VIDEO: ANDARNI VAAT / જલપાઈગુડીમાં હીટવેવનો હાહાકાર, અસહ્ય ગરમીથી બચવા લોકોએ પકડ્યો દાર્જિલિંગની પહાડીઓનો રસ્તો!

પશ્ચિમ બંગાળના જલપાઈગુડી સહિત મેદાની વિસ્તારોમાં હાલમાં અસહ્ય ગરમી અને હીટવેવનો પ્રકોપ જોવા મળી રહ્યો છે. પારો સતત ઊંચો જઈ રહ્યો હોવાથી અને બફારાના કારણે સ્થાનિક લોકોનું જીવવું મુશ્કેલ બની ગયું છે. આ કાળઝાળ ગરમી અને ઉકળાટથી તાત્કાલિક રાહત મેળવવા માટે જલપાઈગુડી અને તેની આસપાસના વિસ્તારોના લોકો મોટી સંખ્યામાં નજીક આવેલા દાર્જિલિંગના હિલ સ્ટેશનો તરફ પ્રયાણ કરી રહ્યા છે. દાર્જિલિંગના પહાડી વિસ્તારોનું ખુશનુમા અને ઠંડુ વાતાવરણ લોકોને આ આકરી ગરમીમાંથી મોટી રાહત અપાવી રહ્યું છે, જેના કારણે ત્યાં પ્રવાસીઓનો ભારે ધસારો જોવા મળી રહ્યો છે.

મેદાની વિસ્તારોના રહીશો વીકેન્ડ તેમજ રજાના દિવસોમાં પરિવાર સાથે દાર્જિલિંગ હિલ્સના વિવિધ પર્યટન સ્થળોએ પહોંચીને ઠંડકનો અહેસાસ માણી રહ્યા છે. મીડિયા સમક્ષ પ્રવાસીઓએ જણાવ્યું હતું કે, જલપાઈગુડીમાં ગરમીએ માઝા મૂકી છે અને ઘરમાં રહેવું પણ અશક્ય બન્યું હતું, ત્યારે દાર્જિલિંગની પહાડીઓ તેમના માટે આશીર્વાદરૂપ સાબિત થઈ રહી છે. પ્રવાસીઓના આ અણધાર્યા ધસારાને પગલે દાર્જિલિંગના સ્થાનિક પ્રવાસન ઉદ્યોગ, હોટેલ વ્યવસાયીઓ અને ટેક્સી ચાલકોમાં પણ ભારે ઉત્સાહ જોવા મળી રહ્યો છે. ગરમીથી બચવા માટે હિલ સ્ટેશનો તરફ પલાયન કરવાનો આ ટ્રેન્ડ હાલમાં ખૂબ જ વધી રહ્યો છે.

બ્યૂરો રિપોર્ટ જીએસટીવી