કૈલાશ માનસરોવર યાત્રામાં વિઘ્ન: નેપાળમાં ફસાયા 52 ભારતીય શ્રદ્ધાળુઓ, વિદેશ મંત્રાલયે જાહેર કરી નવી એડવાઇઝરી
છેલ્લું અપડેટ : 28 Jun 2026
નેપાળના રસ્તે કૈલાશ માનસરોવર યાત્રા (Kailash Mansarovar Yatra) માટે નીકળેલા 52 ભારતીય શ્રદ્ધાળુઓ ટ્રાવેલ ડોક્યુમેન્ટ્સ પૂરા ન હોવાને કારણે નેપાળમાં ફસાયા છે. આ ગંભીર પરિસ્થિતિને ધ્યાનમાં રાખીને ભારત સરકારના વિદેશ મંત્રાલયે (Ministry of External Affairs - MEA) આ રૂટ પરથી જતા મુસાફરો માટે એક નવી એડવાઇઝરી (Advisory) જાહેર કરી છે. મંત્રાલયે એક નિવેદન જાહેર કરીને શ્રદ્ધાળુઓને વિનંતી કરી છે કે તેઓ કોઈપણ ખાનગી ટૂર ઓપરેટર સાથે મુસાફરી શરૂ કરતા પહેલા પોતાના તમામ દસ્તાવેજો અને ઓપરેટરના રજીસ્ટ્રેશનની યોગ્ય તપાસ કરી લે.
ડોક્યુમેન્ટ્સ પૂરા ન થાય ત્યાં સુધી ભારત છોડવું નહીં
વિદેશ મંત્રાલય દ્વારા સ્પષ્ટપણે કહેવામાં આવ્યું છે કે જરૂરી દસ્તાવેજો જેવા કે પરમિટ (Permits) અને વિઝા (Visas) મેળવ્યા વિના માત્ર આશાના આધારે યાત્રા શરૂ કરવી યોગ્ય નથી. આનાથી રસ્તામાં ફસાઈ જવાની શક્યતા વધી જાય છે. તેથી તમામ પ્રક્રિયાઓ સુનિશ્ચિત થયા પછી જ ભારતમાંથી પોતાની યાત્રા શરૂ કરવી. ઉલ્લેખનીય છે કે, નેપાળના રસ્તે કૈલાશ માનસરોવરની યાત્રા લાંબા સમયથી ચાલી આવે છે. તાજેતરમાં જ ભારત અને ચીન વચ્ચે પરસ્પર સહમતિ બન્યા બાદ અન્ય બે રૂટ પરથી પણ આ યાત્રા શરૂ કરવામાં આવી છે અને થોડા દિવસો પહેલા જ વર્ષ 2026 નો પહેલો જથ્થો ચીન માટે રવાના થયો હતો.
સાંસદ સુપ્રિયા સુલેએ ઉઠાવ્યો આ મુદ્દો
નેપાળમાં ફસાયેલા આ 52 ભારતીયોનો મુદ્દો સૌથી પહેલા રાષ્ટ્રવાદી કોંગ્રેસ પાર્ટી (શરદ પવાર) ના સાંસદ સુપ્રિયા સુલેએ ઉઠાવ્યો હતો. તેમણે વિદેશ મંત્રાલયને ચીન અને નેપાળમાં આવેલા ભારતીય દૂતાવાસો (Embassies) નો સંપર્ક કરીને આ શ્રદ્ધાળુઓને તાત્કાલિક મદદ પૂરી પાડવા અપીલ કરી હતી.
સોશિયલ મીડિયા પ્લેટફોર્મ 'X' પર એક પોસ્ટમાં સુલેએ લખ્યું, "કૈલાશ માનસરોવર યાત્રા પર ગયેલા અંદાજે 52 ભારતીય નાગરિકો અત્યારે નેપાળના કાઠમંડુમાં ફસાયેલા છે. તેમને તાત્કાલિક સહાયની જરૂર છે." તેમણે વિદેશ મંત્રી એસ. જયશંકરને વિનંતી કરીને મુસાફરોની સુરક્ષા અને તેમના ખાવા-પીવાની વ્યવસ્થા અંગે ચિંતા વ્યક્ત કરી હતી.
કૈલાશ માનસરોવર યાત્રાના 3 મુખ્ય રૂટ
આ ઘટના એવા સમયે સામે આવી છે જ્યારે થોડા દિવસો પહેલા જ 20 જૂને ભારત-ચીન સરહદ પર નાથુલા પાસ (Nathu La Pass) ના રસ્તે કૈલાશ માનસરોવર યાત્રા 2026 શરૂ થઈ ચૂકી છે અને શ્રદ્ધાળુઓનો પહેલો જથ્થો ચીનમાં પ્રવેશ કરી ચૂક્યો છે. કૈલાશ માનસરોવરની યાત્રા માટે મુખ્યત્વે 3 રસ્તાઓનો ઉપયોગ થાય છે:
લિપુલેખ પાસ માર્ગ (Lipulekh Pass Route): જેના પર નેપાળ દ્વારા કેટલાક સવાલો ઉઠાવવામાં આવી રહ્યા છે.
નાથુલા પાસ માર્ગ (Nathu La Pass Route): જેના દ્વારા તાજેતરમાં જ સત્તાવાર રીતે ફરીથી યાત્રા શરૂ કરવામાં આવી છે.
નેપાળ રૂટ (Via Nepal Route): આ રસ્તે મુખ્યત્વે પ્રાઇવેટ ટૂર ઓપરેટરો (Private Tour Operators) શ્રદ્ધાળુઓને લઈને જતા હોય છે, જ્યાં હાલમાં આ મુશ્કેલી ઊભી થઈ છે.
