VIDEO: વેપિંગ વિવાદમાં ફસાયેલા રિયાન પરાગની ફોર્મમાં વાપસી, દિલ્હી સામે શાનદાર ઈનિંગ રમ્યા બાદ આપ્યું મોટું નિવેદન
છેલ્લું અપડેટ : 02 May 2026
રાજસ્થાન રોયલ્સ અને દિલ્હી કેપિટલ્સ વચ્ચે રમાયેલી રોમાંચક મેચમાં રિયાન પરાગની શાનદાર બેટિંગ છતાં રાજસ્થાનને હારનો સામનો કરવો પડ્યો હતો. મેચમાં અનેક ઉતાર-ચઢાવ જોવા મળ્યા, જેમાં પરાગની ફિફ્ટી, મિચેલ સ્ટાર્કનું કમબેક અને 'વેપિંગ વિવાદ' પર પરાગનો ખુલાસો ચર્ચાનું કેન્દ્ર રહ્યા હતા.
ટીકાકારોને જવાબ આપવો જરૂરી નથી
છેલ્લા કેટલાક સમયથી ફોર્મ અને વેપિંગ (ઈ-સિગારેટ) ને કારણે વિવાદોમાં રહેલા રિયાન પરાગે દિલ્હી સામે 50 બોલમાં 90 રન ફટકારીને ફોર્મમાં વાપસી કરી છે. જોકે, આ મેચ બાદ તેણે સ્પષ્ટ કર્યું કે તેનું ધ્યાન માત્ર રમત પર છે. "મારે કોઈ ટીકાકારોને જવાબ આપવાની જરૂર નથી. મારો હેતુ ટીમને જીત અપાવવાનો છે. જો ટીમ હારી જાય, તો મારી ઈનિંગનો કોઈ અર્થ નથી રહેતો." તેવી પરાગે સ્પષ્ટતા કરી હતી.
સ્કોરબોર્ડની સ્થિતિ
- રાજસ્થાન રોયલ્સ: 225/6 (20 ઓવર)
- રિયાન પરાગ: 90 રન (50 બોલ)
- ડોનોવન ફરેરા: 47* રન (14 બોલ)
- દિલ્હી કેપિટલ્સ: લક્ષ્યાંક પીછો કરતા 7 વિકેટે વિજય મેળવ્યો.
હારનું કારણ શું?
રાજસ્થાને 225 રનનો વિશાળ સ્કોર બનાવ્યો હોવા છતાં દિલ્હીએ મેચ જીતી લીધી. પરાગના મતે મિડલ ઓવર્સમાં નબળી બોલિંગ હારનું મુખ્ય કારણ બની. એક જ ઓવરમાં વધુ પડતી બાઉન્ડ્રી આપવાને કારણે મેચ રાજસ્થાનના હાથમાંથી સરકી ગઈ હતી.
મિચેલ સ્ટાર્કનું શાનદાર કમબેક
દિલ્હી કેપિટલ્સ માટે રાહતના સમાચાર એ રહ્યા કે અનુભવી બોલર મિચેલ સ્ટાર્કે IPL 2026માં ધમાકેદાર વાપસી કરી છે. તેણે 3 મહત્ત્વની વિકેટ ઝડપી હતી. જેમાં પ્રથમ ઓવરમાં જ યશસ્વી જયસ્વાલને આઉટ કરીને રાજસ્થાનને મોટો ઝટકો આપ્યો હતો. બીજી તરફ, કેએલ રાહુલ (75 રન) અને પથુમ નિસાંકા (62 રન) ની 110 રનની પાર્ટનરશિપે દિલ્હીની જીત નક્કી કરી હતી.
પરાગની ઈજા અને આગામી મેચ
મેચ દરમિયાન રિયાન પરાગને હેમસ્ટ્રિંગની ઈજા થતા મેદાન છોડવું પડ્યું હતું, ત્યારબાદ યશસ્વી યશસ્વી જયસ્વાલે કેપ્ટન્સી સંભાળી હતી. જોકે, પરાગે આશા વ્યક્ત કરી છે કે, તે આગામી મેચ સુધી ફિટ થઈ જશે. રાજસ્થાન રોયલ્સની હવે પછીની ટક્કર 9 મેના રોજ ગુજરાત ટાઇટન્સ સામે થશે.
