VIDEO: IPL 2026 વચ્ચે ઈશાન કિશન પાસેથી છીનવાશે કેપ્ટનશિપ? સતત ત્રણ મેચ જીત્યા બાદ પણ બદલાશે હૈદરાબાદનો કેપ્ટન
છેલ્લું અપડેટ : 23 Apr 2026
IPL 2026માં સનરાઈઝર્સ હૈદરાબાદ શાનદાર ફોર્મમાં છે. ટીમે તેની છેલ્લી ત્રણેય મેચ જીતી છે. આમ છતાં, ઈશાન કિશન પાસેથી સિઝનની વચ્ચેથી કેપ્ટનશિપ છીનવી લેવામાં આવી શકે છે. નિયમિત કેપ્ટન પેટ કમિન્સ હવે ટીમમાં જોડાઈ ગયો છે. કમિન્સ સિઝનની શરૂઆતમાં હાજર નહતો, જેના કારણે ઈશાન કિશનને જવાબદારી સોંપવામાં આવી છે.
જોકે, આ સિઝન ઈશાન કિશનની કેપ્ટનશિપ હેઠળ હૈદરાબાદ માટે રિકવરી અને સંતુલનની વાર્તા રહી છે. શરૂઆતની હાર પછી, ટીમે બોલિંગમાં સુધારા અને મેદાન પર વધુ સારા સંકલન સાથે લય પાછી મેળવી છે. ઈશાનનું કમ્ફર્ટ લેવલ અને ખેલાડીઓની સારી સમજ આ પરિવર્તનનું મુખ્ય કારણ રહ્યું છે.
હવે જ્યારે કમિન્સ ઈજામાંથી પાછો ફરવા માટે તૈયાર છે, ત્યારે હૈદરાબાદને નક્કી કરવું પડશે કે તેના અનુભવી કેપ્ટન પાસે પાછા ફરવું કે ટીમને પાછી ટ્રેક પર લાવનાર યુવા કેપ્ટનમાં વિશ્વાસ મૂકવો. આ નિર્ણય સરળ નથી અને બાકીની સિઝન પર તેની નોંધપાત્ર અસર પડી શકે છે.
કિશનની કેપ્ટનશિપને સમર્થન મળે છે
ભૂતપૂર્વ ભારતીય ઓફ સ્પિનર હરભજન સિંહે ઈશાન સાથે નિરંતરતા રાખવાની વાત કરતા આ ચર્ચાએ જોર પકડ્યું છે. હરભજને કહ્યું કે હૈદરાબાદને તાત્કાલિક કમિન્સને પરત લાવવા માટે લલચાવવું ન જોઈએ.
હરભજને 2024ની ફાઇનલમાં ટીમને લઈ જવામાં કમિન્સના યોગદાનનો સ્વીકાર કર્યો, પરંતુ એમ પણ કહ્યું કે ઈશાનના નેતૃત્વમાં વર્તમાન સેટઅપ સંતુલિત દેખાય છે. ટીમે તેની છેલ્લી પાંચ મેચમાંથી ચાર મેચ જીતી છે.
બાંગરે ફિટનેસ અને નિરંતરતા અંગે પ્રશ્નો ઉઠાવ્યા
ભૂતપૂર્વ ભારતીય બેટિંગ કોચ સંજય બાંગરે પણ વ્યૂહાત્મક અને વ્યવહારિક કારણો ટાંકીને ઈશાનને કેપ્ટન તરીકે ચાલુ રાખવાનું સમર્થન કર્યું છે. તેણે કહ્યું કે ઈશાન કિશન કેપ્ટન તરીકે ખૂબ જ સારો છે, ખાસ કરીને બોલર્સના ઉપયોગમાં. તે જાણે છે કે કયા બોલરનો ઉપયોગ કયા બેટ્સમેન સામે કરવો. આ બતાવે છે કે તે રમતને કેટલી સારી રીતે નિયંત્રિત કરે છે.
બાંગરે કમિન્સની ફિટનેસ અંગે પણ ચિંતા વ્યક્ત કરી છે. ઓસ્ટ્રેલિયન કેપ્ટન કમરના નીચેના ભાગમાં સ્ટ્રેસ રિએક્શનમાંથી સ્વસ્થ થઈ રહ્યો છે જેના કારણે તે T20 વર્લ્ડ કપમાંથી બહાર રહ્યો હતોઅને તેના IPL 2026 અભિયાનની શરૂઆત મોડી થઈ.
