IPL 2025 / ફ્રેન્ચાઈઝીઓને પસંદ છે દેશી કેપ્ટન, 10માંથી 9 ટીમોએ ભારતીય કપ્તાન પર દેખાડ્યો વિશ્વાસ
છેલ્લું અપડેટ : 20 Mar 2025
IPLની 18મી સિઝન શરૂ થવામાં હવે ફક્ત બે દિવસ બાકી છે. બધી 10 ટીમો પોતપોતાના ઘરઆંગણે પ્રેક્ટિસ કરવામાં વ્યસ્ત છે, અને આ વખતે ટાઈટલ જીતવા માટે વ્યૂહરચના તૈયાર કરી રહી છે. આમાં સૌથી મહત્ત્વપૂર્ણ ભૂમિકા ટીમના કેપ્ટનોની રહેશે.
જોકે, પાછલા વર્ષોની તુલનામાં, આ પહેલીવાર છે જ્યારે 10માંથી 9 ટીમોએ ભારતીય કેપ્ટનો પર દાવ લગાવ્યો છે. સનરાઈઝર્સ હૈદરાબાદ એકમાત્ર એવી ટીમ છે જેણે ફરીથી પોતાની ટીમનું નેતૃત્વ ઓસ્ટ્રેલિયન કેપ્ટન પેટ કમિન્સને સોંપ્યું છે, જે ગયા વર્ષે ટીમને ફાઈનલમાં લઈ ગયો હતો. બાકીની બધી ટીમોની કમાન ભારતીય ખેલાડીઓના હાથમાં છે.
યુવા ખેલાડીઓ પર વિશ્વાસ
IPLના ઈતિહાસમાં સૌથી સફળ કેપ્ટન મહેન્દ્ર સિંહ ધોની અને રોહિત શર્મા આ વખતે પણ પોતાની ફ્રેન્ચાઈઝી માટે રમશે, પરંતુ ભવિષ્યને ધ્યાનમાં રાખીને, ફ્રેન્ચાઈઝીએ હવે ટીમની કમાન યુવા હાથોને સોંપી દીધી છે. ચેન્નાઈ સુપર કિંગ્સનું નેતૃત્વ ઋતુરાજ ગાયકવાડ કરે છે, જ્યારે મુંબઈ ઈન્ડિયન્સનું નેતૃત્વ હાર્દિક પંડ્યા કરશે.
જોકે, બંનેએ ગયા વર્ષે પણ ટીમનું નેતૃત્વ કર્યું હતું, પરંતુ તેઓ તેમની ટીમોને તેમના વારસા મુજબ સફળતા નહતા અપાવી શક્યા. હાર્દિકના નેતૃત્વમાં સતત બે ફાઈનલ રમનાર ગુજરાત ટાઈટન્સનું પણ ગઈ સિઝનમાં શુભમન ગિલના નેતૃત્વમાં ખાસ પ્રદર્શન નહોતું રહ્યું. આવી સ્થિતિમાં, આ વખતે બધાની નજર તેની કેપ્ટનસી સ્કિલ પર રહેશે.
આ ટીમો ટાઈટલ નથી જીતી શકી
રોયલ ચેલેન્જર્સ બેંગલુરુએ પણ આ વખતે રજત પાટીદારને પોતાનો કેપ્ટન બનાવ્યો છે. અનુભવી ભારતીય બેટ્સમેન વિરાટ કોહલીએ ફ્રેન્ચાઈઝીના આ નિર્ણયની ખૂબ પ્રશંસા કરી છે, પરંતુ હવે ભવિષ્ય જ કહેશે કે તે પહેલીવાર RCB માટે ખિતાબ જીતવામાં સફળ થશે કે નહીં.
દિલ્હી કેપિટલ્સ, લખનૌ સુપરજાયન્ટ્સ અને પંજાબ કિંગ્સે પણ કેપ્ટન બદલીને યુવાનોમાં વિશ્વાસ વ્યક્ત કર્યો છે. દિલ્હી કેપિટલ્સે અક્ષર પટેલ, લખનૌ સુપરજાયન્ટ્સે રિષભ પંત અને પંજાબ કિંગ્સે શ્રેયસ અય્યરને કેપ્ટન તરીકે નિયુક્ત કર્યા છે.
આ ત્રણેય ટીમો પણ હજુ સુધી ચેમ્પિયન નથી બની, જોકે શ્રેયસે ગયા વર્ષે તેની કેપ્ટનશિપ હેઠળ કોલકાતા નાઈટ રાઈડર્સને ચેમ્પિયન બનાવ્યું હતું, પરંતુ હવે એ જોવાનું મહત્ત્વનું રહેશે કે તેની રણનીતિઓ પંજાબ કિંગ્સને તેનું પહેલું ટાઇટલ અપાવી શકે છે કે નહીં?
રાજસ્થાન રોયલ્સે પણ ફરીથી યુવાન સંજુ સેમસન પર વિશ્વાસ વ્યક્ત કર્યો છે. તે પોતાની ભૂલોમાંથી શીખવાનો શ્રેષ્ઠ પ્રયાસ કરશે અને આ વખતે ફરી એક મજબૂત પ્રદર્શન આપશે.
