ભારતીય મહિલા ક્રિકેટ ટીમે મેળવી મોટી જીત, વર્લ્ડ કપ જીત્યા બાદ હરમનને ભેટી પડ્યા ભૂતપૂર્વ ક્રિકેટર, રડી પડી ઝુલન
છેલ્લું અપડેટ : 03 Nov 2025
ભારતે દક્ષિણ આફ્રિકાને હરાવીને પહેલીવાર મહિલા ODI વર્લ્ડ કપ 2025 જીત્યો ત્યારે ભૂતપૂર્વ ભારતીય મહિલા ક્રિકેટ દિગ્ગજ ઝુલન ગોસ્વામી રડી પડી હતી. રવિવાર, 2 નવેમ્બરના રોજ નવી મુંબઈમાં ભારતે ફાઇનલમાં 52 રનથી જીત મેળવી હતી. ભારતીય મહિલા ક્રિકેટની મહાન ખેલાડીઓમાંની એક ગણાતી ઝુલન ગોસ્વામી 2017માં ટાઇટલ જીતવાની ખૂબ નજીક પહોંચી હતી, પરંતુ તેણે તેની કારકિર્દીમાં ક્યારેય વર્લ્ડ કપ જીત્યો નથી.
ખેલાડીઓને ટ્રોફી પકડેલા જોઈને ઝુલન ભાંગી પડી.
ફાઇનલ પછી, જ્યારે ભારતે ટ્રોફી પ્રસ્તુતિ પૂર્ણ કરી, ત્યારે ખેલાડીઓએ મેદાનમાં લેપ ઓફ ઓર્નર કર્યું. આ દરમિયાન, તેઓ ત્રણ કોમેન્ટ્રી દિગ્ગજોને મળ્યા: ઝુલન ગોસ્વામી, મિતાલી રાજ અને અંજુમ ચોપરા. ભારતીય ટીમે આ ઐતિહાસિક વિજયની ઉજવણીમાં આ ત્રણેયનો સમાવેશ કર્યો અને તેમને ટ્રોફી ઉપાડવાનું સન્માન આપ્યું.
કેપ્ટન હરમનપ્રીત કૌરે ઝુલન ગોસ્વામીને ટ્રોફી સોંપી, ત્યારબાદ ઝુલન પોતાની લાગણીઓને કાબૂમાં રાખી શકી નહીં અને તેની આંખોમાંથી આંસુ વહેવા લાગ્યા.
વિજય પછી, ઝુલને સોશિયલ મીડિયા પ્લેટફોર્મ 'X' પર લખ્યું, "આ મારું સ્વપ્ન હતું, અને તમે લોકોએ તેને સાકાર કર્યું. કપ હવે ઘરે છે."
મંધાના અને હરમનપ્રીત કૌરે વચન આપ્યું હતું
આ ભાવનાત્મક ક્ષણ પછી, ઝુલને ખુલાસો કર્યો કે સ્મૃતિ મંધાના અને હરમનપ્રીત કૌરે તેને વચન આપ્યું હતું કે તેઓ તેના માટે વર્લ્ડ કપ જીતશે. ઝુલને કહ્યું, "તમે જાણો છો, આ વર્લ્ડ કપ પહેલા, તેમણે મને વચન આપ્યું હતું કે અમે તમારા માટે આ કપ જીતીશું. ગયા વર્ષે, તેઓએ કહ્યું હતું કે અમે 2022માં સેમિફાઇનલમાં પહોંચ્યા નથી, પરંતુ આ વખતે અમે ચોક્કસ જીતીશું. હરમન અને સ્મૃતિ મધ્યરાત્રિએ મારા રૂમમાં આવ્યા અને કહ્યું, 'અમને ખબર નથી કે તમે આગલી વખતે ત્યાં હશો કે નહીં, પરંતુ અમે તમારા માટે ટ્રોફી જીતીશું.' અને આજે, તેઓએ તે વચન પૂરું કર્યું, અને તેથી જ હું મારી લાગણીઓને રોકી શકી નહીં."
