VIDEO: IND vs ENG / ચોથી T20 માટે મેદાન પર ઉતરતા જ અક્ષર પટેલ રચશે ઈતિહાસ, ધોનીનો રેકોર્ડ તોડશે
છેલ્લું અપડેટ : 09 Jul 2026
ભારત અને ઈંગ્લેન્ડ વચ્ચેની T20 સિરીઝની ચોથી મેચ ગુરુવારે બ્રિસ્ટલના કાઉન્ટી ગ્રાઉન્ડ પર રમાવાની છે. આ મેચમાં પ્લેઈંગ ઈલેવનમાં સામેલ થતાં જ ભારતીય ઓલરાઉન્ડર અક્ષર પટેલ એક મોટી સિદ્ધિ પોતાના નામે કરી શકે છે. અક્ષર પટેલે અત્યાર સુધી ભારત માટે 99 T20 ઈન્ટરનેશનલ મેચ રમી છે, જેમાં તેણે 746 રન બનાવવાની સાથે 101 વિકેટ પણ ઝડપી છે. જો ગુરુવારની મેચમાં તેને તક મળશે, તો આ તેના કરિયરની 100મી T20 ઈન્ટરનેશનલ મેચ હશે અને તે ભારત તરફથી આ મુકામ હાંસલ કરનારો માત્ર પાંચમો ખેલાડી બની જશે.
મહેન્દ્ર સિંહ ધોનીનો રેકોર્ડ તૂટશે
આ મેચમાં મેદાન પર ઉતરતાની સાથે જ અક્ષર પટેલ પૂર્વ કેપ્ટન મહેન્દ્ર સિંહ ધોનીને પાછળ છોડી દેશે. ધોનીએ પોતાના કરિયરમાં ભારત તરફથી 99 T20 ઈન્ટરનેશનલ મેચ રમી હતી. અત્યાર સુધી ભારતના માત્ર 4 ખેલાડીઓ જ 100થી વધુ T20 મેચ રમી શક્યા છે, જેમાં રોહિત શર્મા (161 મેચ) પ્રથમ સ્થાને, હાર્દિક પંડ્યા (138 મેચ) બીજા સ્થાને, વિરાટ કોહલી (127 મેચ) ત્રીજા સ્થાને અને સૂર્યકુમાર યાદવ (115 મેચ) ચોથા સ્થાને છે.
100 વિકેટ ઝડપનારો પ્રથમ સ્પિનર
અક્ષર પટેલે ઈંગ્લેન્ડ સામેની બીજી T20 મેચમાં હેરી બ્રુકને આઉટ કરીને પોતાની 100 વિકેટ પૂરી કરી હતી અને તે આ સિદ્ધિ મેળવનારો ભારતનો પ્રથમ સ્પિનર બન્યો હતો. જોકે, આ સિરીઝની 3 મેચોમાં તે માત્ર 15 રન અને 2 વિકેટ જ લઈ શક્યો હોવાથી ચોથી મેચમાં તેના તરફથી સારા પ્રદર્શનની આશા રહેશે.
ત્રીજી T20માં ભારતની શરમજનક હાર
નોટિંઘમના ટ્રેન્ટ બ્રિજ ખાતે રમાયેલી ત્રીજી T20 મેચમાં ભારતીય ટીમનો ઈંગ્લેન્ડ સામે 125 રને કારમો પરાજય થયો હતો. ઈંગ્લેન્ડના 202 રનના લક્ષ્યાંકનો પીછો કરતાં ભારતીય ટીમ માત્ર 76 રનમાં ઓલઆઉટ થઈ ગઈ હતી. જેમાં ટીમના 7 બેટ્સમેનો ડબલ ડિજિટ (બે આંકડા) નો સ્કોર પણ પાર નહતા કરી શક્યા. ટીમ વતી વૈભવ સૂર્યવંશીએ સૌથી વધુ 13 રન બનાવ્યા હતા.
