IPL 2025 / આ શરમજનક રેકોર્ડમાં પણ નંબર વન છે જસપ્રીત બુમરાહ, કોઈ નહીં તોડવા માંગે આવો કીર્તિમાન
છેલ્લું અપડેટ : 20 Mar 2025
ક્રિકેટની દુનિયામાં બેટ્સમેન હોય કે બોલર, દરેક ખેલાડી નવા રેકોર્ડ બનાવવા માંગે અથવા કોઈ મહાન ખેલાડીના રેકોર્ડ તોડવા માંગે છે. પરંતુ કેટલાક રેકોર્ડ એવા છે જે કોઈપણ ખેલાડી નથી બનાવવા માંગતા. આવો જ એક રેકોર્ડ IPLમાં જસપ્રીત બુમરાહના નામે છે. તે ખૂબ જ મોટી લીડ સાથે આગળ છે અને કોઈપણ બોલર આમાં જસપ્રીત બુમરાહને પાછળ છોડવા નહીં માંગે.
બુમરાહે IPLમાં સૌથી વધુ નો બોલ ફેંક્યા
ક્રિકેટમાં નો બોલ ફેકવા ખરાબ માનવામાં આવે છે. T20 ક્રિકેટમાં, આ વધુ મહત્ત્વનું છે કારણ કે નો બોલ માટે એક રન તો મળે છે, પરંતુ બેટ્સમેનને તેના પછીના બોલ પર ફ્રી હિટ પણ મળે છે, જેમાં બેટ્સમેન ફક્ત રન આઉટ થઈ શકે છે. આનાથી બોલિંગ ટીમને નુકસાન થાય છે, પણ બેટ્સમેનોને ફાયદો થાય છે. ઘણીવાર એવું જોવા મળે છે કે બેટ્સમેન ફ્રી હિટ પર ફોર કે સિક્સ મારે છે. જો આપણે IPLના અત્યાર સુધીના ઈતિહાસની વાત કરીએ તો, જસપ્રીત બુમરાહ સૌથી વધુ નો બોલ ફેંકનાર બોલર છે.
જસપ્રીત બુમરાહે અત્યાર સુધીમાં 133 IPL મેચ રમી છે અને આ દરમિયાન તેણે 32 નો બોલ ફેંક્યા છે. આટલા મહાન બોલર પાસેથી આવી અપેક્ષા ન જ હોય. પરંતુ ઘણીવાર એવું જોવા મળે છે કે ફાસ્ટ બોલરો વધુ નો બોલ ફેંકે છે. ભલે જસપ્રીત બુમરાહ આ વર્ષે થોડી મેચોમાંથી બહાર હોય, પરંતુ એવી અપેક્ષા રાખવામાં આવે છે કે પ્રથમ હાફ પછી, તે તેની ટીમ મુંબઈ ઈન્ડિયન્સ માટે વાપસી કરતો જોવા મળશે.
બુમરાહ પછી સૌથી વધુ નો બોલ ફેંકનાર બોલર
બુમરાહ પછી, જો આપણે અન્ય બોલરની વાત કરીએ તો ઉમેશ યાદવનું નામ આ યાદીમાં બીજા સ્થાને આવે છે. ઉમેશ યાદવે 147 IPL મેચોમાં 24 નો બોલ ફેંક્યા છે. ઈશાંત શર્માએ અત્યાર સુધીમાં 110 IPL મેચ રમી છે અને 23 નો બોલ ફેંક્યા છે. શ્રીસંતે ફક્ત 44 IPL મેચોમાં 23 નો બોલ ફેંક્યા છે. સ્પિનર અમિત મિશ્રાએ 162 IPL મેચોમાં 21 નો બોલ ફેંક્યા છે. લસિથ મલિંગા પણ પાછળ નથી, તેણે 122 મેચમાં 18 નો બોલ ફેંક્યા છે. જો આપણે આ યાદીને ધ્યાનથી જોઈએ તો એવું લાગે છે કે આ વર્ષે તો જસપ્રીત બુમરાહનો આ રેકોર્ડ નહીં તૂટે.
