IND vs NZ / બીજી ODIમાં ટીમ ઈન્ડિયાની હાર માટે કોણ જવાબદાર? કેપ્ટન શુભમન ગિલે આપ્યો જવાબ
છેલ્લું અપડેટ : 15 Jan 2026
રાજકોટમાં ભારત પાસે ન્યુઝીલેન્ડ સામેની ODI સિરીઝ જીતવાની તક હતી, પરંતુ ન્યુઝીલેન્ડના બેટ્સમેનોએ કેપ્ટન શુભમન ગિલની આશાઓ પર પાણી ફેરવી દીધું. ડેરિલ મિચેલની શાનદાર 131 રનની ઈનિંગને કારણે ન્યુઝીલેન્ડ 7 વિકેટથી જીત મેળવવામાં સફળ રહ્યું. આ સાથે કેએલ રાહુલની સદી વ્યર્થ ગઈ અને ત્રણ મેચની સિરીઝ 1-1થી બરાબર થઈ. આ મેચમાં ભારતીય બોલર્સે નિરાશાજનક પ્રદર્શન કર્યું હતું. ભારતીય સ્પિનર્સ મિડલ ઓવર્સમાં વિકેટ લેવા માટે સંઘર્ષ કરી રહ્યા હતા, જેના પરિણામે ભારતીય ટીમે હારનો સામનો કરવો પડ્યો.
મિડલ ઓવર્સમાં વિકેટ ન મળી
મેચ પછી કેપ્ટન શુભમન ગિલે સ્વીકાર્યું કે મિડલ ઓવર્સમાં વિકેટ લેવામાં ટીમની અસમર્થતા સૌથી મોટી સમસ્યા સાબિત થઈ. તેણે કહ્યું કે જો મિડલ ઓવર્સમાં વિકેટ ન લેવામાં આવે, તો રનને રોકવા અત્યંત મુશ્કેલ બની જાય છે, ભલે ટીમે સ્કોરમાં 15-20 રન વધારે ઉમેર્યા હોય. તેણે કહ્યું, "અમારી પાસે મિડલ ઓવર્સમાં પાંચ ફિલ્ડર્સ અંદર હતા, તેમ છતાં, અમે વિકેટ ન લઈ શક્યા. જો આ ઓવર્સમાં વિકેટ ન મળે, તો સેટ બેટ્સમેનને રોકવા અશક્ય બની જાય છે."
નબળી ફિલ્ડિંગ મોંઘી સાબિત થઈ
શુભમને વધુમાં કહ્યું કે આવી પિચો પર એકવાર પાર્ટનરશિપ સ્થાપિત થઈ જાય, તો સેટ બેટ્સમેન માટે મોટો સ્કોર કરવો સરળ બની જાય છે, જ્યારે નવા બેટ્સમેન માટે શરૂઆતથી જ મુક્તપણે સ્કોર કરવો મુશ્કેલ બની જાય છે. કેપ્ટને સ્વીકાર્યું કે ઈનિંગની પ્રથમ 10-15 ઓવરમાં બોલ થોડી હરકત કરી રહ્યો હતો, પરંતુ તે દરમિયાન ટીમને બોલિંગમાં વધુ હિંમત બતાવવાની જરૂર હતી.
શુભમને કહ્યું, "અમે શરૂઆતમાં વધુ આક્રમક બની શક્યા હોત, પરંતુ અમે તેમ કરવામાં નિષ્ફળ ગયા." વધુમાં કેપ્ટને ફિલ્ડિંગની ભૂલોને પણ હારનું મુખ્ય કારણ ગણાવ્યું. તેણે સ્વીકાર્યું કે, પાછલી મેચની જેમ, ટીમે કેટલાક મહત્ત્વપૂર્ણ કેચ છોડી દીધા, જેનાથી વિરોધી ટીમ વાપસી કરી શકી. શુભમન ગિલના આ નિવેદનથી સ્પષ્ટ થાય છે કે ટીમે આગામી મેચોમાં મિડલ ઓવર્સની બોલિંગ, વિકેટ લેવાની વ્યૂહરચના અને ફિલ્ડિંગ પર ખાસ ધ્યાન આપવું પડશે, જેથી 2027ના વર્લ્ડ કપની તૈયારીઓને મજબૂત બનાવી શકાય.
