VIDEO: IND vs ENG / ત્રીજી ODI પહેલા ભારતીય ટીમમાં થયો ફેરફાર, ઈજાગ્રસ્ત સુંદરની જગ્યાએ આ ખેલાડીને મળ્યું સ્થાન
છેલ્લું અપડેટ : 19 Jul 2026
ભારત અને ઈંગ્લેન્ડ વચ્ચે 19 જુલાઈ (રવિવાર) ના રોજ લોર્ડ્સમાં ODI સિરીઝનો ત્રીજો અને નિર્ણાયક મુકાબલો રમાવાનો છે. સિરીઝ હાલમાં 1-1ની બરાબરી પર છે. આવી સ્થિતિમાં જે પણ ટીમ આ મુકાબલો જીતશે, તે સિરીઝ પોતાના નામે કરી લેશે. મુકાબલો ભારતીય સમય અનુસાર બપોરે 3:30 વાગ્યે શરૂ થશે.
ટીમ ઈન્ડિયાને મોટો ઝટકો અને હર્ષ દુબેની એન્ટ્રી
લોર્ડ્સ ODI પહેલા ટીમ ઈન્ડિયાને મોટો ઝટકો લાગ્યો હતો. સ્ટાર ઓલરાઉન્ડર વોશિંગ્ટન સુંદર ઈજાના કારણે આ મેચમાંથી બહાર થઈ ગયો હતો. હવે વોશિંગ્ટન સુંદરના રિપ્લેસમેન્ટની જાહેરાત કરી દેવામાં આવી છે. તેની જગ્યાએ ઘરેલું ક્રિકેટમાં શાનદાર પ્રદર્શન કરનારા સ્પિન બોલિંગ ઓલરાઉન્ડર હર્ષ દુબેને ટીમ ઈન્ડિયામાં સામેલ કરવામાં આવ્યો છે. ભારતીય ક્રિકેટ કંટ્રોલ બોર્ડ (BCCI) એ આજે શનિવારે સત્તાવાર પુષ્ટિ કરી છે.
વોશિંગ્ટન સુંદરને હેમસ્ટ્રિંગ ઈજા
BCCIના જણાવ્યા અનુસાર, વોશિંગ્ટન સુંદરને બીજી ODI દરમિયાન જમણી હેમસ્ટ્રિંગ (જમણા પગના સાથળની પાછળના ભાગના સ્નાયુઓ ખેંચાઈ જવા) ઈજા થઈ હતી. મેડિકલ તપાસ બાદ તેને સિરીઝના અંતિમ મુકાબલામાંથી બહાર કરી દેવામાં આવ્યા. બોર્ડે જણાવ્યું કે સુંદર હવે સ્કેન કરાવશે અને આગળની સારવાર માટે નિષ્ણાત ડોક્ટરની સલાહ લેશે. હાલમાં તેની રિકવરીને લઈને કોઈ સમયમર્યાદા જણાવવામાં આવી નથી.
ઓલરાઉન્ડર હર્ષ દુબેની પસંદગી
વોશિંગ્ટન સુંદર બહાર થયા બાદ પસંદગીકારોએ હર્ષ દુબે પર ભરોસો દર્શાવ્યો. ડાબા હાથના સ્પિન બોલર અને ઉપયોગી બેટ્સમેન હર્ષે છેલ્લા કેટલાક સમયમાં ઘરેલું ક્રિકેટમાં સતત પ્રભાવશાળી પ્રદર્શન કર્યું છે, જેના કારણે તેને ફરી એકવાર ભારતીય ટીમમાં સ્થાન મળ્યું છે. હર્ષ દુબેએ ગયા મહિને અફઘાનિસ્તાન સામે પોતાનું ODI ઇન્ટરનેશનલ ડેબ્યુ કર્યું હતું. હર્ષે અત્યાર સુધી બે ODI મેચોમાં 7.08ના ઇકોનોમી રેટથી 4 વિકેટ ઝડપી છે.
વોશિંગ્ટન સુંદર ભારત માટે બોલ અને બેટ બંનેથી મહત્ત્વની ભૂમિકા ભજવી રહ્યો હતો. મિડલ ઓર્ડરમાં ઉપયોગી બેટિંગની સાથે-સાથે પાવરપ્લે અને મિડલ ઓવર્સમાં કરકસરભરી સ્પેલ નાખવાની તેમની ક્ષમતા ટીમને વધારાનું સંતુલન આપે છે. આવી સ્થિતિમાં નિર્ણાયક મુકાબલા પહેલા તેનું બહાર થવું કેપ્ટન શુભમન ગિલ અને ટીમ મેનેજમેન્ટ માટે ચિંતાની વાત હશે.
ભારતની ટીમ
શુભમન ગિલ (કેપ્ટન), રોહિત શર્મા, વિરાટ કોહલી, શ્રેયસ અય્યર (ઉપકેપ્ટન), કેએલ રાહુલ (વિકેટકીપર), ઈશાન કિશન (વિકેટકીપર), અક્ષર પટેલ, શિવમ દુબે, કુલદીપ યાદવ, જસપ્રિત બુમરાહ, પ્રસિદ્ધ કૃષ્ણા, અર્શદીપ સિંહ, ગુરનૂર બરાર, પ્રિન્સ યાદવ અને હર્ષ દુબે.
