પેરિસ ઓલિમ્પિકમાં મોટો અકસ્માત, સ્વિમિંગ કરતી વખતે અચાનક બેભાન થઈ ગઈ એથ્લેટ

શુક્રવારે પેરિસ ઓલિમ્પિક 2024માં એક મોટી દુર્ઘટના લગભગ ટળી હતી. વાસ્તવમાં થયું એવું કે સ્લોવાકિયન એથ્લેટ તમારા પોટોકા સ્વિમિંગની રમતમાં ભાગ લઈ રહી હતી. તે લાંબા સમયથી અસ્થમાથી પીડિત છે. 200 મીટરની વ્યક્તિગત મેડલી હીટ પછી તે અચાનક બેભાન થઈ ગઈ. તેને સ્વિમિંગ કરતી વખતે અસ્થમા એટેક આવતા તે બેભાન થઈ ગઈ હતી. અસ્થમા એટેક આવવાનું કારણ સ્વિમિંગ કોમ્પિટિશન નહીં પરંતુ અસ્થમા પંપ એટલે કે ઇન્હેલરનો અભાવ હતો. પોટોકા બેભાન થયા બાદ તરત જ ત્યાં હાજર મેડિકલ ટીમ એક્શનમાં આવી અને તેને મેડિકલ ટ્રીટમેન્ટ આપવામાં આવી. તેને ઓક્સિજન માસ્ક લગાવવામાં આવ્યો હતો. તેને સ્ટ્રેચર પર બહાર લઈ જવામાં આવી હતી.

ઓલિમ્પિક મીડિયા મેનેજરે પુષ્ટિ કરી કે હવે પોટોકા સભાન છે અને તેને તબીબી સહાય મળી રહી છે. સ્લોવાકિયન ટીમ લીડર ઇવાના લેંગે એક નિવેદનમાં કહ્યું, “તમારાને અસ્થમા છે. તેની પાસે તાત્કાલિક ઇન્હેલર ઉપલબ્ધ ન હોવાને કારણે ગભરાટ અને શારીરિક તણાવના કારણે આ સમસ્યા થઈ. તેને ઓક્સિજન અને જરૂરી દવાઓ આપવામાં આવી હતી, તેની સ્થિતિ પર સતત નજર રાખવામાં આવી રહી છે. થોડી મિનિટો પહેલાં, ડોક્ટરે મને કહ્યું હતું કે તેને વધુ કેટલાક કલાકો સુધી નિરીક્ષણ હેઠળ રાખવી પડશે."

એવું કહેવામાં આવ્યું હતું કે, એથ્લેટ તમારા પોટોકા તેની રમત પૂરી કર્યા પછી સ્વિમિંગ પૂલમાંથી બહાર આવી નહોતી. જે બાદ મેડિકલ ટીમ તેની મદદ માટે પહોંચી હતી. તમને જણાવી દઈએ કે સ્લોવાકિયાની 21 વર્ષની એથ્લેટ તમારા પોટોકા સેમીફાઈનલમાં પહોંચવાની રેસમાંથી બહાર થઈ ગઈ છે. તે સૌથી ઝડપી સ્વિમર, કેનેડાની ગોલ્ડ મેડલની આશાવાદી સમર મેકિન્ટોશથી 4.3 સેકન્ડ પાછળ હતી.