IND vs AUS / બે ખેલાડીઓનું નસીબ ચમક્યું, પહેલીવાર ODI ટીમમાં સ્થાન મળ્યું; શું પ્લેઈંગ ઈલેવનમાં મળશે તક?
છેલ્લું અપડેટ : 05 Oct 2025
BCCI એ શનિવારે 19 ઓક્ટોબરથી શરૂ થનારા ઓસ્ટ્રેલિયા પ્રવાસ માટે ટીમ ઈન્ડિયાની જાહેરાત કરી. રોહિત શર્મા અને વિરાટ કોહલીને પણ ODI ટીમમાં પસંદ કરવામાં આવ્યા, જે માર્ચ 2025 પછી પહેલી આંતરરાષ્ટ્રીય મેચ રમશે. શુભમન ગિલ ટીમનું નેતૃત્વ કરશે, અને શ્રેયસ અય્યરને વાઈસ કેપ્ટન બનાવવામાં આવ્યો છે. આ ઉપરાંત, બે નવા ખેલાડીઓ પણ ટીમમાં જોડાયા છે. ટેસ્ટ અને T20Iમાં પ્રભાવશાળી પ્રદર્શન બાદ આ ખેલાડીઓએ ODI ટીમમાં સ્થાન મેળવ્યું છે.
આ બંને ખેલાડીઓએ પહેલી વાર ODI ટીમમાં સ્થાન મેળવ્યું છે
ટીમ ઈન્ડિયા આ પ્રવાસમાં ત્રણ ODI અને પાંચ T20I મેચની સિરીઝ રમશે. આ પ્રવાસ ODI સિરીઝથી શરૂ થશે. ચેમ્પિયન્સ ટ્રોફી જીત્યા પછી આ ટીમ ઈન્ડિયાની પ્રથમ ODI સિરીઝ હશે. વિકેટકીપર-બેટ્સમેન ધ્રુવ જુરેલ અને ઓલરાઉન્ડર નીતિશ કુમાર રેડ્ડીની પણ આ સિરીઝ માટે પસંદગી કરવામાં આવી છે. આ પહેલીવાર છે જ્યારે આ બંને ખેલાડીઓને ભારતીય ODI ટીમ માટે પસંદ કરવામાં આવ્યા છે. બંને હાલમાં વેસ્ટ ઈન્ડિઝ સામે ચાલી રહેલી ટેસ્ટ સિરીઝનો ભાગ છે.
ધ્રુવ જુરેલનું તાજેતરનું પ્રદર્શન ખૂબ પ્રભાવશાળી રહ્યું છે. તેણે તાજેતરમાં વેસ્ટ ઈન્ડિઝ સામે અમદાવાદ ટેસ્ટમાં સદી ફટકારી હતી. તેણે અત્યાર સુધીમાં ટીમ ઈન્ડિયા માટે 6 ટેસ્ટ અને 4 T20I મેચ રમી છે. નીતિશ કુમાર રેડ્ડીએ ટીમ ઈન્ડિયા માટે 8 ટેસ્ટ અને 4 T20I મેચ પણ રમી છે. નીતિશ કુમાર રેડ્ડી ગયા વર્ષે ઓસ્ટ્રેલિયા પ્રવાસ પર ટેસ્ટ ટીમનો પણ ભાગ હતો, જ્યાં તેણે યાદગાર સદી ફટકારી હતી.
શું તેમને ઓસ્ટ્રેલિયામાં રમવાની તક મળશે?
નોંધનીય છે કે સ્ટાર વિકેટકીપર-બેટ્સમેન રિષભ પંત ઈજાને કારણે આ પ્રવાસનો ભાગ નથી, જેના કારણે ધ્રુવ જુરેલને ટીમમાં સામેલ કરવામાં આવ્યો છે. જોકે, ODI ટીમમાં કેએલ રાહુલનો પણ સમાવેશ થાય છે, જે ટીમમાં વિકેટકીપર માટે પહેલી પસંદ રહેવની અપેક્ષા છે. આ સ્થિતિમાં, જુરેલ સિરીઝમાં કેએલ રાહુલના બેકઅપ વિકેટકીપર તરીકે સેવા આપશે, જેના કારણે તેના માટે તક મળવી મુશ્કેલ બનશે. દરમિયાન, હાર્દિક પંડ્યા પણ ઈજાને કારણે પ્રવાસમાંથી બહાર થઈ ગયો છે, જેના કારણે નીતિશ કુમાર રેડ્ડી ફાસ્ટ બોલિંગ ઓલરાઉન્ડર તરીકે રમી શકે છે.
