માટીના વાસણ ખરીદતાં પહેલાં જાણી લો આ મહત્વપૂર્ણ બાબતો; રવિ-મંગળવારે ખરીદી લાવશે નકારાત્મકતા
છેલ્લું અપડેટ : 07 Aug 2026
ભારતીય સંસ્કૃતિમાં માટીના વાસણોનું વિશેષ મહત્ત્વ રહ્યું છે. ઉનાળામાં ઠંડું પાણી પીવાનો માટીનો ઘડો હોય કે પરંપરાગત વાનગીઓ બનાવવા માટે વપરાતાં માટીનાં વાસણો, તેનો ઉપયોગ આજે પણ ઘરોમાં વ્યાપકપણે થાય છે.
વાસ્તુશાસ્ત્ર અનુસાર, માટીના વાસણો ખરીદવા માટે યોગ્ય સમય અને દિવસનું ધ્યાન રાખવું અત્યંત જરૂરી છે. યોગ્ય સમયે ખરીદેલાં માટીના વાસણો ઘરમાં સકારાત્મક ઊર્જા લાવે છે, જ્યારે અયોગ્ય સમયે ખરીદી કરવાથી નકારાત્મક અસર પડી શકે છે.
માટીના વાસણો ક્યારે ન ખરીદવા?
વાસ્તુશાસ્ત્ર અનુસાર, રવિવાર અને મંગળવારે માટીના વાસણો ખરીદવા અશુભ માનવામાં આવે છે. મંગળવાર પૃથ્વી તત્ત્વ અને મંગળ ગ્રહ સાથે સંકળાયેલો હોવાથી આ દિવસે માટીની વસ્તુઓ ખરીદવાનું ટાળવું જોઈએ. આ ઉપરાંત, પરંપરાગત માન્યતાઓ મુજબ શનિવારે પણ માટીના વાસણોની ખરીદી કરવી હિતાવહ નથી.
સૂર્યાસ્ત પછી ખરીદી કરવાના ગેરફાયદા
એવું માનવામાં આવે છે કે માટીના વાસણો હંમેશા દિવસના અજવાળામાં જ ખરીદવા જોઈએ. સૂર્યાસ્ત પછી કે રાત્રિના સમયે વાસણો ખરીદવા અશુભ ગણાય છે. જો જૂનું વાસણ તૂટી ગયું હોય કે નવા વાસણની જરૂર હોય, તો પણ તેની ખરીદી દિવસ દરમિયાન જ કરવી ઉત્તમ રહેશે.
ચમકદાર અને રંગબેરંગી વાસણો કેમ ન વાપરવા?
માટીના વાસણો ખરીદતી વખતે વાસ્તુની સાથે સ્વાસ્થ્ય સંબંધિત બાબતોનું ધ્યાન રાખવું પણ એટલું જ જરૂરી છે. બજારમાં મળતાં અત્યંત ચમકદાર અને રંગબેરંગી વાસણો પર કેમિકલયુક્ત પેઇન્ટ અથવા વાર્નિશનું કોટિંગ કરવામાં આવેલું હોય છે. આવાં વાસણોમાં ખોરાક પકવવાથી કે પાણી રાખવાથી રસાયણો શરીરમાં જવાનો ભય રહે છે, જે સ્વાસ્થ્ય માટે હાનિકારક છે. તેથી, હંમેશાં કુદરતી અને કેમિકલમુક્ત માટીના વાસણો જ પસંદ કરવાં જોઈએ.
માટીના વાસણોની ગુણવત્તા કેવી રીતે ચકાસવી?
સારી ગુણવત્તાવાળું માટીનું વાસણ ઓળખવા માટે તેના પર આંગળીથી હળવેથી ટકોરો મારો. જો વાસણમાંથી સ્પષ્ટ અને રણકો ધરાવતો અવાજ આવે, તો સમજવું કે તે યોગ્ય રીતે શેકાયેલું (પાકું) છે. જો અવાજ બેસી ગયેલો કે નરમ આવે, તો વાસણ કાચું હોવાની શક્યતા છે. આ ઉપરાંત, ખરીદતાં પહેલાં વાસણમાં પાણી ભરીને તેમાંથી લીકેજ થાય છે કે નહીં તે ચકાસી લેવું, જેથી ટકાઉ વાસણ પસંદ કરી શકાય.
