Asia Cup 2025 / ફાઈનલ પહેલા આજે અંતિમ પ્રેક્ટિસ કરવા ઉતરશે ટીમ ઈન્ડિયા, સુપર-4માં શ્રીલંકા સામે ટકરાશે
છેલ્લું અપડેટ : 26 Sept 2025
રવિવારે, ટીમ ઈન્ડિયા તેની 12મી એશિયા કપ ફાઈનલ રમશે, અને તે પહેલાં, શુક્રવારે સુપર-4 સ્ટેજની છેલ્લી મેચમાં તે શ્રીલંકાનો સામનો કરશે. શ્રીલંકા પહેલાથી જ ફાઈનલની રેસમાંથી બહાર થઈ ગયું છે, અને આ મેચ ફક્ત ઔપચારિકતા છે. જોકે, ફાઈનલ પહેલા ભારત પાસે તેની ખામીઓને દૂર કરવાની અંતિમ તક હશે.
હવે, ટીમે પ્રયોગ કરવાની તેની વ્યૂહરચના છોડીને સ્થિર કોમ્બિનેશન પર ધ્યાન કેન્દ્રિત કરવું પડશે. ઓમાન સામેની મેચમાં ફેરફારો કરવામાં આવ્યા હતા, જેના પરિણામે ભારત લગભગ હાર નજીક પહોંચી ગયું હતું. કેપ્ટન સૂર્યકુમાર યાદવે તે મેચમાં બેટિંગ નહતી કરી. તેવી જ રીતે, ટીમે બાંગ્લાદેશ સામે વિવિધ કોમ્બિનેશનનો પ્રયોગ કર્યો હતો. શિવમ દુબેને ત્રીજા નંબર પર મોકલવામાં આવ્યો હતો, પરંતુ તે ત્રણ બોલમાં ફક્ત બે રન બનાવીને આઉટ થઈ ગયો હતો. દરમિયાન, સ્ટાર બેટ્સમેન સંજુ સેમસનને તક નહતી મળી. હવે, ભારતે પ્રયોગ કરવાને બદલે મજબૂત કોમ્બિનેશન મેદાનમાં ઉતારવું પડશે.
જીતેશને તક મળી શકે છે
મિડલ ઓર્ડરમાં સંજુ સેમસનની નિષ્ફળતા હેડ કોચ ગૌતમ ગંભીર માટે ચિંતાનું કારણ બનશે, અને ટીમ મેનેજમેન્ટ શુક્રવારે શ્રીલંકા સામે એશિયા કપ સુપર-4 તબક્કાની અંતિમ મેચમાં જીતેશ શર્માને અજમાવી શકે છે. બાંગ્લાદેશ પર ભારતની જીતથી શ્રીલંકા ફાઈનલની રેસમાંથી બહાર થઈ ગયું હતું, સુપર-4માં બાંગ્લાદેશ અને પાકિસ્તાન સામે પણ તેનો પરાજય થયો હતો.
રવિવારે ભારત અને પાકિસ્તાન વચ્ચે ફાઈનલ મેચ રમાવાનીછે. સેમસન ભારતીય બેટિંગ ઓર્ડરમાં ફિટ નથી થતો. આ સિવાય ટીમ ઈન્ડિયા માટે ચિંતાનું બીજું કારણ ટુર્નામેન્ટમાં અત્યાર સુધી છોડવામાં આવેલા 12 કેચ છે, જેમાંથી પાંચ બાંગ્લાદેશ સામે હતા. મોટી મેચમાં આવી બેદરકારી નુકસાનકારક સાબિત થઈ શકે છે, અને સ્પિનર વરુણ ચક્રવર્તીએ પણ સ્વીકાર્યું કે આ ક્ષેત્રમાં સુધારાની જરૂર છે. ચક્રવર્તીની ઓવરમાં પણ ઘણા કેચ છોડવામાં આવ્યા છે.
