Video: ફ્રાન્સમાં મોંઘવારી વિરોધ બન્યો હિંસક: પેરિસ સહિતના શહેરોમાં લક્ઝરી સ્ટોર્સમાં લૂંટફાટ, 1200થી વધુની ધરપકડ
ફ્રાન્સમાં વધતા જીવનનિર્વાહ ખર્ચ સામે લોકો રસ્તા પર ઉતરી આવ્યા હતા, પરંતુ આ વિરોધ પ્રદર્શને ઝડપથી હિંસક સ્વરૂપ ધારણ કરી લીધું હતું. જેમાં તોફાનીઓએ અનેક શહેરોમાં લક્ઝરી રિટેલ સ્ટોર્સ અને સુપરમાર્કેટોને નિશાન બનાવ્યા હતા. ફ્રેન્ચ અખબારના જણાવ્યા અનુસાર, નકાબપોશ લોકોના મોટા જૂથોએ પેરિસ, માર્સેલી, બોર્દો અને લિલી જેવા શહેરોમાં સ્ટોર્સના કાચ તોડી નાખ્યા હતા અને સામાનની લૂંટ ચલાવી હતી. મીડિયા અહેવાલો મુજબ, બોર્દોમાં એપલ સ્ટોર તેમજ લુઈ વિટન શોપ્સને નિશાન બનાવવામાં આવ્યા હતા, જ્યારે લિલી શહેરમાં અન્ય એક એપલ આઉટલેટમાં લૂંટ ચલાવવામાં આવી હતી. ફ્રેન્ચ ન્યૂઝ આઉટલેટ 'મેરીટિમા' અનુસાર, માર્સેલીમાં હર્મેસ બુટિકને ભીડ દ્વારા નિશાન બનાવીને લૂંટી લેવામાં આવ્યું હતું.
સોશિયલ મીડિયા પ્લેટફોર્મ પર શેર કરવામાં આવેલા ફોટા અને વીડિયોમાં નકાબપોશ પ્રદર્શનકારીઓ દુકાનોમાં ઘૂસીને મોંઘા સામાન સાથે ભાગતા જોવા મળ્યા હતા.
લક્ઝરી સ્ટોર્સ ઉપરાંત અનેક સુપરમાર્કેટ્સ, કપડાંના શોરૂમ અને દવાની દુકાનોને પણ નિશાન બનાવવામાં આવ્યા હતા. સરકારી સંપત્તિને ભારે નુકસાન પહોંચાડવામાં આવ્યું હતું, જેમાં અનિયંત્રિત ટોળાઓએ લ્યોન અને માર્સેલીના ટાઉન હોલ તેમજ લિમોગ્સની એક ઐતિહાસિક ઈમારત સહિતના મહાનગરપાલિકાના ભવનો પર હુમલા કર્યા હતા. ડઝનબંધ વાહનોને આગ ચાંપી દેવામાં આવી હતી અને સરકારી કચેરીઓમાં તોડફોડ કરવામાં આવી હતી.
ફ્રાન્સમાં વિરોધ પ્રદર્શનો
આંતરિક બાબતોના મંત્રી લોરેન્ટ નુનેઝે જણાવ્યું હતું કે સમગ્ર દેશમાં આશરે 5,50,000 લોકોએ પ્રદર્શનોમાં ભાગ લીધો હતો. ન્યૂઝ એજન્સી રોઇટર્સના અહેવાલ મુજબ, આશરે 1,200 લોકોની ધરપકડ કરવામાં આવી હતી. જ્યારે 'CGT' યુનિયને રોઇટર્સને જણાવ્યું હતું કે પ્રદર્શનકારીઓની સંખ્યા આશરે 8,00,000 જેટલી હતી.
યુએનએસએ (UNSA) પોલીસ યુનિયને X (ટ્વિટર) પર એક વીડિયો પોસ્ટ કર્યો હતો, જેમાં ટોળાં અનેક સ્થળોએ પોલીસ વાન પર લાકડીઓ અને ઈંટો વડે હુમલો કરતા જોવા મળ્યા હતા. યુનિયને જણાવ્યું કે, "આજે ફરી એકવાર ફ્રાન્સના ખૂણે-ખૂણે અમારા સાથીઓનો પંચિંગ બેગ તરીકે ઉપયોગ થઈ રહ્યો છે. તેમના પર પથ્થરમારો કરવામાં આવી રહ્યો છે, તેઓ ઈજાગ્રસ્ત થયા છે અને વાસ્તવિક ઓચિંતા હુમલાઓમાં ફસાયા છે. દરેક વ્યક્તિએ પોતાની જવાબદારી સ્વીકારવી જોઈએ: આ અનિશ્ચિત સમય સુધી ચાલી શકે નહીં. સહનશક્તિની હદ હવે વટાવી ચૂકી છે."
ફ્રાન્સના રાષ્ટ્રપતિ ઇમેન્યુઅલ મેક્રોને આવા હુમલા કરનારાઓને સજા કરવાની ખાતરી આપી હતી. તેમણે X પરની એક પોસ્ટમાં લખ્યું: "અમે અરાજકતા ફેલાવનારાઓ સામે એક થઈને ઊભા રહીશું, જેઓ માત્ર આપણી સંસ્થાઓને નુકસાન પહોંચાડવા માંગે છે અને શાંતિપૂર્ણ રીતે પોતાની માંગણીઓ રજૂ કરનારા લોકોને તેમ કરતા અટકાવે છે."
