અમેરિકાની ધરતી પર ગૂંજશે ગુજરાતનો જયઘોષ, ભૂપેન્દ્ર પટેલના સન્માનમાં ભવ્ય કાર્યક્રમ
છેલ્લું અપડેટ : 22 Aug 2026
ન્યૂ જર્સીમાં ગુજરાત અને અમેરિકામાં વસતા ગુજરાતીઓ માટે એક ઐતિહાસિક ક્ષણ સર્જાવા જઈ રહી છે. ગુજરાતના મુખ્યમંત્રી ભૂપેન્દ્ર પટેલના સન્માનમાં પ્રથમ વખત ગુજરાતી મૂળના ન્યૂ જર્સીના બે વર્તમાન મેયર એક જ મંચ પર સામુદાયિક સ્વાગત સમારોહનું સહ-આયોજન કરી રહ્યા છે.
એડિસનના મેયર સેમ જોશી (Sam Joshi) અને પાર્સિપ્પની-ટ્રોય હિલ્સના મેયર પુલકિત દેસાઈ (Pulkit Desai) દ્વારા આ કાર્યક્રમનું આયોજન કરવામાં આવ્યું છે.
2,000 જેટલા ગુજરાતીઓ એકઠા થશે
શનિવાર, 22 ઓગસ્ટે કાર્ટેરેટ પરફોર્મિંગ આર્ટ્સ સેન્ટર (Carteret Performing Arts Center), કાર્ટેરેટ, ન્યૂ જર્સીમાં યોજાનારા આ કાર્યક્રમમાં ગુજરાતી અમેરિકન સમુદાયના આશરે 2,000 સભ્યો હાજરી આપે તેવી અપેક્ષા છે.
‘ગરવી ગુજરાત, ગ્લોબલ ન્યૂ જર્સી’ (Garvi Gujarat, Global New Jersey) નામના આ કાર્યક્રમને ભારતીય-અમેરિકન સમુદાયના સ્પોન્સર્સ દ્વારા ખાનગી રીતે ફંડ કરવામાં આવ્યો છે અને તે સામાન્ય લોકો માટે નિઃશુલ્ક ખુલ્લો રહેશે.
ગુજરાતથી ન્યૂ જર્સી સુધીની સફરની ઉજવણી
આ કાર્યક્રમ માત્ર મુખ્યમંત્રીના સ્વાગત પૂરતો મર્યાદિત નથી. ન્યૂ જર્સીમાં ગુજરાતી-અમેરિકન સમુદાયે બિઝનેસ, સંસ્થાઓ ઉપરાંત સામાજિક અને રાજકીય ક્ષેત્રમાં બનાવેલી પોતાની આગવી ઓળખની પણ આ ઉજવણી છે.
ગુજરાતી મૂળના લોકો અનેક પેઢીઓથી અમેરિકામાં વસવાટ કરી રહ્યા છે અને પોતાની ભાષા, સંસ્કૃતિ તથા પરંપરાઓને જીવંત રાખી રહ્યા છે. આ કાર્યક્રમને ગુજરાત અને અમેરિકામાં વસતા ગુજરાતીઓ વચ્ચેના મજબૂત જોડાણના પ્રતીક તરીકે જોવામાં આવી રહ્યો છે.
કાર્યક્રમમાં સાંસ્કૃતિક રજૂઆતો (Cultural Performances), સમુદાયના આગેવાનોના સંબોધન અને મુખ્યમંત્રી ભૂપેન્દ્ર પટેલનું મુખ્ય વક્તવ્ય (Keynote Address) સામેલ રહેશે.
ગુજરાતથી ન્યૂ જર્સી સુધી—આ માત્ર સ્વાગત સમારોહ નહીં, પરંતુ ગુજરાતી ગૌરવ અને એકતાની ઐતિહાસિક ઉજવણી બનવા જઈ રહી છે.
