US Open / જોકોવિચે 25મો ગ્રાન્ડ સ્લેમ જીતવા વધુ રાહ જોવી પડશે, અલ્કારાઝ સામે હાર્યો; નિવૃત્તિ પર આપ્યું નિવેદન
છેલ્લું અપડેટ : 06 Sept 2025
સર્બિયાના નોવાક જોકોવિચનો રેકોર્ડ 25મો ગ્રાન્ડ સ્લેમ જીતવાનો ઈંતેજાર ફરી એકવાર લંબાયો છે. વર્ષના છેલ્લા ગ્રાન્ડ સ્લેમ, યુએસ ઓપન (US Open) ના મેન્સ સિંગલ્સ કેટેગરીના સેમીફાઈનલમાં જોકોવિચ કાર્લોસ અલ્કારાઝ સામે હારી ગયો. સ્પેનના અલ્કારાઝે 24 વખતના ગ્રાન્ડ સ્લેમ વિજેતાને 2 કલાક અને 23 મિનિટ ચાલેલી મેચમાં 6-4, 7-6 (4), 6-2થી હરાવીને ફાઈનલમાં પ્રવેશ કર્યો.
અલ્કારાઝે શરૂઆતથી જ પોતાની પકડ મજબૂત કરી
આ સાથે, અલ્કારાઝ સતત આઠમી ATP ટૂર ફાઈનલમાં પહોંચી ગયો છે. ટાઈટલ મેચમાં યાનિક સિનરનો સામનો કરશે, જેણે બીજી સેમીફાઈનલ મેચમાં ફેલિક્સ ઓગર અલિયાસીમેને હરાવ્યો હતો. અલ્કારાઝને શરૂઆતથી જ જોકોવિચ સામે લીડ મળીહતી અને તેણે પહેલો સેટ ફક્ત 48 મિનિટમાં જીતી લીધો હતો. જોકોવિચે બીજા સેટમાં વાપસી કરી અને 3-0ની લીડ મેળવી, પરંતુ અલ્કારાઝે ટૂંક સમયમાં સ્કોર 3-3 કરી દીધો. આ સેટ ટાઈ બ્રેકરમાં ગયો જ્યાં અલ્કારાઝે તેને જીતવામાં સફળ રહ્યો. ત્રીજા સેટમાં, સ્પેનિશ ખેલાડીએ શરૂઆતમાં લીડ લીધી અને પછી જોકોવિચને કોઈ તક ન આપી.
જોકોવિચે નિવૃત્તિના અહેવાલોને ફગાવી દીધા
યુએસ ઓપન સેમીફાઈનલમાં પોતાની સફર સમાપ્ત કર્યા પછી, જોકોવિચે નિવૃત્તિના અહેવાલોને ફગાવી દીધા છે. જોકોવિચે સ્પષ્ટ કર્યું છે કે તેની નજર 2026માં યોજાનારી ગ્રાન્ડ સ્લેમમાં રમવા પર છે. જોકોવિચે કહ્યું, "જોઈશું. મારે મારી ટીમ સાથે તેના વિશે વાત કરવી પડશે. આ લાગણી આ ગ્રાન્ડ સ્લેમ સિઝન પછી ચોક્કસપણે છે. હું આવતા વર્ષે પણ આખી ગ્રાન્ડ સ્લેમ સિઝન રમવા માંગુ છું, પરંતુ તે થાય છે કે નહીં તે પછીથી ખબર પડશે. ગ્રાન્ડ સ્લેમ ખાસ છે. આ કોઈપણ અન્ય ટુર્નામેન્ટથી અલગ છે, આ અમારી રમતનો આધારસ્તંભ છે અને સૌથી મહત્ત્વપૂર્ણ ઈવેન્ટ છે."
