Women's Asia Cup 2026 / ક્યારે શરૂ થશે ભારત અને બાંગ્લાદેશ વચ્ચેની સેમીફાઈનલ? ક્યાં જોઈ શકાશે લાઈવ?
છેલ્લું અપડેટ : 10 Sept 2026
દુબઈમાં રમાઈ રહેલા મહિલા T20 એશિયા કપ 2026માં ગ્રુપ સ્ટેજ મેચ પૂર્ણ થયા પછી, ભારત અને બાંગ્લાદેશ મહિલા ટીમો વચ્ચે 10 સપ્ટેમ્બરના રોજ દુબઈ ઈન્ટરનેશનલ ક્રિકેટ સ્ટેડિયમ ખાતે પ્રથમ સેમીફાઈનલ મેચ રમાશે. હરમનપ્રીત કૌરની કેપ્ટનશિપ હેઠળ, ભારતીય મહિલા ટીમે અત્યાર સુધી ટુર્નામેન્ટમાં ખૂબ સારું પ્રદર્શન કર્યું છે, એક પણ મેચ હાર્યા વિના સેમીફાઈનલમાં સ્થાન મેળવ્યું છે. દરમિયાન, બાંગ્લાદેશ મહિલા ટીમ ગ્રુપ Bનો ભાગ હતી, તેણે પોતાની ત્રણ મેચમાંથી બે જીતી હતી અને એક હારનો સામનો કરવો પડ્યો હતો. ભારત અને બાંગ્લાદેશ મહિલા ટીમો વચ્ચે ટુર્નામેન્ટની પ્રથમ સેમીફાઈનલ મેચ દુબઈમાં ભારતીય સમય મુજબ રાત્રે 8:00 વાગ્યે પર શરૂ થશે અને ફેન્સ તેને સોની સ્પોર્ટ્સ નેટવર્ક પર લાઇવ જોઈ શકશે.
મેચ ક્યારે, ક્યાં અને કયા સમયે જોવી
ભારત અને બાંગ્લાદેશ વચ્ચે મહિલા T20 એશિયા કપ 2026ની પહેલી સેમીફાઈનલ મેચ દુબઈ ઈન્ટરનેશનલ ક્રિકેટ સ્ટેડિયમ ખાતે રમાશે, મેચ ભારતીય સમયાનુસાર રાત્રે 8:00 વાગ્યે શરૂ થશે અને ટોસ ભારતીય સમયાનુસાર સાંજે 7:30 વાગ્યે થશે. ભારત અને બાંગ્લાદેશ મહિલા ટીમો વચ્ચેની આ સેમીફાઈનલ મેચનું ભારતમાં સોની સ્પોર્ટ્સ નેટવર્કના સોની ટેન-1 અને ટેન-3 ચેનલો પર લાઈવ ટેલિકાસ્ટ કરવામાં આવશે. વધુમાં, ચાહકો DD ફ્રી ડિશ દ્વારા DD સ્પોર્ટ્સ પર પણ મેચ લાઈવ જોઈ શકે છે. ભારત વિરુદ્ધ બાંગ્લાદેશ મહિલા સેમીફાઈનલ મેચનું ઓનલાઈન લાઈવ સ્ટ્રીમિંગ સોની લિવ એપ પર ઉપલબ્ધ થશે, જ્યાં ફેન્સ સરળતાથી લોગ ઈન કરીને મેચ જોઈ શકે છે.
ભારતીય ટીમ અત્યાર સુધી બાંગ્લાદેશ સામે પ્રભુત્વ ધરાવે છે
મહિલા T20 આંતરરાષ્ટ્રીય મેચોમાં ભારતીય ટીમ બાંગ્લાદેશ સામે પ્રભુત્વ ધરાવે છે. બંને ટીમો વચ્ચે અત્યાર સુધી રમાયેલી 24 T20 આંતરરાષ્ટ્રીય મેચોમાંથી ટીમ ઈન્ડિયાએ 21 જીતી છે, જ્યારે બાંગ્લાદેશ ફક્ત ત્રણ જીતી શક્યું છે. ટીમ ઈન્ડિયા આ રેકોર્ડ જાળવી રાખવા માટે પ્રયત્નશીલ રહેશે, જેમાં મોટાભાગની નજર ફરી એકવાર સ્ટાર ઓપનિંગ બેટ્સમેન સ્મૃતિ મંધાના પર રહેશે.
