કોંગોમાં મોટી દુર્ઘટના, કિવુ તળાવમાં વેપારીઓથી ભરેલી બોટ પલટી જતાં 12ના મોત, અનેક લાપતા થતાં શોધખોળ તેજ
છેલ્લું અપડેટ : 27 Sept 2026
પૂર્વ કાંગોમાં લેક કિવુ (કિવુ તળાવ) ખાતે વેપારીઓને લઈને જઈ રહેલી એક બોટ પલટી જતાં ગંભીર દુર્ઘટના સર્જાઈ છે. આ અકસ્માતમાં ઓછામાં ઓછા 12 લોકોનાં મોત થયાં છે, જ્યારે મોટી સંખ્યામાં મુસાફરો હજુ પણ લાપતા હોવાથી શોધખોળ ચાલી રહી છે.
બોટમાં 50થી વધુ લોકો સવાર હતા
કિસ્કેહે ગામના વડા ફેલિક્સ હાબિરાગીના જણાવ્યા મુજબ, બોટમાં 50થી વધુ લોકો સવાર હતા. આ અકસ્માત દક્ષિણ કિવુ પ્રાંતના ઇદજ્વી વિસ્તારમાં બન્યો હતો. ઘટના બાદ તાત્કાલિક રાહત અને બચાવ કાર્ય શરૂ કરવામાં આવ્યું હતું. સ્થાનિક અધિકારીઓએ જણાવ્યું કે અત્યાર સુધીમાં આશરે 15 લોકોને સુરક્ષિત રીતે બહાર કાઢી લેવાયા છે, પરંતુ હજુ પણ ઘણા લોકો ગુમ હોવાથી મૃત્યુઆંક વધવાની આશંકા છે.
અકસ્માતનું કારણ હજુ અસ્પષ્ટ
બોટ કયા કારણોસર પલટી ગઈ તે અંગે હજુ સુધી કોઈ ચોક્કસ માહિતી મળી શકી નથી અને તંત્ર દ્વારા ઘટનાની તપાસ કરવામાં આવી રહી છે. લેક કિવુમાં આ પહેલાં પણ આવી બોટ દુર્ઘટનાઓ સામે આવતી રહી છે, જેમાં ક્ષમતા કરતાં વધુ મુસાફરો ભરવા અને સુરક્ષા વ્યવસ્થાના અભાવ જેવા પ્રશ્નો વારંવાર સામે આવતા રહ્યા છે.