T20 વર્લ્ડ કપમાં 43 વર્ષના ખેલાડીએ રચ્યો ઈતિહાસ, બોલિંગમાં કર્યું આ અદ્ભુત કારનામું

T20 વર્લ્ડ કપ 2024ની 9મી મેચ ગયાનાના મેદાન પર ગ્રુપ Cની બે ટીમો પાપુઆ ન્યુ ગિની અને યુગાન્ડા વચ્ચે રમાઈ હતી. આ મેચમાં યુગાન્ડાની ટીમ 3 વિકેટે જીતી હતી પરંતુ બંને ટીમો તરફથી ખૂબ જ ખરાબ બેટિંગ પ્રદર્શન જોવા મળ્યું હતું. પાપુઆ ન્યુ ગિનીએ પ્રથમ ઈનિંગમાં 19.1 ઓવરમાં માત્ર 77 રન બનાવ્યા હતા, તો યુગાન્ડાએ આ ટાર્ગેટ 18.2 ઓવરમાં 7 વિકેટના નુકસાને હાંસલ કર્યો હતો. યુગાન્ડા માટે આ મેચમાં 43 વર્ષના લેફ્ટ આર્મ સ્પિનર ​​ફ્રેન્ક નસુબુગાએ પોતાની 4 ઓવરમાં માત્ર 4 રન આપીને T20 વર્લ્ડ કપના ઈતિહાસમાં નવો રેકોર્ડ બનાવ્યો હતો.

આ વર્લ્ડ કપમાં યુગાન્ડાની ટીમનો સૌથી મોટી ઉંમરનો ખેલાડી ફ્રેન્ક નસુબુગા હવે T20 વર્લ્ડ કપના ઈતિહાસમાં સૌથી ઈકોનોમિકલ સ્પેલ ફેંકનાર ખેલાડી બની ગયો છે. PNG સામેની મેચમાં નસુબુગાએ 4 ઓવરમાં 4 રન આપ્યા અને 2 વિકેટ પણ લીધી હતી. નસુબુગા પહેલા આ રેકોર્ડ દક્ષિણ આફ્રિકાની ટીમના ફાસ્ટ બોલર એનરિક નોરખિયાના નામે હતો, જેણે આ જ વર્લ્ડ કપમાં શ્રીલંકા સામેની મેચમાં પોતાની 4 ઓવરમાં 4 વિકેટ લેવાની સાથે 7 રન આપ્યા હતા.

T20 વર્લ્ડ કપમાં 4 ઓવરના સ્પેલમાં સૌથી ઈકોનોમિકલ બોલર

• ફ્રેન્ક નસુબુગા – 4 રનમાં 2 વિકેટ vs પાપુઆ ન્યુ ગિની, 2024
• એનરિક નોરખિયા – 7 રનમાં 4 વિકેટ vs શ્રીલંકા, 2024
• અજંતા મેન્ડિસ – 8 રનમાં 6 વિકેટ  vs ઝિમ્બાબ્વે, 2012
• મહમુદુલ્લાહ – 8 રનમાં 1 વિકેટ vs અફઘાનિસ્તાન, 2014
• વાનિન્દુ હસરંગા – 8 રનમાં 3 વિકેટ vs UAE, 2022