VIDEO: ODIમાં ફરી નંબર-1 બેટ્સમેન બન્યો શુભમન ગિલ, T20I રેન્કિંગમાં વૈભવ સૂર્યવંશીએ મારી લાંબી છલાંગ
છેલ્લું અપડેટ : 29 Jul 2026
ઇન્ટરનેશનલ ક્રિકેટ કાઉન્સિલ (ICC) દ્વારા બુધવારે પુરૂષ ખેલાડીઓની રેન્કિંગ જાહેર કરવામાં આવી છે. જેમાં બેટિંગ અને બોલિંગ ક્ષેત્રે મોટો ફેરફાર જોવા મળ્યો છે. ભારતીય કેપ્ટન શુભમન ગિલે ODI ક્રિકેટમાં ફરીથી નંબર-1 બેટ્સમેનનું સ્થાન મેળવી લીધું છે.
શુભમન ગિલ ફરી બન્યા નંબર-1 ODI બેટ્સમેન
ભારતીય કેપ્ટન શુભમન ગિલના ખાતામાં હાલમાં 801 રેટિંગ પોઈન્ટ છે. ગિલે ન્યુઝીલેન્ડના ડેરીલ મિચેલ (794) પાસેથી બાદશાહી છીનવી લીધી છે. મિચેલ આ વર્ષે જાન્યુઆરીથી ટોપ પર હતો. આ યાદીમાં ભારતના દિગ્ગજ બેટ્સમેન વિરાટ કોહલી 767 પોઈન્ટ સાથે ત્રીજા અને રોહિત શર્મા 758 પોઈન્ટ સાથે ચોથા સ્થાને યથાવત છે. ODI બોલિંગ રેન્કિંગમાં પણ નામીબિયાનો સ્પિનર બર્નાર્ડ શોલ્ટ્ઝ 5 સ્થાનની છલાંગ લગાવીને 7મા સ્થાને પહોંચી ગયો છે.
વૈભવ સૂર્યવંશીએ લગાવી લાંબી છલાંગ
યુવા ઓપનર વૈભવ સૂર્યવંશીએ T20I બેટ્સમેનોની રેન્કિંગમાં જબરદસ્ત લાંબી છલાંગ લગાવી છે. માત્ર 15 વર્ષની વયના સૂર્યવંશીએ 230 પાયદાનની છલાંગ લગાવીને સીધા 48મા ક્રમે જગ્યા બનાવી છે, અને તેના 536 રેટિંગ પોઈન્ટ્સ છે. તેણે તાજેતરમાં ઝિમ્બાબ્વે પ્રવાસ પર 3 મેચોની T20I સિરીઝમાં શાનદાર બેટિંગ કરી હતી. સૂર્યવંશીએ 50.33ની એવરેજથી સૌથી વધુ 151 રન બનાવ્યા હતા અને પોતાના કરિયરનો પહેલો પ્લેયર ઓફ ધ સિરીઝ એવોર્ડ જીત્યો હતો. ત્રીજી T20Iમાં 81 રનની ઈનિંગ રમીને તે પ્લેયર ઓફ ધ મેચ પણ બન્યો હતો. આ બંને એવોર્ડ જીતનારા તે સૌથી નાની ઉંમરના ક્રિકેટર બન્યો છે.
ઈશાન કિશન અને અન્ય ભારતીય ખેલાડીઓની સ્થિતિ
ભારતના વિકેટકીપર-બેટ્સમેન ઈશાન કિશન T20Iમાં નંબર-1 બેટ્સમેન છે, જેના 910 રેટિંગ પોઈન્ટ્સ છે. આ તેમના કરિયરની બેસ્ટ રેન્કિંગ છે. ઝિમ્બાબ્વે સિરીઝમાં તેણે 145 રન બનાવ્યા હતા.
સિરીઝમાં ફ્લોપ રહેલા ઓપનર અભિષેક શર્મા 1 સ્થાન લથડીને ત્રીજા સ્થાને પહોંચી ગયો છે, જ્યારે પાકિસ્તાનના સાહિબજાદ ફહાન બીજા સ્થાને આવી ગયો છે.
T20I બેટ્સમેનોની યાદીમાં વાઈસ કેપ્ટન તિલક વર્મા 2 સ્થાન ઉપર 6ઠ્ઠા અને કેપ્ટન શ્રેયસ અયર 7 સ્થાન ઉપર 24મા સ્થાને પહોંચી ગયો છે.
બોલિંગ વિભાગમાં, ઝિમ્બાબ્વે સામેની સિરીઝમાં 3 વિકેટ ઝડપનાર રવિ બિશ્નોઈ T20I બોલર્સની રેન્કિંગમાં 31 પાયદાનની છલાંગ લગાવીને 41મા સ્થાને આવી ગયો છે.
