VIDEO: ANDARNI VAAT / રુદ્રપ્રયાગમાં કુદરતનું રૌદ્ર સ્વરૂપ, મંદાકિની-અલકનંદાના સંગમ પર જળસ્તર વધતા હાઈ એલર્ટ!

ઉત્તરાખંડના રુદ્રપ્રયાગમાં છેલ્લા કેટલાક સમયથી થઈ રહેલા સતત વરસાદના કારણે મંદાકિની અને અલકનંદા નદીના પવિત્ર સંગમ સ્થળ પર પાણીની સપાટીમાં ચિંતાજનક વધારો થયો છે. પહાડી વિસ્તારોમાં પડેલા ભારે વરસાદને પગલે બંને નદીઓ પ્રચંડ વેગ સાથે વહી રહી છે, જેના કારણે સંગમ ઘાટના કિનારાના વિસ્તારો પાણીમાં ગરકાવ થઈ ગયા છે. નદીઓનો પ્રવાહ અત્યંત ઝડપી અને જોખમી બન્યો હોવા છતાં, દેશભરમાંથી આવતા શ્રદ્ધાળુઓ આ પવિત્ર સ્થળે આસ્થાની ડૂબકી લગાવવા પહોંચી રહ્યા છે. જોકે, વર્તમાન પરિસ્થિતિને જોતાં પ્રશાસન અને સ્થાનિક લોકો દ્વારા ભારે સતર્કતા રાખવામાં આવી રહી છે.

નદીઓના વધતા જળસ્તર અને તેજ પ્રવાહને ધ્યાનમાં રાખીને, વહીવટી તંત્ર અને વરિષ્ઠ શ્રદ્ધાળુઓ દ્વારા અહીં આવતા અન્ય તમામ યાત્રીઓને પવિત્ર સ્નાન કરતી વખતે અત્યંત સાવધાની રાખવાની સલાહ આપવામાં આવી રહી છે. ઘાટ પર તૈનાત સુરક્ષાકર્મીઓ અને સ્થાનિક તીર્થ પુરોહિતો દ્વારા લોકોને નદીના ઉંડા પાણીમાં ન જવા અને માત્ર કિનારે રહીને જ પૂજાવિધિ સંપન્ન કરવા સૂચના આપવામાં આવી રહી છે. વરસાદી માહોલ હજુ પણ યથાવત હોવાથી તંત્ર દ્વારા સમગ્ર સંગમ વિસ્તાર પર ચુસ્ત દેખરેખ રાખવામાં આવી રહી છે, જેથી કોઈ અણધારી હોનારત કે અકસ્માતને ટાળી શકાય.

બ્યૂરો રિપોર્ટ જીએસટીવી