Viral Video/ ચોરી ઉપરથી સીનાજોરી! ફ્લાવર શોમાં ફૂલોની લૂંટ, ટોક્યા તો સામે જ ઝઘડવા માંડ્યા!
છેલ્લું અપડેટ : 25 Feb 2026
કહેવાય છે કે સુંદરતા માણવા માટે હોય છે, ચોરવા માટે નહીં. પરંતુ નોઈડાના સેક્ટર-34 માં આવેલ શિવાલિક પાર્કમાંથી જે દ્રશ્યો સામે આવ્યા છે, તે જોઈને કોઈપણ વ્યક્તિનું માથું શરમથી ઝૂકી જશે. અહીં આયોજિત 'ફ્લાવર શો'માં લોકોએ જે રીતે ફૂલોની ચોરી કરી છે તેનો વીડિયો સોશિયલ મીડિયા પર જોરદાર વાયરલ થઈ રહ્યો છે.
કેદારનાથની થીમ પર હતો શો
નોઈડામાં આ વખતે 38મો ફ્લાવર શો યોજાયો હતો, જેની થીમ 'કેદારનાથ' રાખવામાં આવી હતી. આ શોનું મુખ્ય આકર્ષણ ફૂલોથી બનેલું 40 ફૂટ ઊંચું ભવ્ય મંદિર હતું. આ સુંદર નજારો જોવા માટે હજારોની સંખ્યામાં લોકો ઉમટી પડ્યા હતા, પરંતુ કેટલાક લોકો અહીં સુંદરતા નિહાળવા નહીં પણ ફૂલો ચોરવા આવ્યા હોય તેવું લાગતું હતું.
વીડિયો બનાવનાર સાથે કરી જીભાજોડી
સોશિયલ મીડિયા પર વાયરલ થયેલા વીડિયોમાં જોઈ શકાય છે કે, સારી મધ્યમવર્ગીય ફેમિલીમાંથી આવતા લોકો કુંડાઓમાંથી ફૂલો તોડી રહ્યા છે અને પોતાની બેગમાં ભરી રહ્યા છે. જ્યારે ત્યાં હાજર એક જાગૃત નાગરિકે આ શરમજનક કૃત્યનો વીડિયો ઉતારવાનું શરૂ કર્યું અને તેમને રોકવાનો પ્રયત્ન કર્યો, ત્યારે ચોરી કરનારા લોકો શરમાવાને બદલે તેની સાથે ઝઘડો કરવા પર ઉતરી આવ્યા હતા. જાણે ફૂલ ચોરવા એ તેમનો અધિકાર હોય તે રીતે તેઓ વર્તી રહ્યા હતા.
લોકોનો રોષ: "દેશ વિદેશ જેવો ક્યારે બનશે?"
આ વીડિયો જોયા બાદ સોશિયલ મીડિયા યુઝર્સ ભારે રોષ ઠાલવી રહ્યા છે. લોકો કોમેન્ટમાં લખી રહ્યા છે કે:
-
"આ જ કારણે આપણો દેશ વિદેશ જેવો સુંદર નથી રહી શકતો, કારણ કે આપણે સાર્વજનિક સંપત્તિની કિંમત નથી સમજતા."
-
"ભણેલા-ગણેલા હોવાનો શું ફાયદો જો તમારામાં આટલી પણ સભ્યતા ન હોય?"
-
"ચોરી ઉપરથી સીનાજોરી! આ લોકો પોતાની સાથે બાળકોને પણ શું શીખવી રહ્યા છે?"