સેમસનને ટોપ સાતમાં પણ ન ઉતાર્યો
બાંગ્લાદેશ સામેની મેચમાં સેમસનનેબેટિંગ લાઈનઅપમાં ટોપ 7 પણ નહતો ઉતારવામાં આવ્યો, અને હવે પ્રશ્ન એ ઊભો થાય છે કે જો તે અક્ષર પટેલ પહેલા રમવાને પણ લાયક નથી, તો તે ટીમમાં શું કરી રહ્યો છે? શિવમ દુબેને ત્રીજા નંબર પર મોકલવો એ અર્થપૂર્ણ છે, કારણ કે તે રિસ્ટ સ્પિનર્સને સારી રીતે રમે છે, પરંતુ મિડલ ઓર્ડરમાં લેફ્ટ-રાઈટ કોમ્બિનેશન માટે તે આદર્શ નહતું. હાર્દિક પંડ્યાને તેની આગળ બે અન્ય લેફટી બેટ્સમેન, તિલક વર્મા અને અક્ષર પટેલ સાથે મોકલવામાં આવ્યો હતો.
ત્રીજા નંબર પર તક શક્ય છે
ફિલ્ડિંગ કોચ રિયાન ટેન ડોશેટે જણાવ્યું હતું કે સંજુ હજુ પણ પાંચમા નંબર પર કેવી રીતે બેટિંગ કરવી તે માટે સંઘર્ષ કરી રહ્યો છે. શ્રીલંકા સામેની ઔપચારિક મેચમાં સેમસનને ત્રીજા નંબર પર સમાવવામાં આવે તેવી શક્યતા છે. એવું માનવામાં આવે છે કે ટોપ ઓર્ડર બેટ્સમેન તરીકે સેમસનનો ભૂતકાળનો રેકોર્ડ જોતા તેને પડતો નથી મૂકવામાં આવી રહ્યો, પરંતુ આ ફોર્મેટમાં દરેક ખેલાડીની ભૂમિકા અનોખી છે.
જીતેશ શર્મા એક મિડલ ઓર્ડર બેટ્સમેન અને ફિનિશર છે. જીતેશે IPLમાં પાંચમા નંબર પર 18 ઈનિંગ્સમાં 374 રન બનાવ્યા છે, જ્યારે છઠ્ઠા નંબર પર 15 ઈનિંગ્સમાં 384 રન બનાવ્યા છે. સાતમા નંબર પર, તેણે સાત ઈનિંગ્સમાં 178થી વધુ સ્ટ્રાઇક રેટ સાથે 136 રન બનાવ્યા છે. આ સિવાય બોલિંગની વાત કરીએ તો જો જસપ્રીત બુમરાહ ઈચ્છે તો તેને શ્રીલંકા સામેની મેચ માટે પણ આરામ આપી શકાય છે.
એશિયા કપ માટે બંને ટીમો
ભારત- સૂર્યકુમાર યાદવ (કેપ્ટન), શુભમન ગિલ (વાઈસ કેપ્ટન), અભિષેક શર્મા, તિલક વર્મા, હાર્દિક પંડ્યા, શિવમ દુબે, અક્ષર પટેલ, જીતેશ શર્મા, જસપ્રીત બુમરાહ, વરુણ ચક્રવર્તી, અર્શદીપ સિંહ, કુલદીપ યાદવ, સંજુ સેમસન, હર્ષિત રાણા, રિંકુ સિંહ.
શ્રીલંકા- ચરિથ અસલંકા (કેપ્ટન), કુસલ મેન્ડિસ (વિકેટકીપર), પથુમ નિસાન્કા, કુસલ પરેરા, કામિલ મિશારા, દાસુન શનાકા, કામિન્દુ મેન્ડિસ, વાનિન્દુ હસરાંગા, નુવાનિડુ ફર્નાન્ડો, દુનિથ વેલ્લાલાગે, ચમિકા કરુણારત્ને, મહિષ તીક્ષણા, મથિશા પથિરાના, નુવાન તુશારા, દુષ્મંથા ચમીરા અને બિનુરા ફર્નાન્ડો.
ભારત vs શ્રીલંકા એશિયા કપમાં હેડ-ટુ-હેડ
કુલ મેચો: 23
ભારત જીત્યું: 12
શ્રીલંકા જીત્યું: 11
