Japan: જાપાનમાં પ્રચંડ 7.6ની તીવ્રતાનો ભૂકંપ, સુનામીની ચેતવણી જાહેર થઈ
છેલ્લું અપડેટ : 08 Dec 2025
Japan: જાપાનના આઓમોરીમાં સોમવારે રાત્રે 11:15 વાગ્યે 7.6 ની તીવ્રતાનો ભૂકંપ આવ્યો હતો, જેના કારણે સુનામીની ચેતવણી આપવામાં આવી છે. યુનાઇટેડ સ્ટેટ્સ જીઓલોજિકલ સર્વે અનુસાર, ભૂકંપ પછી જાપાનના ઉત્તરપૂર્વીય કિનારા પર ત્રણ મીટર (10 ફૂટ) જેટલી ઊંચી સુનામી આવી શકે છે.
USGS મુજબ, ભૂકંપનું કેન્દ્ર બિંદુ ઉત્તર જાપાનના મિસાવા શહેરથી 73 કિલોમીટર પૂર્વ-ઉત્તરપૂર્વમાં હતું. અહેવાલ મુજબ, આઓમોરી, ઇવાતે અને હોક્કાઇડોના દરિયાકાંઠાના વિસ્તારોમાં સુનામીની ચેતવણી આપવામાં આવી. 3 મીટર સુધી સુનામીની ચેતવણી જાહેર કરવામાં આવી હતી. આ વિસ્તારોમાં રહેતા લોકોને તાત્કાલિક ઊંચાણવાળા વિસ્તારમાં જવાની સલાહ આપવામાં આવી છે.
દરમિયાન, જાપાન હવામાન એજન્સી (JMA) અનુસાર, આઓમોરી વિસ્તારના હાચિનોહે શહેરમાં આવેલા ભૂકંપની જાપાની ભૂકંપ સ્કેલ પર મહત્તમ તીવ્રતા 6 નોંધાઈ હતી. JMA અનુસાર, ભૂકંપ આશરે 50 કિલોમીટરની ઊંડાઈએ આવ્યો હતો અને તેની તીવ્રતા 7.6 હતી.
