VIRAL VIDEO: ફ્રાન્સમાં એટલી ગરમી કે દુકાન ખુલતાની સાથે જ AC ખરીદવા માટે લોકોમાં અફરાતફરી સર્જાઈ
છેલ્લું અપડેટ : 27 Jun 2026
યુરોપમાં અત્યારે કાળઝાળ ગરમી પડી રહી છે. યુરોપના કેટલાક દેશો ભયંકર ગરમીની ઝપેટમાં છે અને તેની સૌથી વધુ અસર ફ્રાન્સમાં જોવા મળી રહી છે. સતત વધી રહેલા તાપમાને લોકોની મુશ્કેલીઓ એટલી હદે વધારી દીધી છે કે હવે ઘરોમાં એર કંડિશનર (AC) વગર રહેવું મુશ્કેલ બની ગયું છે. આ દરમિયાન સોશિયલ મીડિયા પર ફ્રાન્સના એક સ્ટોરનો વીડિયો ઝડપથી વાયરલ થઈ રહ્યો છે, જેને જોઈને સૌ કોઈ હેરાન છે. આ વીડિયો સોશિયલ સાઇટ X પરથી શેર કરવામાં આવ્યો છે. જેના કેપ્શનમાં જણાવાયું છે કે ફ્રાન્સમાં એટલી આકરી ગરમી પડી રહી છે કે અહીં AC, કૂલર અને અન્ય કૂલિંગ ઉપકરણોની અછત સર્જાઈ છે. આવી સ્થિતિમાં લોકો વચ્ચે AC અને કૂલર ખરીદવા માટે અફરાતફરી જેવો માહોલ સર્જાયો છે.
ફ્રાન્સમાં AC ખરીદવા માટે મચી અફરાતફરી
વાયરલ વીડિયોમાં જોઈ શકાય છે કે જેવો દુકાનનો દરવાજો ખૂલે છે, લોકોનું ટોળું ખૂબ જ ઝડપથી દુકાનની અંદર ઘૂસી જાય છે. દરેક વ્યક્તિ જાણે AC-કૂલર લૂંટવાના મૂડમાં હોય તેમ દેખાઈ રહ્યું છે. જેના હાથમાં જે આવી રહ્યું છે, તે બસ તેને ઉઠાવી રહ્યું છે. તમને જણાવી દઈએ કે આ તમામ લોકો વધતી ગરમીથી રાહત મેળવવા માટે કૂલર અને AC ખરીદવા સ્ટોર પર આવ્યા છે. આ ગરમીમાં લોકોની ડિમાન્ડ એટલી બધી છે કે અહીં કૂલિંગ ઉપકરણોની શોર્ટેજ થઈ ગઈ છે. તેથી સ્ટોર ખૂલતાની સાથે જ લોકો આ ઉપકરણો પર તૂટી પડ્યા. વીડિયોમાં તમે જોઈ શકો છો કે કેટલાક લોકો ઝડપથી સામાન લેવા માટે એકબીજાથી આગળ નીકળવાનો પ્રયાસ કરે છે, જેના કારણે થોડીવાર માટે દુકાનમાં ભારે દોડધામ મચી જાય છે.
સમગ્ર યુરોપમાં ગરમીનો કહેર
મળતી માહિતી મુજબ, આ ઘટના ફ્રાન્સના ચેમ્બરી (Chambery) શહેરની છે. ત્યાં હાજર લોકોએ પણ કદાચ આ પહેલા ક્યારેય આવો નજારો જોયો ન હતો. સામાન્ય રીતે યુરોપિયન દેશોમાં આવી ભીડ ઓછી જોવા મળે છે, પરંતુ આ વખતે રેકોર્ડબ્રેક ગરમીએ લોકોને મજબૂર કરી દીધા છે કે તેઓ ગમે તેમ કરીને પોતાના ઘર માટે એર કંડિશનર ખરીદી લે. અહેવાલો અનુસાર, આ દિવસોમાં ફ્રાન્સ સહિત સમગ્ર યુરોપમાં ભીષણ હીટ વેવ (લૂ) ચાલી રહી છે. કેટલાક વિસ્તારોમાં તાપમાન 40 ડિગ્રી સેલ્સિયસને પાર પહોંચી ગયું છે. આવા વાતાવરણમાં લોકો માટે કૂલિંગ સિસ્ટમ વગર ઘરમાં રહેવું અશક્ય બની ગયું છે.
સોશિયલ મીડિયા પર વાયરલ થઈ રહેલા આ વીડિયો પર લોકો અલગ-અલગ પ્રતિક્રિયાઓ આપી રહ્યા છે. કેટલાક લોકો તેને વધતી ગરમીની અસર ગણાવી રહ્યા છે, જ્યારે ઘણા યુઝર્સનું કહેવું છે કે તેમણે ફ્રાન્સમાં AC ખરીદવા માટે આવી નાસભાગ પહેલા ક્યારેય જોઈ નથી.
