નાઈજીરિયામાં લશ્કરી વિમાન દુર્ઘટનાગ્રસ્ત; ૨૫ મુસાફરો અને ૭ ક્રૂ સભ્યો સહિત ૩૨ લોકોનાં મોત

સોમવારે દક્ષિણ નાઈજીરિયામાં ૨૫ મુસાફરો અને સાત ક્રૂ સભ્યોને લઈ જતું એક લશ્કરી વિમાન દુર્ઘટનાગ્રસ્ત થયું હતું. આ અકસ્માતમાં સવાર તમામ ૩૨ લોકોના મોત થયા હતા. નાઈજીરિયાના રાષ્ટ્રપતિ બોલા તિનુબુએ આ ઘટનાની પુષ્ટિ કરી છે. રાષ્ટ્રપતિ અને વાયુસેનાના જણાવ્યા અનુસાર, આ વિમાન દક્ષિણ નાઈજીરિયાના બેનિન સિટીથી આર્થિક કેન્દ્ર ગણાતા લાગોસ જઈ રહ્યું હતું ત્યારે સવારે ૯:૦૦ વાગ્યા પછી ઓન્ડો રાજ્યના ઈગ્બોકોડા (Igbokoda) ખાતે તે દુર્ઘટનાગ્રસ્ત થયું હતું.

 

તિનુબુની કચેરી દ્વારા જારી કરાયેલા નિવેદનમાં રાષ્ટ્રપતિએ ૨૫ મુસાફરો અને સાત ક્રૂ સભ્યોના પરિવારો પ્રત્યે ઊંડી સંવેદના વ્યક્ત કરી હતી. ઉડ્ડયન મંત્રી ફેસ્ટસ કિયામોએ અગાઉ 'X' (ટ્વિટર) પર જણાવ્યું હતું કે વિમાન નૌકાદળના મથક નજીક દુર્ઘટનાગ્રસ્ત થયું હતું. કિયામો અને તિનુબુ બંનેએ વિમાનની ઓળખ ATR-42 તરીકે કરી હતી - જે ૩૦ થી ૫૦ મુસાફરોને લઈ જવાની ક્ષમતા ધરાવતું ટ્વિન-એન્જિન ટર્બોપ્રોપ વિમાન છે.

 

સોશિયલ મીડિયા પર વાયરલ થયેલા એક વીડિયોમાં નદી કિનારે લોકોનું ટોળું જોવા મળ્યું હતું, જ્યારે બચાવ ટીમો બોટ દ્વારા તે વિસ્તારમાં શોધખોળ કરી રહી હતી. રાષ્ટ્રપતિએ જણાવ્યું હતું કે ભવિષ્યમાં આવી દુર્ઘટનાઓને રોકવા માટે તેમણે નાઈજીરિયન વાયુસેનાને દુર્ઘટનાના કારણની તાત્કાલિક અને ઝીણવટભરી તપાસ શરૂ કરવાનો આદેશ આપ્યો છે.

 

૩૯ વર્ષીય ડાયો અકિન્ટે દુર્ઘટના સ્થળથી લગભગ એક કિલોમીટર દૂર રહે છે. તેમણે AFPને જણાવ્યું કે તેમણે એક અવાજ સાંભળ્યો અને શરૂઆતમાં તેમને લાગ્યું કે વીજળી પડી છે. ડાયોના જણાવ્યા અનુસાર, દુર્ઘટના બાદ તે વિસ્તાર ઉપર ત્રણ વિમાનો ઉડતા જોવા મળ્યા હતા. તેમણે જણાવ્યું હતું કે નજીકના દલદલી વિસ્તારમાં માછીમારી કરવા ગયેલી એક વ્યક્તિએ સ્થાનિક નૌકાદળના મથક અને નગરના લોકોને અકસ્માત વિશે જાણ કરી હતી. ઈગ્બોકોડા દક્ષિણ નાઈજીરિયાના તેલ ઉત્પાદક ક્ષેત્ર ઈલાજે (Ilaje) માં આવેલું છે.