ભારતીય ફેન્સ માટે રવિવાર બન્યો 'સુપર સન્ડે', એક જ દિવસમાં રમાશે ભારતની આટલી મેચ
છેલ્લું અપડેટ : 14 Sept 2025
રવિવાર ભારતીય સ્પોર્ટ્સ જગત અને ફેન્સ માટે ખૂબ જ રોમાંચક દિવસ બનવાનો છે. 14 સપ્ટેમ્બરે ક્રિકેટ, હોકી અને બેડમિન્ટનના મેદાન પર ઘણી શાનદાર મેચ થવા જઈ રહી છે, જ્યાં ભારતીય ખેલાડીઓ પાસે ઈતિહાસ રચવાની મોટી તક છે. દુબઈથી લઈને ન્યૂ ચંદીગઢ, હાંગઝોઉ અને હોંગકોંગ સુધી, ફેન્સની નજર ભારતીય ટીમની પાકિસ્તાન સામેની T20 મેગા મેચ, વિમેન્સ ODI મેચ, વિમેન્સ હોકી ટીમની એશિયા કપ ફાઈનલ અને બેડમિન્ટન સ્ટાર્સની સુપર 500 ફાઈનલ પર ટકેલી છે.
એશિયા કપમાં હાઈ-વોલ્ટેજ મુકાબલો
એશિયા કપ 2025ના ગ્રુપ સ્ટેજમાં સૌથી વધુ ચર્ચિત મેચ દુબઈ ઈન્ટરનેશનલ સ્ટેડિયમ ખાતે ભારત અને પાકિસ્તાન વચ્ચે થશે. સૂર્યકુમાર યાદવની કેપ્ટનશિપ હેઠળની ભારતીય ટીમે ટુર્નામેન્ટની શરૂઆત UAE પર નવ વિકેટથી શાનદાર જીત સાથે કરી હતી, અને હવે તે કટ્ટર હરીફ પાકિસ્તાન સામે પોતાનું ફોર્મ જાળવી રાખવા માટે મેદાનમાં ઉતરશે. ભારત અને પાકિસ્તાન વચ્ચેની ક્રિકેટ મેચ હંમેશા લાગણીઓથી ભરેલી રહી છે. પહેલગામમાં આતંકવાદી હુમલા અને ભારત દ્વારા ઓપરેશન સિંદૂર પછી, બંને ટીમો પહેલીવાર એકબીજા સામે ટકરાશે. આ મેચ રાત્રે 8:00 વાગ્યે શરૂ થશે.
ઓસ્ટ્રેલિયન વિમેન્સ ટીમ સામે પહેલી ODI મેચ
વિમેન્સ ODI વર્લ્ડ કપ 30 સપ્ટેમ્બરથી શરૂ થવા જઈ રહ્યો છે. આ મહત્ત્વપૂર્ણ ટુર્નામેન્ટ પહેલા, ભારતીય વિમેન્સ ટીમ અને ઓસ્ટ્રેલિયન વિમેન્સ ટીમ વચ્ચે ત્રણ મેચની ODI સિરીઝ રમાશે. સિરીઝની પહેલી મેચ આજે એટલે કે 14 સપ્ટેમ્બરે ન્યૂ ચંદીગઢના મુલ્લાનપુર સ્ટેડિયમ ખાતે રમાશે. આ મેચ 1:30 વાગ્યે શરૂ થશે. ટોસ મેચ શરૂ થવાના અડધા કલાક પહેલા ઉછાળવામાં આવશે.
વિમેન્સ એશિયા કપ ફાઈનલમાં ચીન સામે ભારતનો પડકાર
ભારતીય વિમેન્સ હોકી ટીમે એશિયા કપ 2025માં પોતાના લડાયક ફોર્મ સાથે ફાઈનલમાં પોતાનું સ્થાન નિશ્ચિત કરી લીધું છે. 14 સપ્ટેમ્બરે હાંગઝોઉના ગોંગશુ કેનાલ સ્પોર્ટ્સ પાર્ક ખાતે યોજાનારી ફાઈનલમાં તે યજમાન ચીનનો સામનો કરશે. સુપર-4 સ્ટેજમાં જાપાન સામે 1-1 ડ્રો રમીને ભારતે ફાઈનલમાં પોતાનું સ્થાન નિશ્ચિત કર્યું હતું, જ્યારે ચીને કોરિયાને 1-0થી હરાવ્યું હતું. સલીમા ટેટની આગેવાની હેઠળની ટીમે ટુર્નામેન્ટમાં અત્યાર સુધી શાનદાર પ્રદર્શન કર્યું છે, જેમાં બ્યુટી ડુંગડુંગ જેવા યુવા સ્ટાર્સે મહત્ત્વપૂર્ણ ગોલ કર્યા છે. ઓલિમ્પિક સિલ્વર મેડલ વિજેતા ચીન એક કઠિન પ્રતિસ્પર્ધી હશે, પરંતુ ભારતના ઝડપી ડિફેન્સ અને એટેક આ ફાઈનલને રોમાંચક બનાવશે. આ જીત સાથે, ફક્ત ખિતાબ જ નહીં, પરંતુ આવતા વર્ષના હોકી વર્લ્ડ કપ માટે ક્વોલિફાય પણ નિશ્ચિત થઈ જશે. આ મેચ સાંજે 5:30 વાગ્યે શરૂ થશે.
હોંગકોંગ ઓપન સુપર 500 ફાઈનલ
બેડમિન્ટન ફેન્સ માટે, હોંગકોંગ ઓપન સુપર 500ની ફાઈનલ પણ 14 સપ્ટેમ્બરે છે, જ્યાં ભારતના બે સ્ટાર્સ ટાઈટલની રેસમાં છે. મેન્સ સિંગલ્સમાં, લક્ષ્ય સેન ચીનના વિશ્વ નંબર-4 લી શી ફેંગ સામે ટકરાશે. લક્ષ્યે સેમીફાઈનલમાં તાઈપેઈના ચાઉં ટિએન ચેનને 23-21, 22-20થી હરાવીને સુપર 500 ફાઈનલમાં સ્થાન મેળવ્યું છે. 2023 કેનેડા ઓપન પછી આ તેની પહેલી સુપર 500 ફાઈનલ હશે, અને આ જીત તેના કારકિર્દીને નવી ઊંચાઈઓ આપશે.
જ્યારે મેન્સ ડબલ્સમાં, સાત્વિકસાઈરાજ રંકીરેડ્ડી અને ચિરાગ શેટ્ટીની જોડીએ પણ ફાઈનલમાં પ્રવેશ કર્યો છે. સેમીફાઈનલમાં તાઈપેઈના બિંગ-વેઈ લિન અને ચેન ચેંગ કુઆનને 21-17, 21-15થી હરાવીને આ જોડી 2025 સિઝનની પહેલી ફાઈનલ રમવા માટે તૈયાર છે. એશિયન ગેમ્સના ગોલ્ડ પછી આ જોડી તેમના પ્રથમ સુપર 500 ટાઈટલની શોધમાં છે. વિશ્વની 9મા નંબરની જોડીનું સંકલન અને સ્મેશ તેમને મજબૂત દાવેદાર બનાવે છે.
