ભૂતપૂર્વ ઓલિમ્પિયન શિવપાલ સિંહ પર 10 વર્ષનો પ્રતિબંધ, NADAએ ડોપિંગ માટે કરી કાર્યવાહી
છેલ્લું અપડેટ : 21 Aug 2026
ટોક્યો ઓલિમ્પિકમાં ભારતનું પ્રતિનિધિત્વ કરનારા શિવપાલ સિંહ પર NADA દ્વારા 10 વર્ષનો પ્રતિબંધ મૂકવામાં આવ્યો છે. 31 વર્ષીય જેવલિન થ્રોઅર પર બીજી વખત ડોપિંગનો આરોપ મૂકવામાં આવ્યો છે, જેના કારણે અધિકારીઓએ તેને કડક સજા ફટકારી છે. શિવપાલે દોહામાં 2019 એશિયન ચેમ્પિયનશિપમાં ભારત માટે ગોલ્ડ મેડલ જીત્યો હતો અને ઓલિમ્પિકમાં પણ ભાગ લીધો હતો. તેણે ફરીથી નિયમોનું ઉલ્લંઘન કર્યું છે, જેના કારણે NADAએ તેની સામે કડક કાર્યવાહી કરી છે.
શિવપાલ સિંહ પર પ્રતિબંધ
ટોક્યોના ભૂતપૂર્વ ઓલિમ્પિયન શિવપાલ સિંહનો એનાબોલિક સ્ટેરોઈડ મેથેન્ડીએનોન માટે ટેસ્ટ પોઝિટિવ આવ્યો છે. આ તેમનો બીજી વખત ડોપિંગનો દોષી સાબિત થયો છે. પરિણામે, રાષ્ટ્રીય ડોપિંગ વિરોધી એજન્સી (NADA) એ તેના પર 10 વર્ષનો પ્રતિબંધ લાદ્યો છે. આ પ્રતિબંધ શિવપાલ સિંહની સ્પર્ધાત્મક કારકિર્દીનો અંત લાવી શકે છે. 31 વર્ષીય શિવપાલ માટે 10 વર્ષ પછી અત્યાર જેવું પ્રદર્શન કરવું અશક્ય બનશે.
અગાઉના પ્રતિબંધો
શિવપાલ સિંહ 2021માં ડોપિંગ કેસમાં પકડાયો હતો. સ્પર્ધા બહારના નિયમિત પરીક્ષણમાં તેના લોહીમાં સ્ટેરોઈડ્સ મળી આવ્યા હતા. પરિણામે, રાષ્ટ્રીય ડોપિંગ વિરોધી એજન્સી (NADA) એ ઓગસ્ટ 2022માં તેના પર ચાર વર્ષનો પ્રતિબંધ લાદ્યો હતો. જોકે, શિવપાલ સિંહે NADA અપીલ પેનલ સમક્ષ આ પ્રતિબંધને પડકાર્યો હતો.
શિવપાલે દાવો કર્યો હતો કે ભેળસેળયુક્ત સપ્લિમેન્ટ્સના ઉપયોગને કારણે તેનો ટેસ્ટ પોઝિટિવ આવ્યો હતો. ત્યારબાદ, તેનો પ્રતિબંધ ચાર વર્ષથી ઘટાડીને એક વર્ષ કરવામાં આવ્યો હતો. શિવપાલ સિંહ એપ્રિલ 2023માં રમતમાં પાછો ફર્યો, રાષ્ટ્રીય આંતર-રાજ્ય ચેમ્પિયનશિપમાં બ્રોન્ઝ મેડલ અને પછી નેશનલ ગેમ્સમાં ગોલ્ડ મેડલ જીત્યો. જોકે, બીજી વખત ડોપિંગનો આરોપ લાગ્યા બાદ, હવે તેની વાપસી મુશ્કેલ લાગે છે.