પંત સૌથી મોંઘો અને રહાણે સૌથી સસ્તો કેપ્ટન
કેપ્ટનોની ચર્ચામાં સૌથી ખાસ વાત એ છે કે આ વખતે IPL મેગા ઓક્શનમાં સૌથી વધુ બોલી કેપ્ટનો પર લગાવવામાં આવી છે. લખનૌ સુપરજાયન્ટ્સે રિષભ પંત પર રેકોર્ડ 27 કરોડ રૂપિયા ખર્ચ્યા, જ્યારે પંજાબ કિંગ્સે શ્રેયસ અય્યર પર 26.75 કરોડ રૂપિયા ખર્ચ્યા હતા.
રિટેન કરાયેલા કેપ્ટનોમાં, સનરાઈઝર્સે પેટ કમિન્સ (18 કરોડ રૂપિયા) પર, ચેન્નાઈ સુપર કિંગ્સે ઋતુરાજ ગાયકવાડ (18 કરોડ રૂપિયા) પર, રાજસ્થાન રોયલ્સે સંજુ સેમસન (18 કરોડ રૂપિયા) પર, ગુજરાત ટાઈટન્સે શુભમન ગિલ (16.5 કરોડ રૂપિયા) પર, દિલ્હી કેપિટલ્સે અક્ષર પટેલ (16.5 કરોડ રૂપિયા) પર, મુંબઈ ઈન્ડિયન્સે હાર્દિક પંડ્યા (16.35 કરોડ રૂપિયા) પર અને રોયલ ચેલેન્જર્સ બેંગલુરુએ રજત પાટીદાર (11 કરોડ રૂપિયા) પર ઘણા પૈસા ખર્ચ્યા છે.
જોકે, ડિફેન્ડિંગ ચેમ્પિયન કોલકાતા નાઈટ રાઈડર્સ એકમાત્ર એવી ટીમ છે જેણે પોતાના કેપ્ટન પર માત્ર 1.5 કરોડ રૂપિયા ખર્ચ કર્યા છે. KKR એ ટીમની જવાબદારી અનુભવી અજિંક્ય રહાણેને સોંપી છે. 36 વર્ષની ઉંમરે, રહાણે બધા કેપ્ટનોમાં સૌથી મોટી ઉંમરનો કેપ્ટન પણ છે.
સનરાઈઝર્સને પેટ કમિન્સ પર વિશ્વાસ છે
ઓસ્ટ્રેલિયન ઓલરાઉન્ડર અને કેપ્ટન પેટ કમિન્સે પહેલી જ સિઝનમાં પોતાની કેપ્ટનશિપથી મજબૂત છાપ છોડી હતી. પેટ કમિન્સ સનરાઈઝર્સ હૈદરાબાદને ફાઈનલમાં પહોંચાડનાર પ્રથમ ઓસ્ટ્રેલિયન કેપ્ટન નથી. અગાઉ ડેવિડ વોર્નરે ટીમ માટે આ સિદ્ધિ મેળવી હતી. સનરાઈઝર્સ હૈદરાબાદ આ વખતે એકમાત્ર ટીમ છે જે વિદેશી કેપ્ટન પર દાવ લગાવવા માટે તૈયાર છે.
દેશી કેપ્ટનોની બોલબાલા
જો આપણે IPLની 17 સિઝનના ઈતિહાસ પર નજર કરીએ, તો 2008, 2009 અને 2016ની સિઝન સિવાય, અત્યાર સુધીના બધા ટાઈટલ ભારતીય કેપ્ટનોએ જીત્યા છે. તેમાં સૌથી સફળ મહેન્દ્ર સિંહ ધોની અને રોહિત શર્મા છે, જેમણે પોતાની ટીમ ચેન્નાઈ સુપર કિંગ્સ અને મુંબઈ ઈન્ડિયન્સ પાંચ-પાંચ વખત ચેમ્પિયન બનાવી છે.
કોલકાતા નાઈટ રાઈડર્સ અત્યાર સુધીમાં ત્રણ વખત ચેમ્પિયન બની છે, પરંતુ ત્રણેય વખત તેના કેપ્ટન ભારતીય રહ્યા છે. ભારતીય ટીમના વર્તમાન હેડ કોચ ગૌતમ ગંભીરે બે વાર કેપ્ટન તરીકે અને એક વાર કોચ તરીકે ટીમને સફળ બનાવી છે. છેલ્લી સિઝનમાં, શ્રેયસ અય્યરે KKRને ચેમ્પિયન બનાવ્યું હતું. 2022માં, હાર્દિક પંડ્યાએ ગુજરાત ટાઈટન્સને ચેમ્પિયન બનાવ્યું હતું
ઓસ્ટ્રેલિયન કેપ્ટન સફળ
આશ્ચર્યજનક વાત એ છે કે અત્યાર સુધી આ ખિતાબ ફક્ત ત્રણ વખત વિદેશી કેપ્ટનોએ જીત્યો છે અને ત્રણેય ઓસ્ટ્રેલિયન હતા. શેન વોર્ને 2008માં રાજસ્થાન રોયલ્સને ચેમ્પિયન બનાવ્યું હતું, જ્યારે એડમ ગિલક્રિસ્ટે 2009માં ડેક્કન ચાર્જર્સને ચેમ્પિયન બનાવ્યું હતું અને ડેવિડ વોર્નરે 2016માં સનરાઈઝર્સ હૈદરાબાદને ચેમ્પિયન બનાવ્યું હતું.