VIDEO: IND vs ZIM / ઝિમ્બાબ્વે સામેની સિરીઝમાં આ અનિચ્છનીય રેકોર્ડ બનાવી શકે છે અભિષેક શર્મા, એક ભૂલથી થશે ભારે નુકસાન
છેલ્લું અપડેટ : 23 Jul 2026
આયર્લેન્ડ અને ઈંગ્લેન્ડ સામે નિરાશાજનક પ્રદર્શન બાદ, ટીમ ઈન્ડિયા હવે ઝિમ્બાબ્વે સામે ગુરુવાર, 23 જુલાઈથી શરૂ થનારી ત્રણ મેચની T20 સિરીઝમાં મેદાનમાં ઉતરશે. ભારતીય ટીમ આ સિરીઝમાં જીતના માર્ગે વાપસી કરવા માંગશે, ત્યારે સ્ટાર ઓપનર અભિષેક શર્મા અનિચ્છનીય રેકોર્ડ બનાવવાનું ટાળવા માંગશે.
અભિષેક શર્મા અનિચ્છનીય રેકોર્ડ બનાવી શકે છે
ઝિમ્બાબ્વે સામેની T20 સિરીઝમાં બધાની નજર અભિષેક શર્મા પર રહેશે. જો અભિષેક સિરીઝની કોઈપણ મેચમાં રન બનાવ્યા વિના આઉટ થાય છે, તો તે T20 ક્રિકેટ ઈતિહાસમાં એક કેલેન્ડર વર્ષમાં સૌથી વધુ વખત શૂન્ય પર આઉટ થનાર ખેલાડી બની જશે. આ એક એવો રેકોર્ડ છે જે કોઈ પણ બેટ્સમેન પોતાના નામે કરવા નહીં માંગે.
9 વખત શૂન્ય પર આઉટ
2026માં અત્યાર સુધીમાં અભિષેક શર્મા T20 ક્રિકેટમાં 9 વખત શૂન્ય પર આઉટ થયો છે. હાલમાં તે એક કેલેન્ડર વર્ષમાં સૌથી વધુ વખત શૂન્ય પર આઉટ થવાનો રેકોર્ડ ધરાવે છે, જે અફઘાનિસ્તાનના રાશિદ ખાન (2019) અને પાકિસ્તાનના શાદાબ ખાન (2024) સાથે બરાબર છે. વધુ એક શૂન્ય તેને આ શરમજનક રેકોર્ડમાં ટોપ પર પહોંચાડશે, જેને અભિષેક ટાળવા માંગશે.
આક્રમક બેટિંગનો પ્રભાવ
25 વર્ષીય અભિષેક શર્મા તેની વિસ્ફોટક બેટિંગ માટે જાણીતો છે. તે ઈનિંગની શરૂઆતથી જ મોટા શોટ રમવાનો પ્રયાસ કરે છે અને આ આક્રમક અભિગમને કારણે તે ઘણીવાર ખાતું ખોલ્યા વિના પણ પવેલિયન પાછો ફરે છે. જોકે, જ્યારે તેનું બેટ ફોર્મમાં હોય છે, ત્યારે તેની પાસે કોઈપણ બોલિંગ યુનિટને તોડી નાખવાની શક્તિ હોય છે.
9 વખત શૂન્ય પર આઉટ થવા છતાં 1000થી વધુ રન
જોકે, નવ વખત શૂન્ય પર આઉટ થવા છતાં, અભિષેક શર્માનું બેટ આખા વર્ષ દરમિયાન પ્રભાવશાળી રહ્યું છે. 2026માં, અભિષેક T20 ક્રિકેટમાં સૌથી વધુ રન બનાવનારા ખેલાડીઓની યાદીમાં 7મા ક્રમે છે. તેણે આ વર્ષે અત્યાર સુધીમાં રમાયેલી 35 T20 મેચોમાં 32.30ની એવરેજ અને 200.37ના પ્રભાવશાળી સ્ટ્રાઈક રેટથી 1066 રન બનાવ્યા છે.
ઝિમ્બાબ્વે સામે અભિષેકનો રેકોર્ડ
રસપ્રદ વાત એ છે કે, અભિષેકે 2024માં ઝિમ્બાબ્વે સામે T20I ક્રિકેટમાં ડેબ્યુ કર્યું હતું. પોતાની પહેલી મેચમાં કોઈરન વગર આઉટ થયા બાદ, તેણે પોતાની બીજી મેચમાં શાનદાર સદી ફટકારી હતી. તેણે ઝિમ્બાબ્વે સામે અત્યાર સુધીમાં છ મેચની 5 ઈનિંગ્સમાં 177ના સ્ટ્રાઈક રેટથી 179 રન બનાવ્યા છે.
