VIDEO: અમેરિકામાં દૂધના ભાવ સાંભળી ઉડી ગયા દેશી દૂધવાળાના હોશ! જાણો, કેમ વાયરલ થઈ રહ્યો છે આ વીડિયો?
છેલ્લું અપડેટ : 17 Jun 2026
સોશિયલ મીડિયા પર આજકાલ એક વીડિયો ખૂબ ચર્ચા જગાવી રહ્યો છે. વાયરલ ક્લિપમાં અમેરિકા (America) ના લોસ એન્જલસમાં રહેતા અને 'ચાયગાઈ' (Chaiguy) નામે જાણીતા ભારતીય ઉદ્યોગસાહસિક પ્રભાકર પ્રસાદ (Prabhakar Prasad) બિહારમાં પોતાના સ્થાનિક દૂધવાળા સાથે વાતચીત કરતા જોવા મળે છે. જ્યારે તેમણે પોતાના દૂધવાળાને જણાવ્યું કે કેલિફોર્નિયામાં એક લીટર દૂધની કિંમત આશરે 450 રૂપિયા છે, ત્યારે દૂધવાળા ભાઈનું રિએક્શન જોવા જેવું હતું.
વાતચીત દરમિયાન જ્યારે પ્રભાકર જણાવે છે કે તેઓ આ જ મોંઘા દૂધથી અમેરિકામાં ચા બનાવે છે, ત્યારે દૂધવાળાએ ઉત્સુકતાથી ચાની કિંમત પૂછી લીધી. પ્રભાકરે જવાબ આપ્યો, 10 ડોલર એટલે કે આશરે 900 રૂપિયાનો એક કપ ચા. આ સાંભળતા જ દૂધવાળાનું મગજ ચકરાવે ચડી ગયું અને તેણે પ્રભાકરને તરત જ એક મજેદાર આઈડિયા આપી દીધો. દૂધવાળાએ પૂછ્યું કે શું કોઈ રીતે તેનું દૂધ અમેરિકા એક્સપોર્ટ (નિકાસ) થઈ શકે? તેણે એવી સલાહ પણ આપી દીધી કે દૂધ બગડી ન જાય તે માટે રસ્તામાં મોટા-મોટા ફ્રીઝરનો ઉપયોગ કરી લઈશું.
કોણ છે આ 'ચાયગાઈ' પ્રભાકર પ્રસાદ?
બિહારના એક નાનકડા ગામમાંથી નીકળીને લોસ એન્જલસમાં પોતાનું સ્થાન બનાવનારા પ્રભાકર પ્રસાદની કહાની ખૂબ જ પ્રેરણાદાયક છે. પ્રભાકર ભણવામાં ખૂબ હોશિયાર હતા. તેમણે સખત મહેનત કરીને IITની પરીક્ષા પાસ કરી અને બાદમાં MBA કરવા માટે અમેરિકા જતા રહ્યા.
નોકરીમાંથી કાઢી મૂકાયાનું દર્દ
કોર્પોરેટની દુનિયામાં તેમને ઘણી વખત નોકરી ગુમાવવી પડી હતી. એક સમય એવો આવ્યો જ્યારે નોકરી જવાના કારણે અને બ્રેકઅપને લીધે તેમની તબિયત પણ બગડી ગઈ હતી. આ મુશ્કેલ સમયમાં એક મિત્રની સલાહ પર તેમણે ચા વેચવાનું શરૂ કર્યું. આજે તેઓ 'ચાયગાઈ' નામે સોશિયલ મીડિયા પર છવાયેલા છે. પ્રભાકરે કહ્યું, "કોર્પોરેટની નોકરીમાં પૈસા તો બહુ હતા, પણ શાંતિ અને આઝાદી નહોતી. આજે ભલે પૈસા એટલા ન હોય, પણ હું મારી મરજીનો માલિક છું. કોઈ કંપનીનો ગુલામ નથી."
લોકોને ગમી ગઈ દૂધવાળાની સાદગી
આ વીડિયો પર નેટિઝન્સ દિલ ખોલીને કમેન્ટ્સ કરી રહ્યા છે. એક યુઝરે લખ્યું, "દૂધવાળા ભાઈની આંખોમાં શીખવાની અને આગળ વધવાની જે ઈચ્છા છે, તે અદ્ભુત છે." મોટાભાગના નેટિઝન્સને દૂધવાળાએ તરત જ બિઝનેસ પ્લાન તૈયાર કરી લીધો તે બાબત ખૂબ જ મજેદાર લાગી રહી છે.