VIDEO: પશ્ચિમ બંગાળમાં ભાજપની જીત પર અસદુદ્દીન ઓવૈસીની પ્રતિક્રિયા
છેલ્લું અપડેટ : 06 May 2026
ઓલ ઈન્ડિયા મજલિસ-એ-ઇત્તેહાદુલ મુસ્લિમીનના પ્રમુખ અસદુદ્દીન ઓવૈસીએ પશ્ચિમ બંગાળ વિધાનસભા ચૂંટણીના પરિણામ પર પ્રતિક્રિયા આપતાં કહ્યું કે, લોકોએ ભાજપની તરફેણમાં આપેલા નિર્ણયનું સન્માન કરવું જોઈએ.
અસદુદ્દીન ઓવૈસીએ જણાવ્યું કે, પશ્ચિમ બંગાળના લોકોએ ભાજપને સત્તા આપી છે. આપણે આ નિર્ણયનું સન્માન કરવું પડશે. આ લોકોનો નિર્ણય છે. તેમણે કહ્યું કે, કહેવાતા ધર્મનિરપેક્ષ પક્ષો ભાજપના વિસ્તારને રોકી શક્યા નહિ. AIMIM પ્રમુખ ઓવૈસીએ પશ્ચિમ બંગાળમાં પાર્ટીને મત આપનારા મતદારોનો આભાર માન્યો. જોકે, આ ચૂંટણીમાં AIMIMનો કોઈ ઉમેદવાર જીત્યો નથી.
તેમણે દિલ્હીની આપ, મહારાષ્ટ્રની શિવસેના અને એનસીપી તેમજ પશ્ચિમ બંગાળની તૃણમૂલ કોંગ્રેસ પર સોફ્ટ હિન્દુત્વની રાજનીતિ રમવાનો આરોપ લગાવ્યો. ઓવૈસીએ કહ્યું કે, મુસ્લિમ સમુદાયે સ્વતંત્ર રાજકીય નેતૃત્વ વિકસાવવા પર ભાર મૂકવો જોઈએ. ભાજપે પશ્ચિમ બંગાળ વિધાનસભા ચૂંટણીમાં 207 બેઠકો જીતીને ઈતિહાસ રચ્યો છે અને તૃણમૂલ કોંગ્રેસના 15 વર્ષના શાસનનો અંત આવ્યો છે. આ જીત સાથે ભાજપે બે તૃતીયાંશથી વધુ બહુમતી મેળવી છે.
