Health News : પૂરતી ઊંઘ છતાં કેમ નથી આવતી સ્ફૂર્તિ? જાણો કઈ બીમારીઓના કારણે રાત્રે ઊંઘવા છતાં સવારે થાક લાગે
છેલ્લું અપડેટ : 15 May 2026
આજના દોડધામભર્યા જીવનમાં એક સારી અને ગાઢ ઊંઘ મેળવવી એ કોઈ વરદાનથી ઓછું નથી. ઘણા લોકો પોતાના હેલ્થ રૂટીનને લઈને ખૂબ જ સજાગ હોય છે. તેઓ રાત્રે સમયસર સૂઈ જાય છે, મોડી રાત સુધી મોબાઈલ કે લેપટોપની સ્ક્રીન નથી જોતા અને નિયમ પ્રમાણે પૂરા 8 કલાકની ઊંઘ પણ લે છે. પરંતુ આ બધું કરવા છતાં જો સવારે ઉઠતાની સાથે જ શરીર તૂટતું હોય તેવું લાગે, આંખોમાં ભારેપણું રહે અને આખો દિવસ સુસ્તી પીછો ન છોડે, તો તેને સામાન્ય માનીને નજરઅંદાજ કરવાની ભૂલ ક્યારેય ન કરતા. ઘણીવાર આપણું શરીર આ લક્ષણો દ્વારા કોઈ મોટી અને ગંભીર સમસ્યાનો સંકેત આપી રહ્યું હોય છે.
એક્સપર્ટના જણાવ્યા અનુસાર, માત્ર ઊંઘના કલાકો પૂરા થવા એટલા જ પૂરતા નથી, પરંતુ એ પણ જરૂરી છે કે ઊંઘ કેટલી ગાઢ અને આરામદાયક રહી છે. ઘણા લોકો પલંગ પર તો આઠ કલાક વિતાવે છે, પરંતુ તેમનું શરીર અસલી આરામ સુધી પહોંચી જ શકતું નથી.
કયા કારણે સવારે થાક રહે છે? ઊંઘ દરમિયાન શરીર અલગ-અલગ તબક્કાઓમાંથી પસાર થાય છે. જેમાં હળવી ઊંઘ, ગાઢ ઊંઘ અને આરઈએમ (REM) સ્લીપ શામેલ છે. જો કોઈ કારણોસર વારંવાર ઊંઘ તૂટતી રહે, તો શરીર ગાઢ ઊંઘ સુધી પહોંચી શકતું નથી. આ જ કારણ છે કે, સવારે ઉઠતી વખતે થાક જળવાઈ રહે છે. તણાવ, રૂમમાં ઘોંઘાટ, મોડી રાત સુધી સ્ક્રીન જોવાની આદત અને વધુ પડતું કેફીન લેવા જેવી વસ્તુઓ ગાઢ ઊંઘને અસર કરી શકે છે.
સતત થાક એ બીમારીનો સંકેત
આ સતત જળવાઈ રહેતા થાક પાછળ એક ગંભીર બીમારી પણ હોઈ શકે છે, જેને સ્લીપ એપનિયા (Sleep Apnea) કહેવામાં આવે છે. આ એક એવી સ્થિતિ છે જેમાં સૂતી વખતે વ્યક્તિના શ્વાસ થોડી સેકન્ડો માટે અટકી જાય છે. ડોક્ટર જણાવે છે કે, ઘણા લોકોને આની ખબર પણ નથી પડતી, પરંતુ મગજ વારંવાર શરીરને શ્વાસ લેવા માટે જગાડતું રહે છે. આનાથી ઊંઘ પૂરી થવા છતાં શરીરને આરામ મળી શકતો નથી. જોરથી નસકોરાં આવવા, ઊંઘમાં ગૂંગળામણ અનુભવવી અથવા આખો દિવસ અતિશય સુસ્તી રહેવી તેના સંકેતો હોઈ શકે છે.
લાઈફસ્ટાઈલની પણ અસર
આ સિવાય રોજ અલગ-અલગ સમયે સૂવું અને ઉઠવું પણ શરીરની સર્કેડિયન રિધમને બગાડે છે. આ જ કારણ છે કે રજાઓમાં વધુ સમય સુધી સૂતા પછી પણ ઘણા લોકો વધુ થાક અનુભવે છે. ખાનપાનની આદતો પણ ઊંઘની ક્વોલિટી પર અસર કરે છે. મોડી રાત્રે ભારે ખોરાક, મસાલેદાર ભોજન કે આલ્કોહોલ લેવાથી ઊંઘ વારંવાર તૂટી શકે છે. તો બીજી તરફ શરીરમાં પાણીની કમી (ડિહાઈડ્રેશન) હોવાથી પણ બેચેની અને થાક અનુભવાય છે. માનસિક તણાવ અને ચિંતા પણ આનું મોટું કારણ બને છે. જ્યારે મગજ સતત સક્રિય રહે છે, ત્યારે શરીર આરામની સ્થિતિમાં પહોંચી શકતું નથી. આવી સ્થિતિમાં ધ્યાન (મેડિટેશન), ઊંડા શ્વાસ લેવાની આદત અને સૂતા પહેલા શાંત વાતાવરણ બનાવવાથી ફાયદો મળી શકે છે.
