'રન મશીન' બન્યો કેપ્ટન રજત પાટીદાર, દુલીપ ટ્રોફીની ફાઈનલમાં આટલા બોલમાં ફટકારી શાનદાર સદી
છેલ્લું અપડેટ : 12 Sept 2025
આજકાલ દુબઈમાં એશિયા કપ 2025 પૂરજોશમાં ચાલી રહ્યો છે, ત્યારે ભારતમાં ઘરેલુ ટુર્નામેન્ટ દુલીપ ટ્રોફી 2025 ચાલી રહી છે. બેંગલુરુના BCCI સેન્ટર ઓફ એક્સેલન્સ ગ્રાઉન્ડ પર રમાઈ રહેલી ફાઈનલ મેચમાં, મધ્યપ્રદેશના સ્ટાર બેટ્સમેન રજત પાટીદારે કમાલનું પ્રદર્શન કર્યું છે. તેણે સેન્ટ્રલ ઝોન માટે કપ્તાની ઈનિંગ રમી અને જોરદાર સદી ફટકારીને પોતાની ટીમને મજબૂત સ્થિતિમાં મૂકી દીધી છે. રજતે સાઉથ ઝોન સામે માત્ર 112 બોલમાં પોતાની સદી પૂરી કરી. આ રજત પાટીદારની ફર્સ્ટ ક્લાસ કારકિર્દીની 15મી સદી હતી.
જીવનદાન મળ્યા બાદ ફટકાર્યા ચોગ્ગા-છગ્ગા
આ ઈનિંગ દરમિયાન, તેને જીવનદાન મળ્યું હતું, જ્યારે તે 43 રન પર હતો, ત્યારે તે અંકિત શર્માના બોલ પર LBW થયો હતો, અમ્પાયરે પણ તેને આઉટ જાહેર કર્યો, પરંતુ જ્યારે ચેક કરવામાં આવ્યું ત્યારે તે નો બોલ હોવાનું બહાર આવ્યું અને રજતને જીવનદાન મળ્યું. આ પછી, તેણે તોફાની શૈલી અપનાવી. પહેલા, તેણે 73 બોલમાં ફિફ્ટી ફટકારી અને પછી 112 બોલમાં સદી પૂરી કરી. જોકે, આ પછી તે ઈનિંગ વધુ લંબાવી ન શક્યો અને 115 બોલમાં 101 રન બનાવીને આઉટ થયો. આ ઈનિંગમાં, તેના બેટમાંથી 12 ચોગ્ગા અને 2 છગ્ગા આવ્યા.
બીજી ક્વાર્ટર ફાઈનલમાં પણ સદી ફટકારી
સેન્ટ્રલ ઝોનનો કેપ્ટન દુલીપ ટ્રોફી 2025માં શાનદાર ફોર્મમાં હતો. ફાઈનલ પહેલા, તેણે 2 મેચ રમી અને બંનેમાં શાનદાર ઈનિંગ રમી. રજતે 3 ઈનિંગમાં 2 અડધી સદી અને 1 સદી ફટકારી. તેની શાનદાર બેટિંગના આધારે જ સેન્ટ્રલ ઝોન ફાઈનલમાં પહોંચ્યું. બીજા ક્વાર્ટર ફાઈનલમાં, રજતે નોર્થ ઈસ્ટ ઝોન સામે 96 બોલમાં 125 રન બનાવ્યા હતા, જેમાં 21 ચોગ્ગા અને 3 છગ્ગાનો સમાવેશ થાય છે. ત્યારબાદ બીજી ઈનિંગમાં, તેણે 72 બોલમાં 62 રન બનાવ્યા હતા. ત્યારબાદ સેમીફાઈનલમાં, તેણે 84 બોલમાં 77 રન બનાવ્યા હતા. હવે ફાઈનલમાં, 115 બોલમાં 101 રન ઉમેર્યા.
મેચની સ્થિતિ
જો મેચની વાત કરીએ તો, રજત પાટીદારે ટોસ જીતીને બોલિંગ પસંદ કરી અને પ્રથમ ઈનિંગમાં સાઉથ ઝોનને ફક્ત 149 રનમાં આઉટ કરી દીધું. સારાંશ જૈને 5 વિકેટ લીધી જ્યારે કુમાર કાર્તિકેયે 4 વિકેટ લીધી. હવે સેન્ટ્રલ ઝોનની ટીમ પ્રથમ ઈનિંગમાં બેટિંગ કરી રહી છે. મેચના બીજા દિવસે સમાચાર લખાય ત્યાં સુધી, પાટીદારની ટીમે 72 ઓવરમાં 5 વિકેટ ગુમાવ્યા બાદ 276 રન બનાવ્યા છે.
