Asian Games 2026 / ક્વાર્ટર ફાઈનલમાં ટીમ ઈન્ડિયા કોનો સામનો કરશે? બની રહ્યા છે આ સમીકરણ
છેલ્લું અપડેટ : 25 Sept 2026
ટીમ ઈન્ડિયા 28 સપ્ટેમ્બરના રોજ જાપાનના આઈચી-નાગોયામાં યોજાનારી એશિયન ગેમ્સમાં તેના અભિયાનની શરૂઆત ક્વાર્ટર ફાઈનલ સાથે કરશે. જોકે, ભારત કઈ ટીમનો સામનો કરશે તે હજુ સુધી નક્કી થયું નથી. મેન્સ ક્રિકેટ ઈવેન્ટમાં ભારત સહિત ચાર ટીમોએ તેમના ટોચના ક્રમાંકના આધારે સીધા ક્વાર્ટર ફાઈનલમાં સ્થાન મેળવ્યું છે, જ્યારે ચાર ટીમો ગ્રુપ સ્ટેજમાં ક્વોલિફિકેશન માટે સ્પર્ધા કરી રહી છે. છ ગ્રુપ સ્ટેજ મેચોમાંથી ચાર રમાઈ ચૂકી છે અને ક્વાર્ટર ફાઈનલ માટેનું ચિત્ર ધીમે ધીમે સ્પષ્ટ થઈ રહ્યું છે. પરિણામે, ટીમ ઈન્ડિયાના ક્વાર્ટર ફાઈનલ પ્રતિસ્પર્ધીની સંભાવના પણ સામેઆવી છે.
ક્વાર્ટર ફાઈનલમાં ભારત કોનો સામનો કરશે?
એશિયન ગેમ્સ 2026 મેન્સ ક્રિકેટ ટુર્નામેન્ટના લીગ તબક્કામાં છ ટીમો ભાગ લઈ રહી છે, જે બે અલગ-અલગ ગ્રુપમાં વહેંચાયેલી છે. ગ્રુપ Aમાં અફઘાનિસ્તાન, નેપાળ અને જાપાનનો સમાવેશ થાય છે, જ્યારે ગ્રુપ Bમાં ઓમાન, હોંગકોંગ અને મલેશિયાનો સમાવેશ થાય છે. શ્રેયસ અય્યરના નેતૃત્વ હેઠળની ટીમ ઈન્ડિયા 28 સપ્ટેમ્બરે બીજા ક્વાર્ટર-ફાઈનલ મેચ માટે મેદાનમાં ઉતરશે. શેડ્યૂલ મુજબ, ભારત ગ્રુપ Aની A2 ટીમ (ગ્રુપ Aમાં બીજા ક્રમે રહેલી ટીમ) સામે ટકરાશે. અફઘાનિસ્તાને ગ્રુપ Aની પહેલી મેચમાં જાપાનને હરાવ્યું હતું, જ્યારે નેપાળે બીજા મેચમાં અફઘાનિસ્તાનને હરાવ્યું હતું.
જોકે અફઘાનિસ્તાનનું ક્વાર્ટર ફાઈનલમાં સ્થાન નિશ્ચિત છે, પરંતુ તે ગ્રુપ A1માં રહેશે કે A2માં રહેશે તે અંગેનો નિર્ણય 26 સપ્ટેમ્બરે નેપાળ અને જાપાન વચ્ચેની મેચ પછી લેવામાં આવશે. જો નેપાળ જાપાનને હરાવે છે, તો અફઘાનિસ્તાન A2માં જઈ શકે છે અને તે કિસ્સામાં, ભારત ક્વાર્ટર ફાઈનલમાં અફઘાનિસ્તાનનો સામનો કરશે. ટીમ ઈન્ડિયાએ તાજેતરમાં અફઘાનિસ્તાન સામે T20 સિરીઝ 3-0થી જીતી હતી. જો જાપાન જીતે છે અને તેનો નેટ રન રેટ નેપાળ કરતા સારો છે, તો જાપાન ભારતનો સામનો કરી શકે છે. જો જાપાનનો જીતનો માર્જિન મોટો ન હોય, તો નેપાળ પણ A2 બની શકે છે અને ભારતનો સામનો કરી શકે છે.
જો નેપાળ-જાપાન મેચ વરસાદને કારણે રદ્દ થાય છે, તો શું થશે?
જો નેપાળ અને જાપાન વચ્ચેની મેચ વરસાદને કારણે રદ્દ થાય તો પણ ભારત અને અફઘાનિસ્તાન ક્વાર્ટર ફાઈનલમાં એકબીજાનો સામનો કરશે. મેચ રદ્દ થાય તો, નેપાળને ત્રણ પોઈન્ટ મળશે અને તે ગ્રુપ Aમાં નંબર 1 પર રહેશે. ત્રીજા ક્વાર્ટર ફાઈનલમાં તે શ્રીલંકા સામે ટકરાશે. પ્રથમ ક્વાર્ટર ફાઈનલમાં પાકિસ્તાનનો મુકાબલો હોંગકોંગ ચાઈના સામે થવાની શક્યતા છે.
એશિયન ગેમ્સ 2026 માટે ભારતીય ટીમ
શ્રેયસ અય્યર (કેપ્ટન), અભિષેક શર્મા, સંજુ સેમસન (વિકેટકીપર), ઈશાન કિશન (વિકેટકીપર), શિવમ દુબે, તિલક વર્મા (વાઈસ-કેપ્ટન), અક્ષર પટેલ, વોશિંગ્ટન સુંદર, વિપરજ નિગમ, રવિ બિશ્નોઈ, જસપ્રીત બુમરાહ, યશ ઠાકુર, અર્શદીપ સિંહ, વૈભવ સૂર્યવંશી.
