VIDEO: ANDAR NI VAAT/ જમ્મુ-કાશ્મીરમાં કુદરતનો પ્રકોપ! ઉધમપુરમાં કાળઝાળ ગરમી વચ્ચે જંગલોમાં ભભૂકી પ્રચંડ આગ
છેલ્લું અપડેટ : 08 Jun 2026
જમ્મુ-કાશ્મીરના ઉધમપુરમાં કાળઝાળ ગરમી વચ્ચે જંગલોમાં લાગેલી આગે વિકરાળ સ્વરૂપ ધારણ કર્યું છે. વન વિભાગની ટીમે જીવના જોખમે જંગલની આગને કાબૂમાં લેવા સંઘર્ષનો સામનો કર્યો.
જમ્મુ-કાશ્મીરના ઉધમપુરમાં કાળઝાળ ગરમી વચ્ચે ગુડાર સાંગ બ્લોકમાં જંગલની આગની ગંભીર ઘટના સામે આવી છે. નંબર 18 પર લાગેલી આ આગની જાણ થતાં જ કંટ્રોલ રૂમ દ્વારા તાત્કાલિક કાર્યવાહી કરવામાં આવી હતી. જંગલના દુર્ગમ વિસ્તારમાં પહોંચવા માટે ટીમે 3-4 કિમીનું અંતર પગપાળા કાપ્યું હતું. ત્યારબાદ ટીમે આગને બંને બાજુથી ઘેરીને કાબૂમાં લેવાના અથાગ પ્રયાસો કર્યા હતા. અધિકારીઓના જણાવ્યા મુજબ, આગ મોટાભાગે નિયંત્રણમાં આવી ગઈ છે, જોકે અંતિમ પરિણામ પવનની ગતિ પર નિર્ભર છે. જો પવન શાંત રહેશે તો આગ સંપૂર્ણપણે બુઝાઈ જશે, અન્યથા વરસાદની રાહ જોવી પડશે.
હવામાન વિભાગે આગામી 4-5 દિવસ માટે હીટવેવની ચેતવણી આપી છે. આ ગંભીર સ્થિતિને જોતા વન વિભાગે લોકોને જંગલ કે તેની આસપાસ આગ ન સળગાવવા અપીલ કરી છે. માનવીય ભૂલને કારણે લાગતી આ આગથી પર્યાવરણને ભારે નુકસાન થાય છે અને મૂંગા પશુ-પંખીઓનો જીવ જોખમમાં મુકાય છે. સાવચેતી જ આ મુશ્કેલીમાંથી બચવાનો શ્રેષ્ઠ માર્ગ છે.
