VIDEO: 'પહેલા તમારી જાતને શિક્ષિત કરો...', ક્રિકેટ ઓસ્ટ્રેલિયાના નિર્ણય સામે વાંધો ઉઠાવનાર મેરિઝાન કાપને અનાયા બાંગરે આપ્યો જવાબ
છેલ્લું અપડેટ : 29 Aug 2026
મેદાનમાં પાછા ફરવાની તૈયારી કરી રહેલી અનાયા બાંગરે સાઉથ આફ્રિકાની ઓલરાઉન્ડર મેરિઝાન કાપને તીખો જવાબ આપ્યો છે. કેપે ક્રિકેટ ઓસ્ટ્રેલિયા (CA) દ્વારા અનાયાને મહિલા ક્રિકેટમાં પાછા ફરવાની મંજૂરી આપવાના નિર્ણય સામે સખત વાંધો ઉઠાવ્યો હતો. હવે છોકરામાંથી છોકરી બનેલી અનાયાએ કહ્યું છે કે આ મુદ્દા પર પ્રશ્નો ઉઠાવનારાઓએ પહેલા સંપૂર્ણ માહિતી મેળવવી જોઈએ.
કાપે ક્રિકેટ ઓસ્ટ્રેલિયાના નિર્ણયને "એકદમ હાસ્યાસ્પદ" ગણાવ્યો અને કહ્યું કે મહિલા ક્રિકેટમાં આવું ન થવું જોઈએ. સમાચાર એજન્સી PTI સાથેની એક મુલાકાતમાં, અનાયાએ કાપની ટિપ્પણીઓનો જવાબ આપ્યો અને તેની પાત્રતા પ્રક્રિયાની વિગતવાર માહિતી આપી. મેરિઝાન કાપની ટિપ્પણીઓ વિશે પૂછવામાં આવતા, અનાયાએ સ્પષ્ટપણે કહ્યું કે વિરોધ કરનારાઓએ પહેલા આ મુદ્દાને સમજવાનો પ્રયાસ કરવો જોઈએ.
તેણે કહ્યું, "જેઓ આની સામે અવાજ ઉઠાવવા માંગે છે તેઓએ પોતાને આ વિષય પર શિક્ષિત કરવા જોઈએ. મેં પહેલાથી જ જરૂરી માહિતી પૂરી પાડી છે મને કોઈ વધારાનો લાભ નથી મળી રહ્યયો અને હું ક્રિકેટ ઓસ્ટ્રેલિયાની માર્ગદર્શિકાનું પાલન કરી રહી છું." અનાયાએ કહ્યું કે જો કોઈનો અલગ અભિપ્રાય હોય, તો તેમણે આ વિષય પર વધુ માહિતી મેળવવી જોઈએ. ક્રિકેટ ઓસ્ટ્રેલિયાની મંજૂરી મળવાથી અનાયાના ક્રિકેટમાં પાછા ફરવાનો માર્ગ મોકળો થયો છે, પરંતુ તેને હજુ સુધી કોઈ પ્રોફેશનલ ટીમમાં સીધો પ્રવેશ નથી મળ્યો.
હાલમાં, તે ઓસ્ટ્રેલિયાના કોઈપણ રાજ્ય અથવા પ્રદેશમાં પ્રીમિયર ક્રિકેટ રમી શકે છે. આ હાંસલ કરવા માટે, તે ઘણી સ્થાનિક ક્લબોના સંપર્કમાં છે અને ટૂંક સમયમાં યોગ્ય ટીમ પસંદ કરવાની તૈયારી કરી રહી છે. તેનું અંતિમ લક્ષ્ય મહિલા બિગ બેશ લીગ (WBBL) સુધી પહોંચવાનું છે. જોકે, ત્યાં સ્થાન મેળવવા માટે, તેણે પહેલા ક્લબ ક્રિકેટમાં પ્રદર્શન કરીને પોતાને સાબિત કરવાની જરૂર પડશે.
અનાયા બાંગરે પોતાની સફર વિશે વાત કરતા કહ્યું કે તે લાંબા સમયથી સર્વાઈવલ મોડમાં હતી. હવે, તે ધીમે ધીમે તે સમયની ઘટનાઓ સાથે તાલમેલ કરી રહી છે અને તેના જીવનને ફરીથી ગોઠવી રહી છે. તેણે કહ્યું કે આગળની સફર નાના પગલાઓથી શરૂ થશે.
અનાયા બાંગરે એ પણ સ્પષ્ટતા કરી કે ક્રિકેટ ઓસ્ટ્રેલિયાનો નિર્ણય કોઈ નિયમિત કે અનૌપચારિક પ્રક્રિયા નહોતી. બોર્ડે તેના કેસના અનેક પાસાઓની સમીક્ષા કરી. તેના મતે, આમાં તેનો તબીબી અને સર્જિકલ ઈતિહાસ, હોર્મોન અને ટેસ્ટોસ્ટેરોન રિપોર્ટ્સ, ક્રિકેટિંગ બેકગ્રાઉન્ડ, મેચ ફૂટેજ અને માન્ચેસ્ટર મેટ્રોપોલિટન યુનિવર્સિટી ખાતે ઈન્સ્ટિટ્યૂટ ઓફ સ્પોર્ટ દ્વારા હાથ ધરવામાં આવેલા વૈજ્ઞાનિક અને એથ્લેટિક પ્રદર્શન કાર્યનો સમાવેશ થાય છે. અનાયાએ જણાવ્યું હતું કે જુલાઈમાં હાથ ધરવામાં આવેલા તેના તાજેતરના બ્લડ ટેસ્ટમાં કુલ ટેસ્ટોસ્ટેરોન સ્તર 0.6 નેનોમોલ્સ પ્રતિ લિટર દર્શાવવામાં આવ્યું હતું.
અનાયા બાંગરની એલિટ ક્રિકેટમાં પાછા ફરવાની લાયકાત માર્ચ 2027થી અમલમાં આવનારી નીતિ શરતોને આધીન છે. ત્યાં સુધી તે કોમ્યુનિટી અથવા પ્રીમિયર ક્રિકેટમાં રમી શકે છે. આનો અર્થ એ છે કે ક્રિકેટ ઓસ્ટ્રેલિયાની મંજૂરીને WBBL કરાર અથવા પસંદગી ગણી શકાય નહીં. અનાયાને હજુ પણ ફિટનેસ પાછી મેળવવાની, ક્લબ ક્રિકેટમાં પ્રદર્શન કરવાની અને પછી ઉચ્ચતમ સ્તરે પસંદગી માટે લાયક સાબિત કરવાની જરૂર છે.
