15 વર્ષની રાહનો અંત... ત્રિશા જોલી અને ગાયત્રી ગોપીચંદે ઈતિહાસ રચ્યો, ભારતે મેડલ નિશ્ચિત કર્યો
છેલ્લું અપડેટ : 22 Aug 2026
ભારતીય મહિલા બેડમિન્ટન ડબલ્સ જોડી ત્રિશા જોલી અને ગાયત્રી ગોપીચંદે BWF વર્લ્ડ ચેમ્પિયનશિપના ક્વાર્ટર ફાઈનલમાં ઐતિહાસિક અપસેટ સર્જીને ભારત માટે ઓછામાં ઓછો બ્રોન્ઝ મેડલ નિશ્ચિત કર્યો છે. શુક્રવારે રમાયેલા રોમાંચક મેચમાં, બિનક્રમાંકિત ભારતીય જોડીએ જિયા યી ફાન અને ઝાંગ શુ જિયાનની પ્રબળ ચીની જોડીને 1 કલાક અને 9 મિનિટ સુધી ચાલેલા કઠિન મુકાબલામાં 16-21, 21-15, 21-13થી હરાવી.
ત્રિશા જોલી અને ગાયત્રી ગોપીચંદે ઈતિહાસ રચ્યો
આ જીત ભારતીય બેડમિન્ટન માટે મહત્ત્વપૂર્ણ છે, કારણ કે ભારતે 15 વર્ષની લાંબી રાહ પછી વર્લ્ડ ચેમ્પિયનશિપમાં મહિલા ડબલ્સ કેટેગરીમાં મેડલ જીત્યો છે. છેલ્લી વખત 2011માં મેડલ જીત્યો હતો, જ્યારે જ્વાલા ગુટ્ટા અને અશ્વિની પોનપ્પાએ બ્રોન્ઝ મેડલ જીત્યો હતો. આ ક્વાર્ટર ફાઈનલ મેચ પહેલા ભારતીય જોડી ચીની જોડી સામેની મેચોમાં 0-3થી પાછળ હતી. જોકે, આ મેચમાં ભારતીય જોડીનું શાનદાર પ્રદર્શન જોવા મળ્યું.
પહેલી ગેમ હાર્યા બાદ મજબૂત વાપસી
પહેલી ગેમમાં, ચીની ખેલાડીઓએ શરૂઆતમાં 1-6ની લીડ મેળવી હતી. ત્યારબાદ ભારતીય જોડીએ સતત છ પોઈન્ટ મેળવીને અંતર ઘટાડીને 8-9 કર્યું હતું, પરંતુ ચીની જોડીએ દબાણ જાળવી રાખ્યું અને પહેલી ગેમ 21-16થી જીતી લીધી. બીજી ગેમમાં, ચીની જોડી 5-1 અને 10-7થી આગળ હતી, પરંતુ ત્રિશા અને ગાયત્રીએ આક્રમક, સપાટ એક્સચેન્જ અને ચપળ નેટ પ્લે સાથે વાપસી કરી, 13-10ની લીડ મેળવી અને 21-15થી જીતી મેચમાંબરાબરી કરી.
ત્રીજી ગેમમાં, ભારતીય જોડીએ શરૂઆતથી જ પોતાની લીડ જાળવી રાખી અને બ્રેક પર 11-5ની મજબૂત લીડ મેળવી. ચીની ખેલાડીઓએ ભારતીય એટેક અને દબાણનો સામનો કરીને બિનજરૂરી ભૂલો કરવાનું શરૂ કર્યું. ભારતીય જોડીએ 9 મેચ પોઈન્ટ મેળવ્યા અને અંતે 21-13થી મેચ જીતી.