ઓલિમ્પિક ગેમ્સમાં આ દેશે જીત્યા છે સૌથી વધુ ગોલ્ડ મેડલ, જાણો કેવી છે ભારતની હાલત

ઓલિમ્પિક 2024 શરૂ થવામાં હવે માત્ર બે દિવસ બાકી છે. આ વખતે પેરિસ ઓલિમ્પિક 26 જુલાઈથી શરૂ થશે, જેમાં કુલ 206 દેશો ભાગ લેવા માટે તૈયાર છે. આ દેશોના 10,500 ખેલાડીઓની નજર મેડલ પર ટકેલી છે. તમને જણાવી દઈએ કે, ઓલિમ્પિકમાં ભારતમાંથી માત્ર 117 એથ્લેટ ભાગ લેવા જઈ રહ્યા છે. 1896 થી ઓલિમ્પિક્સ રમાઈ રહી છે. ભારત વર્ષ 1900થી આમાં સામેલ છે. ભારતના પ્રદર્શનની વાત કરીએ તો તેણે અત્યાર સુધી કંઈ ખાસ પ્રદર્શન કર્યું નથી. આ બધા સિવાય જો મેડલની વાત કરીએ તો ચાલો જાણીએ કે ઓલિમ્પિકમાં કયા દેશે સૌથી વધુ મેડલ જીત્યા છે. આ ઉપરાંત અમે તમને ભારતની સ્થિતિ વિશે પણ જણાવીશું.

ઓલિમ્પિકના ઈતિહાસમાં કયો દેશ સૌથી વધુ સફળ રહ્યો હતો?

ઓલિમ્પિકના ઈતિહાસમાં સૌથી સફળ દેશોમાં અમેરિકાનું નામ લેવાય છે. તમને જણાવી દઈએ કે અમેરિકાએ ઓલિમ્પિકમાં કુલ 1061 ગોલ્ડ મેડલ જીત્યા છે. આ દેશે 830 સિલ્વર અને 738 બ્રોન્ઝ મેડલ જીત્યા છે. ઓલિમ્પિક ગેમ્સમાં અમેરિકાના કુલ 2,629 મેડલ છે. ઈતિહાસની વાત કરીએ તો અમેરિકાએ શરૂઆતથી જ ઓલિમ્પિક પર પોતાનું નામ જાળવી રાખ્યું છે.

અમેરિકા પછી સોવિયત યુનિયન એટલે કે USSR (Union of Soviet Socialist Republics) એ પણ ઓલિમ્પિકમાં ઘણા મેડલ જીત્યા. જો કે, USSR એ ઘણા દેશોનું ફેડરેશન હતું, જે હવે અસ્તિત્વમાં નથી. તમારી માહિતી માટે, સોવિયત યુનિયને ઓલિમ્પિક ગેમ્સમાં કુલ 1010 મેડલ જીત્યા છે. જેમાં 395 ગોલ્ડ, 319 સિલ્વર અને 296 બ્રોન્ઝ મેડલ સામેલ છે. અમેરિકા અને યુએસએસઆર પછી, કોઈ દેશે ઓલિમ્પિકના ઈતિહાસમાં 1000થી વધુ મેડલ નથી જીત્યા.

ઓલિમ્પિક ગેમ્સમાં ભારતનું પ્રદર્શન કેવું રહ્યું છે?

ઓલિમ્પિકમાં ભારતના પ્રદર્શનની વાત કરીએ તો ભારતેઅત્યાર સુધીમાં માત્ર 35 મેડલ જીત્યા છે. જેમાં 10 ગોલ્ડ, 9 સિલ્વર અને 16 બ્રોન્ઝ મેડલ સામેલ છે. ભારત 1900થી ઓલિમ્પિક રમી રહ્યું છે, પરંતુ તેનું પ્રદર્શન કંઈ ખાસ રહ્યું નથી. ભારતે છેલ્લી વખત એટલે કે ટોક્યો ઓલિમ્પિકમાં કુલ 7 મેડલ જીત્યા હતા. ટોક્યો ઓલિમ્પિક ભારતની અત્યાર સુધીની સર્વશ્રેષ્ઠ સિઝન રહી છે. આ પહેલા ક્યારેય ભારતીય ટીમે ઓલિમ્પિકમાં એકસાથે આટલા મેડલ જીત્યા નથી. આ વર્ષે, ભારતીય ખેલાડીઓને પેરિસ ઓલિમ્પિક 2024થી ઘણી અપેક્ષાઓ છે. ફેન્સને પણ આ વખતે ખેલાડીઓ જબરદસ્ત જીત હાંસલ કરે તેવી આશા છે.