6,6,6,6,6,6... ભારતીય ખેલાડીએ રચ્યો ઈતિહાસ, ફર્સ્ટ-ક્લાસ ક્રિકેટમાં ફટકારી સૌથી ઝડપી ફિફ્ટી
છેલ્લું અપડેટ : 09 Nov 2025
મેઘાલયના ક્રિકેટર આકાશ કુમાર ચૌધરીએ ઐતિહાસિક પ્રદર્શન કર્યું છે. અરુણાચલ પ્રદેશ સામેની રણજી ટ્રોફી પ્લેટ ગ્રુપ મેચ દરમિયાન, આકાશે ફર્સ્ટ-ક્લાસ ક્રિકેટ અને રણજી ટ્રોફી ઈતિહાસમાં સૌથી ઝડપી ફિફ્ટી ફટકારી હતી. સુરતના પીઠાવાલા સ્ટેડિયમ ખાતે રમાઈ રહેલી મેચમાં, આકાશે ફક્ત 11 બોલમાં પોતાની ફિફ્ટી ફટકારી. આકાશની ધમાકેદાર ઈનિંગને કારણે, મેઘાલયે 628/6 પર પોતાની પહેલી ઈનિંગ ડિકલેર કરી.
આકાશ કુમાર ચૌધરીએ વેન વ્હાઈટનો પાછલો રેકોર્ડ તોડ્યો. 2012માં એસેક્સ સામે લેસ્ટરશાયર તરફથી રમતી વખતે વ્હાઈટે 12 બોલમાં પોતાની ફિફ્ટી ફટકારી હતી. આકાશે 14 બોલમાં અણનમ 50 રન બનાવ્યા, જેમાં આઠ જબરદસ્ત છગ્ગાનો સમાવેશ થાય છે. તેણે એક ઓવરમાં સતત છ છગ્ગા પણ ફટકાર્યા હતા.
મેઘાલય માટે પ્રથમ ઈનિંગમાં, અર્પિત ભટેવરાએ સૌથી વધુ 207 રન બનાવ્યા, જેમાં 23 ચોગ્ગા અને 4 છગ્ગાનો સમાવેશ થાય છે. રાહુલ દલાલ અને કેપ્ટન કિશન લિંગદોહે પણ સદીઓ ફટકારી હતી. રાહુલે 102 બોલમાં 144 રન બનાવ્યા, જેમાં 12 ચોગ્ગા અને 9 છગ્ગાનો સમાવેશ થાય છે. લિંગદોહે 187 બોલમાં 119 રન બનાવ્યા, જેમાં 14 ચોગ્ગા અને 1 છગ્ગાનો સમાવેશ થાય છે. ટીએનઆર મોહિતે અરુણાચલ પ્રદેશ માટે સૌથી વધુ ત્રણ વિકેટ લીધી હતી.
આકાશ ચૌધરીની કારકિર્દી કેવી રહી?
આકાશ કુમાર ચૌધરીએ અત્યાર સુધી 31 ફર્સ્ટ-ક્લાસ, 28 લિસ્ટ-A અને 30 T20 મેચ રમી છે. જમણા હાથના ઓલરાઉન્ડર, આકાશે ફર્સ્ટ-ક્લાસ ક્રિકેટમાં 553 રન બનાવ્યા છે, જેમાં 3 અડધી સદીનો સમાવેશ થાય છે. તેણે ફર્સ્ટ-ક્લાસ ક્રિકેટમાં બોલ સાથે પણ શાનદાર પ્રદર્શન કર્યું છે, જેમાં 87 વિકેટ લીધી છે.
25 વર્ષીય આકાશ કુમાર ચૌધરીએ લિસ્ટ-A ક્રિકેટમાં 203 રન (1 અડધી સદી) અને 37 વિકેટ (29.24ની એવરેજ) નોંધાવી છે. T20 ક્રિકેટમાં તેણે 107 રન (10.70ની એવરેજ સરેરાશ) બનાવ્યા છે અને 28 વિકેટ (26.25ની એવરેજ) લીધી છે.
