિંતાઓ
અધિકારીઓનું કહેવું છે કે વરસાદ 21 ઓગસ્ટ સુધી ચાલુ રહેવાની શક્યતા છે, જેના કારણે પૂર અને ભૂસ્ખલનનું જોખમ વધી શકે છે. બુનેર અને શાંગલા જેવા વિસ્તારોમાં લોકો હજુ પણ જોખમમાં છે. રસ્તાઓ બંધ થવાને કારણે મદદ પૂરી પાડવામાં મુશ્કેલી પડી રહી છે.