પિતૃપક્ષમાં ઘરના મુખ્ય દરવાજાનું રાખો વિશેષ ધ્યાન; વાસ્તુના આ સરળ નિયમોથી પિતૃઓ થશે પ્રસન્ન, ઘરમાં આવશે સુખ-સમૃદ્ધિ
છેલ્લું અપડેટ : 23 Sept 2026
હિન્દુ ધર્મમાં પિતૃપક્ષનો સમયગાળો અત્યંત પવિત્ર અને મહત્વપૂર્ણ માનવામાં આવે છે. આ દિવસો દરમિયાન શ્રદ્ધાળુઓ પોતાના પિતૃઓને યાદ કરી તેમને આદરપૂર્વક ઘરમાં પધારવા આમંત્રણ આપે છે. સાથે જ પિતૃઓના આત્માની શાંતિ માટે તર્પણ, શ્રાદ્ધ અને પિંડદાન કરે છે.
માન્યતાઓ અનુસાર, પિતૃપક્ષ દરમિયાન વાસ્તુના કેટલાક ચોક્કસ નિયમોનું પાલન કરવાથી પિતૃઓ પ્રસન્ન થાય છે અને ઘરમાં સુખ-શાંતિ જળવાઈ રહે છે. વાસ્તુશાસ્ત્ર મુજબ, ઘરનો મુખ્ય દરવાજો સકારાત્મક ઊર્જાના પ્રવેશનો મુખ્ય માર્ગ છે. તેથી પિતૃપક્ષ દરમિયાન ઘરના મુખ્ય પ્રવેશદ્વારને લઈને કેટલીક વિશેષ બાબતોનું ધ્યાન રાખવું જરૂરી છે.
મુખ્ય દરવાજાની સ્વચ્છતા રાખો
પિતૃપક્ષ દરમિયાન ઘરના મુખ્ય દરવાજા અને તેની આસપાસના ભાગને સંપૂર્ણપણે સ્વચ્છ રાખો. ત્યાં ધૂળ કે કચરો જમા ન થવા દો અને જો જાળાં હોય તો તેને તરત સાફ કરો. પ્રવેશદ્વાર પાસે જૂના ખોખાં, તૂટેલી વસ્તુઓ કે નકામો ભંગાર રાખવાનું ટાળો. વાસ્તુ અનુસાર સ્વચ્છ પ્રવેશદ્વાર ઘરમાં સકારાત્મક ઊર્જા આકર્ષે છે.
બૂટ-ચંપલ વ્યવસ્થિત રાખો
મુખ્ય દરવાજા પાસે અસ્તવ્યસ્ત પડેલા બૂટ-ચંપલ નકારાત્મક ઊર્જા વધારે છે. તેથી તેને દરવાજાની સામે વેરવિખેર રાખવાને બદલે સ્ટેન્ડમાં વ્યવસ્થિત ગોઠવો. વાસ્તુ નિયમો મુજબ, બૂટ-ચંપલ રાખવા માટે દક્ષિણ કે પશ્ચિમ દિશા સૌથી ઉત્તમ માનવામાં આવે છે.
તોરણ અને રંગોળીથી સ્વાગત કરો
પિતૃપક્ષ એ માત્ર શોકનો સમય નથી, પરંતુ પિતૃઓ પ્રત્યે આદર અને કૃતજ્ઞતા વ્યક્ત કરવાનો પવિત્ર અવસર છે. એવું માનવામાં આવે છે કે આ દિવસોમાં પિતૃઓ ઘરમાં સૂક્ષ્મ રૂપે વાસ કરે છે. તેથી મુખ્ય દરવાજે આસોપાલવ કે આંબાના પાન અને ગલગોટાના ફૂલોનું તોરણ બાંધવું શુભ રહે છે. સાથે જ દરવાજા પાસે સાત્વિક અને નાની રંગોળી બનાવીને વાતાવરણને પવિત્ર રાખી શકાય છે.
દરવાજામાંથી અવાજ ન આવવો જોઈએ
મુખ્ય દરવાજો ખોલતી કે બંધ કરતી વખતે જો તેમાંથી કર્કશ કે ચીંચીં અવાજ આવતો હોય, તો તેને વાસ્તુમાં અશુભ માનવામાં આવે છે. આવા અવાજથી ઘરમાં નકારાત્મકતા વધે છે. તેથી સમયસર કબજા (Hinges) પર તેલ લગાવીને તેનું સમારકામ કરાવી લેવું જોઈએ, જેથી ઘરમાં શાંતિપૂર્ણ વાતાવરણ જળવાઈ રહે.
સાંજના સમયે પૂરતો પ્રકાશ રાખો
સાંજના સમયે મુખ્ય પ્રવેશદ્વાર પર અંધારું ન રહેવું જોઈએ. દરવાજા પાસે યોગ્ય લાઈટ અથવા ઘી/તેલનો દીવો પ્રગટાવવો જોઈએ. પૂરતો પ્રકાશ હોવાથી પિતૃઓનું આગમન સુગમ બને છે અને ઘરમાં નકારાત્મક શક્તિઓ પ્રવેશતી નથી.
ઉંબરાની પવિત્રતા જાળવો
પિતૃપક્ષ દરમિયાન ઘરના ઉંબરાનું વિશેષ મહત્વ હોય છે. જો શક્ય હોય તો ઉંબરાને ગાયના છાણ અથવા ગંગાજળ મિશ્રિત જળથી પવિત્ર કરવો જોઈએ. જો ઉંબરો તૂટેલો કે ક્ષતિગ્રસ્ત હોય, તો પિતૃપક્ષ પહેલાં જ તેનું સમારકામ કરાવી લેવું હિતાવહ છે.
પ્રવેશદ્વાર નજીક શુભ છોડ લગાવો
વાસ્તુ મુજબ, મુખ્ય દરવાજાની આસપાસ તુલસી, શમી અથવા આસોપાલવ જેવા શુભ છોડ રાખવા અત્યંત લાભદાયક ગણાય છે. આ છોડ ઘરમાં સકારાત્મકતા લાવે છે અને પિતૃદોષના નિવારણમાં પણ સહાયક બને છે.