VIDEO: સોનાની ખાણ અચાનક ધસી પડતાં 30 ખનિકોના મોત, અનેક લાપતા
છેલ્લું અપડેટ : 19 Aug 2026
બાંગુઈ: સેન્ટ્રલ આફ્રિકન રિપબ્લિક (Central African Republic)ના પશ્ચિમ વિસ્તારમાં સોનાની એક પરંપરાગત ખાણ (Gold Mine) અચાનક ધસી પડતાં મોટો અકસ્માત સર્જાયો છે. આ દુર્ઘટનામાં ઓછામાં ઓછા 30 ખનિકોના મોત થયા હોવાની માહિતી સામે આવી છે, જ્યારે અનેક અન્ય લોકો હજુ પણ કાટમાળ નીચે ફસાયેલા હોવાની આશંકા છે. અકસ્માત બાદ ઘટનાસ્થળે રાહત અને બચાવ કામગીરી (Rescue Operation) શરૂ કરવામાં આવી છે.
નાન-મામ્બેરે પ્રીફેક્ચરના અબ્બા વિસ્તારમાં દુર્ઘટના
આ દુર્ઘટના સેન્ટ્રલ આફ્રિકન રિપબ્લિકના પશ્ચિમ ભાગમાં આવેલા નાન-મામ્બેરે પ્રીફેક્ચર (Nana-Mambéré Prefecture)ના અબ્બા વિસ્તારમાં બની હોવાનું જણાવાયું છે. અહીં મોટી સંખ્યામાં લોકો નાના પાયે પરંપરાગત રીતે સોનાનું ખનન (Traditional Mining) કરે છે.
અકસ્મિક રીતે ખાણનો મોટો ભાગ ધરાશાયી થતાં અંદર કામ કરી રહેલા ખનિકો કાટમાળમાં દટાઈ ગયા હતા. ઘટનાની જાણ થતાં સ્થાનિક લોકો અને બચાવકર્મીઓ સ્થળ પર પહોંચ્યા હતા અને કાટમાળ હટાવવાની કામગીરી શરૂ કરી હતી.
ખાણમાંથી 30 મૃતદેહ બહાર કાઢવામાં આવ્યા
અધિકારીઓના જણાવ્યા અનુસાર, બચાવકર્મીઓ અને સ્થાનિક લોકોએ કલાકો સુધી મહેનત કર્યા બાદ ખાણમાંથી 30 મૃતદેહ બહાર કાઢ્યા છે. કેટલાક ઘાયલ ખનિકોને નજીકની હોસ્પિટલમાં સારવાર માટે ખસેડવામાં આવ્યા છે. હાલમાં પણ રેસ્ક્યૂ ઓપરેશન ચાલુ છે. જોકે, લાંબો સમય વીતી રહ્યો હોવાથી કાટમાળ નીચે ફસાયેલા લોકોના જીવિત બચવાની સંભાવના અંગે ચિંતા વધી રહી છે.
સ્થાનિક ઉપમેયર સુલેમાન બી.એ આ ઘટનાને અત્યંત ભયાનક ગણાવી હતી અને બચાવ કામગીરી માટે સ્વયંસેવક સંગઠનો (Voluntary Organizations) તથા સ્થાનિક લોકો પાસેથી પણ મદદની અપીલ કરી હતી.
ઘટનાસ્થળે અફરાતફરીનો માહોલ
અકસ્મત બાદ ઘટનાસ્થળના સામે આવેલા વીડિયો (Footage)માં ભારે અફરાતફરી જોવા મળી રહી છે. કાદવથી લથપથ ખનિકો અને સ્થાનિક લોકો કાટમાળમાંથી મૃતદેહ બહાર કાઢતા જોવા મળે છે.
વિશાળ ખાણ વિસ્તારની આસપાસ મોટી સંખ્યામાં લોકો એકઠા થયા હતા. કેટલાક લોકો પોતાના સાથીદારો અને પરિવારજનોને શોધી રહ્યા હતા, જ્યારે બચાવકર્મીઓ કાટમાળ હટાવીને અંદર ફસાયેલા લોકોને શોધવાનો પ્રયાસ કરી રહ્યા હતા.
પરંપરાગત ખનનને કારણે જોખમ વધુ
સેન્ટ્રલ આફ્રિકન રિપબ્લિકમાં નાના પાયે પરંપરાગત સોનાનું ખનન સામાન્ય બાબત છે. જોકે, આવા ખનન વિસ્તારોમાં સુરક્ષા વ્યવસ્થા (Safety Measures) ઘણી વખત પૂરતી હોતી નથી.
ખનિકો પાસે આધુનિક મશીનરી (Modern Equipment) અને સુરક્ષા સાધનોનો અભાવ હોવાને કારણે ખાણ ધસી પડવા જેવી ઘટનાઓમાં જાનહાનિનું જોખમ ખૂબ વધી જાય છે. ખાણમાં યોગ્ય ટેકનિકલ દેખરેખ અને મજબૂત માળખાકીય વ્યવસ્થા ન હોવાને કારણે આવા અકસ્માતો જીવલેણ બની શકે છે.
સરકાર દ્વારા મૃતકોના પરિવારજનો પ્રત્યે સંવેદના
સરકારના પ્રવક્તા એવરિસ્ટ નગામાનાએ અકસ્માતમાં જીવ ગુમાવનારા ખનિકોના પરિવારજનો પ્રત્યે સંવેદના વ્યક્ત કરી છે. તેમણે જણાવ્યું કે સરકાર અસરગ્રસ્ત લોકોને જરૂરી રાહત અને સહાય (Relief and Assistance) પહોંચાડવા માટે કામગીરી કરી રહી છે.
હાલમાં મુખ્ય ધ્યાન કાટમાળ નીચે ફસાયેલા લોકોને શોધવા અને તેમને સુરક્ષિત રીતે બહાર કાઢવા પર છે.
અગાઉ પણ બની ચૂક્યા છે આવા ખાણ અકસ્માત
સેન્ટ્રલ આફ્રિકન રિપબ્લિક ઉપરાંત આફ્રિકાના અનેક દેશોમાં ગેરકાયદેસર અથવા નાના પાયે થતું સોનાનું ખનન ગંભીર અકસ્માતોનું કારણ બનતું રહ્યું છે. જાન્યુઆરી 2025માં દક્ષિણ આફ્રિકામાં પણ એક સોનાની ખાણમાં મોટી દુર્ઘટના બની હતી, જેમાં લાંબા સમય સુધી ખાણમાં ફસાયેલા અનેક ગેરકાયદેસર ખનિકોના મોત થયા હતા.
સેન્ટ્રલ આફ્રિકન રિપબ્લિકની તાજી ઘટનાએ ફરી એકવાર ખાણકામ સાથે જોડાયેલા કામદારોની સુરક્ષા (Worker Safety) અને પરંપરાગત ખનન વિસ્તારોમાં જરૂરી સુરક્ષા ધોરણો અંગે ગંભીર સવાલો ઊભા કર્યા છે.
