સાઉદી અરેબિયાના બે એરપોર્ટ અને અરામકો રિફાઇનરી પર હૂથી વિદ્રોહીઓનો મિસાઈલ-ડ્રોન હુમલો: 3 નાગરિકોના મોત, 36 ઘાયલ
છેલ્લું અપડેટ : 08 Oct 2026
સાઉદી અરેબિયાના બે એરપોર્ટ પર હૂથી વિદ્રોહીઓએ ડ્રોન અને મિસાઈલથી હુમલો કર્યો છે. આ હુમલામાં 3 લોકોના મોત થયા છે, અને 36 લોકો ઘાયલ થયા છે. સાઉદી અરેબિયાની જનરલ ઓથોરિટી ઓફ સિવિલ એવિએશન (GACA) એ બુધવારે આ માહિતી આપી હતી. આભા ઈન્ટરનેશનલ એરપોર્ટ અને રિયાધના કિંગ ખાલિદ ઈન્ટરનેશનલ એરપોર્ટને 6 અને 7 ઓક્ટોબરે નિશાન બનાવવામાં આવ્યા હતા. હૂથી વિદ્રોહીઓએ બંને હુમલાઓની જવાબદારી લીધી છે. બીજી તરફ, યમનમાં સાઉદીના નેતૃત્વ હેઠળના ગઠબંધને જણાવ્યું કે, તેમણે હૂથીઓના 80 થી વધુ સૈન્ય ઠેકાણાઓ પર જવાબી કાર્યવાહી કરી છે.
વિદેશી નાગરિકોએ હુમલામાં જીવ ગુમાવ્યો
આભા એરપોર્ટ પર થયેલા હુમલામાં મોરોક્કો અને અલ્જીરિયાની બે મહિલા નાગરિકોના મોત થયા હતા, અને 28 લોકો ઘાયલ થયા હતા, જેમાં સાઉદી, બાંગ્લાદેશી અને ફિલિપાઈન્સના નાગરિકો સામેલ છે. કિંગ ખાલિદ ઈન્ટરનેશનલ એરપોર્ટ પર એક સુડાની નાગરિકનું મોત થયું હતું, અને 8 લોકો ઘાયલ થયા હતા, જેમાં 5 સાઉદી નાગરિક, 2 ઇજિપ્તના નિવાસી અને એક પાકિસ્તાની નિવાસી સામેલ છે. GACA એ જણાવ્યું કે, તમામ ઘાયલોને હોસ્પિટલ પહોંચાડવામાં આવ્યા છે, અને મુસાફરોની સુરક્ષા માટે જરૂરી પગલાં લેવામાં આવી રહ્યા છે.
અરામકો રિફાઇનરી પર હુમલાનો દાવો
હૂથી સૈન્ય પ્રવક્તા યાહ્યા સરીએ રબીગ સ્થિત વિશ્વની સૌથી મોટી તેલ રિફાઇનરી અરામકો પર હુમલા સહિત સાઉદી અરેબિયામાં અનેક સ્થળોએ મિસાઈલ અને ડ્રોન હુમલા કરવાની જવાબદારી સ્વીકારી હતી. પ્રથમ હુમલામાં રિયાધના કિંગ ખાલિદ ઈન્ટરનેશનલ એરપોર્ટને, બીજા હુમલામાં રબીગ સ્થિત અરામકો તેલ રિફાઇનરીને અને ત્રીજા હુમલામાં આભા એરપોર્ટ, ખમિસ મુશૈત એરબેઝ અને અસીર પ્રદેશના અકીફા કેમ્પને નિશાન બનાવવાનો દાવો કરવામાં આવ્યો હતો.
સાઉદીએ યમનમાં મિસાઈલ લોન્ચિંગ સાઈટ નષ્ટ કરી
આ દરમિયાન સાઉદી અરેબિયાના નેતૃત્વ હેઠળના ગઠબંધને દાવો કર્યો હતો કે, તેમણે રિયાધ પર હુમલા માટે ઉપયોગમાં લેવાયેલા બેલિસ્ટિક મિસાઈલ લોન્ચ પ્લેટફોર્મને યમનની રાજધાની સનામાં નષ્ટ કરી દીધું છે.
યમનમાં હૂથીઓ સામે સૈન્ય અભિયાન ચાલુ
યમન સરકાર સાઉદી અરેબિયાના સમર્થનથી હૂથી વિદ્રોહીઓ સામે સૈન્ય અભિયાન ચલાવી રહી છે. 5 ઓક્ટોબરે સાઉદી સમર્થિત યમન સેનાએ બાબ અલ-મંદેબ અને મોચા શહેર જેવા મહત્વના વિસ્તારો પર ફરીથી કબજો મેળવવાનો દાવો કર્યો છે. આ સંઘર્ષમાં અત્યાર સુધીમાં 270 થી વધુ સરકારી સૈનિકો અને હૂથી લડવૈયાઓના મોત થયા છે.
