ફ્રાન્સમાં વિરોધ પ્રદર્શન વચ્ચે 135 લોકોની ધરપકડ, કટાના સહિત વિવિધ હથિયારો જપ્ત

ફ્રાન્સમાં દેશવ્યાપી વિરોધ પ્રદર્શનો દરમિયાન સંભવિત હિંસા રોકવા માટે પોલીસે કાર્યવાહી કરતાં 135 લોકોની ધરપકડ કરી છે. સુરક્ષા દળોએ વિવિધ પ્રકારનાં હથિયારો પણ જપ્ત કર્યાં છે. ફ્રાન્સના ગૃહમંત્રી લોરાં નુનેઝે શનિવારે આ માહિતી આપતાં જણાવ્યું હતું કે અત્યાર સુધી કોઈ મોટી હિંસક ઘટના બની નથી.

કટાના સહિત અનેક વસ્તુઓ જપ્ત

ગૃહમંત્રીના જણાવ્યા અનુસાર, પોલીસ દ્વારા જપ્ત કરાયેલી વસ્તુઓમાં ધાતુના ગોળા, સીસાની ગોળીઓ, ફટાકડા, સ્લિંગશોટ, સ્ટીલના ગોળા, હાથેથી બનાવાયેલાં શસ્ત્રો, કટાના નામની જાપાની તલવાર અને એર સોફ્ટ હથિયારોનો સમાવેશ થાય છે. વિરોધ પ્રદર્શનો દરમિયાન ફરી હિંસા ન ફેલાય તે માટે પોલીસને દેશભરમાં તૈનાત કરવામાં આવી હતી. અધિકારીઓને જાહેર સ્થળોએ કાયદો અને વ્યવસ્થા જાળવવા તથા કોઈપણ અશાંતિને અટકાવવાના નિર્દેશ આપવામાં આવ્યા હતા.

હિંસા અટકાવવા સુરક્ષા વ્યવસ્થા કડક

ફ્રાન્સમાં અગાઉ થયેલી શેરી હિંસાની ઘટનાઓને ધ્યાનમાં રાખીને આ વખતે પોલીસને વિશેષ સતર્ક રહેવા સૂચના આપવામાં આવી હતી. ગૃહમંત્રી નુનેઝે જણાવ્યું કે અત્યાર સુધી કોઈ મોટી ઘટના નોંધાઈ નથી. જોકે, વિરોધ પ્રદર્શનો દરમિયાન શાંતિ જળવાઈ રહે તે માટે સુરક્ષા દળો સતત નજર રાખી રહ્યાં છે. પોલીસની કાર્યવાહી દરમિયાન 135 લોકોની ધરપકડ અને વિવિધ હથિયારોની જપ્તીથી પ્રદર્શન સ્થળોએ સુરક્ષા વ્યવસ્થાની ગંભીરતા સામે આવી છે.